(ආරියරත්න රණබාහු සහ සුජිත් හේවාජූලිගේ)

 

ත්‍රිකුණාමලයේ තෙල් ටැංකි සංකීර්ණය පිහිටි ඉඩම් තවදුරටත් රජය සන්තකයේ තබා ගැනීමේ තීරණයේ කිසිදු වෙනසක් සිදුකර නැතැයි ඛනිජ තෙල් සම්පත් සංවර්ධන අමාත්‍ය අර්ජුන රණතුංග මහතා පාර්ලිමේන්තුවේදී අද (12) පැවසීය.

විපක්ෂයේ ප්‍රධාන සංවිධායක අනුර කුමාර දිසානායක මහතා ස්ථාවර නියෝග (27) 2 යටතේ පසුගිය දිනෙක අසා තිබූ ප්‍රශ්නයකට පිළිතුරු දෙමින් ඇමැතිවරයා ඒ බව පැවසීය.

එහිදී වැඩිදුරටත් කරුණු දැක්වූ ඇමැතිවරයා කියා සිටියේ  තෙල් ටැංකි සංකීර්ණයේ පහළ කොටසේ පිහිටි ටැංකි 15ක් එල්. අයි. ඕ. සී. සමාගමේ භාවිතයට දී ඇති බවත්, එහි ඉහළ කොටසේ පිහිටි ටැංකි 85ක් සංවර්ධනය කිරීම සඳහා ලංකා ඛනිජ තෙල් නීතිගත සංස්ථාවේ  සහ ලංකා ඉන්දියන් ඔයිල් සමාගම අතර උප සමාගමක් පිහිටුවා එයට භාරදීමට ඇමති මණ්ඩලය තීරණය කර ඇති බවත්ය.

ඊට අමතරව පහළ කොටසේ ඇති ටැංකි 16ක් එම උප සමාගම විසින් සංවර්ධනය කර තෙල් සංස්ථාවේ භාවිතය සඳහා බාරදීමට ද තීරණය කර ඇති බව ද ඇමැතිවරයා කීය.