( තිළිණි ද සිල්වා සහ රංජන් කටුගම්පොළ )
 
 
ඇමෙරිකාවේ හිටපු ශ්‍රී ලංකා තානාපති  ජාලිය වික්‍රමසූරිය මහතා තමාට තානාපති වරප්‍රසාද තවමත් ඇති බව ප්‍රකාශ කරන ලෙස ඉල්ලා ගොනු කර තිබු රිට් පෙත්සමක් විභාගයට නොගෙනම නිෂ්ප්‍රභ කිරීමට අභියාචනාධිකරණය අද (29) තීන්දු කළේය.
 
අභියාචනාධිකරණයේ සභාපති විනිසුරු ප්‍රීති පද්මන් සූරසේන සහ ශිරාන් ගුණරත්න යන විනිසුරු මඩුල්ල  මෙම නියෝග ලබා දී ඇත.
 
තමන්ට හිමි තානාපති වරප්‍රසාද අත්හිටුවන ලෙස දන්වා ශ්‍රී ලංකා විදේශ කටයුතු අමාත්‍යාංශය විසින් ඇමෙරිකානු රජය වෙත නිකුත් කර ඇති ලිපියක් බල රහිත කිරීමේ ආඥාවක් නිකුත් කරන මෙන් ඉල්ලා අමෙරිකාවේ හිටපු ශ්‍රී ලංකා තානාපති ජාලිය වික්‍රමසූරිය මහතා පෙත්සමක් ඉදිරිපත් කර තිබිණි.
 
එම පෙත්සමේ සඳහන් කර තිබුණේ ඇමරිකාවේ ශ්‍රී ලංකා තානාපතිවරයා ලෙස කටයුතු කළ තමන්ගේ තානාපති වරප්‍රසාද අත්හිටුවන ලෙස දන්වා ශ්‍රී ලංකා විදේශ කටයුතු අමාත්‍යාංශය විසින් ඇමෙරිකානු රජය වෙත ලිපියක් යවා ඇති බවයි.
 
මෙම ලිපිය හේතුවෙන් තානාපතිවරයෙක් ලෙස කටයුතු කළ තමාගේ  වරප්‍රසාද උල්ලංඝණය වන බව වික්‍රමසූරිය මහතා අධිකරණය හමුවේ කියා සිටි අතර මේ හේතුවෙන් අදාළ ලිපිය බලරහිත කිරීමේ ආඥාවක් නිකුත් කරන මෙන්ද ඔහු අභියාචනාධිකරණයෙන් ඉල්ලීමක් කර තිබේ.
 
එම පෙත්සමට මූලික විරෝධතා ඉදිරිපත් කරමින් නීතිපතිවරයා  කියා සිටියේ මෙම පෙත්සම විභාග කිරීම සඳහා අභියාචනාධිකරණයට අධිකරණ බලයක් නොමැති බවයි.