උපාලි ආන්නද
 
තඹුත්තේගම නගරයේ පැවැති විරෝධතාවය අතරතුර අධිකරණ නියෝග කඩ කරමින් කලහාකාරි ලෙස හැසිරෙමින්  තඹුත්තේගම මූලස්ථාන පොලිසියේ දේපල වලට  අලාභ සිදු කිරීම ඇතුලූ චෝදනා කිහිපයක් සම්බන්ධයෙන් තඹුත්තේගම පොලිසිය පුද්ගලයින් 59 දෙනෙකු අත් අඩංගුවට ගෙන අධිකරණය හමුවට ඉදිරිපත් කළේය.
 
අත් අඩංගුවට ගත් පිරිස අතර සැකකරුවන්  54 ක්  සහ සැකකාරියන් 5 දෙනෙකු සිටින අතර සැකකරුවන් 48 දෙනෙකු සහ සැකකාරියන් 2නෙකු මේ මස (7) වැනිදා  දක්වා රිමාන්ඩ් කරන ලෙස තඹුත්තේගම මහේස්ත‍්‍රාත් චමිලා නදීශානි මහත්මිය අද (28) රාත‍්‍රී 10. 45 ට නියෝග කළාය. 
 
සැකකරුවන් සියලූ දෙනා ඕනෑම ඇප කොන්දේසියක් මත මුදා හරින්නැයි ඔවුන් වෙනුවෙන් පෙනී සිටි නීතිඥයින් දීර්ඝව කරුණු දක්වමින් කළ ඉල්ලීම් සියල්ල තරයේ ප‍්‍රතික්ෂේප කරමින් මෙසේ  නියෝග කෙරිණ.
 
සෙසු සැකකරුවන් හය දෙනා සහ සැකකාරියන් තිදෙනා ශරීර ඇප මත මුදා හරින ලෙසටද මහේස්ත‍්‍රාත්වරිය නියෝග කරනු ලැබුවාය.  
 
පැමිණිල්ල වෙනුවෙන් තඹුත්තේගම සහකාර පොලිස් අධිකාරි පරාක‍්‍රම ඒකනායාක මහතාගේ උපදෙස් මත තඹුත්තේගම මූලස්ථාන ප‍්‍රධාන පොලිස් පරික්ෂක සමන් ප‍්‍රියන්ත මහතා ඇතුලූ නිලධාරීන් කණ්ඩායමක් පෙනී සිටි අතර සැකකරුවන් වෙනුවෙන් නීතිඥ උත්තරා අබේසිංහ මහත්මිය පෙනී සිටියාය.
 
තඹුත්තේගම පොලිසිය සිද්ධිය සම්බන්ධයෙන් වැඩිදුර පරික්ෂණ පවත්වයි.