ගොවියකුගෙන් අල්ලස් ගත්තැයි හිටපු ප්‍රා.සභාපති සිරගෙට

(මනෝප‍්‍රිය ගුණසේකර)

කොරියාවේ රැකියා ලබා දෙන බව කියමින් ගොවියකුගෙන් රුපියල් 75,000 ක අල්ලසක් ලබා ගැනීමේ චෝදනාවන්ට වරදකරු වු රඹෑව ප‍්‍රාදේශිය සභාවේ හිටපු සභාපතිවරයාට කොළඹ මහාධිකරණ විනිසුරු ගිහාන් කුලතුංග මහතා බරපතල වැඩ සහිත වසර 13 ක සිර දඬුවමක් අද (03) නියම කළේය.

කිරි හරක් විකූණා මුදල් සොයා ගත් ගොවියෙකුගෙන් අල්ලස් ඉල්ලා ලබා ගත් මෙම විත්තිකරුට මහජන සේවය සඳහා බව පවසමින් දේශපාලනයට පිවිසෙන සෙසු දේශපාලනඥයින්ටද පාඩමක් වන අන්දමින් දඩුවම් නියම කරන්නැයි පැමිණිල්ල වෙනුවෙන් පෙනී සිටි අල්ලස් කොමිසමේ සහකාර අධ්‍යක්‍ෂ ජනරාල් නීතීඥ ගංගා හෙයියන්තුඩුව මහත්මිය ඉල්ලීමක් කර තිබිණී.

එම ඉල්ලීම පිළිගනිමින් විත්තිකරුට මෙලෙස  දඩුවම් නියම කළ විනිසුරුවරයා මෙම සිරදඬුවම වසර 05ක කාලයක්  තුළ  ගෙවී  යන  ලෙස  ක‍්‍රියාත්මක කිරීමටද නියම කළේය.ඊට අමතරව රුපියල් 40,000ක දඩයක් ගෙවීමටද නියම කෙරිණි.

මෙලෙස දඬුවම් නියම වුයේ රඹෑව ප‍්‍රාදේශිය සභාවේ  හිටපු  සභාපති  රනිල්  මාධව  කමල්නිළමේ  නමැත්තාටය.අල්ලස් කොමිසම විත්තිකරුට එරෙහිව චෝදනා තුනක් යටතේ නඩු පවරා තිබිණි.

ඉදිරිපත් වු සියලු කරුණු සළකා බැලූ විනිසුරුවරයා අල්ලස් ඉල්ලීමේ චෝදනාවට වසර 05ක බරපතල වැඩ සහිත  සිරදඬුවමක්ද, අල්ලස් ලබා ගැනීම සම්බන්ධයෙන් පවරා තිබු චෝදනා දෙකට වසර 04 බැගින් වසර 08ක බරපතල වැඩ සහිත  සිරදඬුවමක්ද  නියම කළේය.