(දසුන් රාජපක්ෂ )
ගම්පෙරළිය කඩිනම් ග්‍රාමීය සංවර්ධන වැඩසටහන ක්‍රියාත්මක කිරීමේදී පසුගිය ආණ්ඩුව සමයේ සිදු වූ බව කියන කොයෙකුත් ආකාරයේ වංචා දූෂණ සොයාබැලීමේ කැබිනට් අනු කමිටුවක් පත් කිරීමට රජය තීරණය කර තිබේ.
 
ඉකුත් 2 වැනිදා පැවති කැබිනට් මණ්ඩල රැස්වීමට තමන් ඉදිරිපත් කළ යෝජනාවක් අනුව මෙම තීරණය ගෙන ඇති බව ධීවර හා ජලජ සම්පත් අමාත්‍ය ඩග්ලස් දේවානන්ද මහතා අද (7) ප්‍රකාශ කළේය.

ගම්පෙරළිය වැඩසටහන ක්‍රියාත්මක කළ කිළිනොච්චිය දිස්ත්‍රික් ලේකම් කාර්‍යාලයේ නිලධාරීන් පිරිසක් කළ පැමිණිලි කිහිපයක් සම්බන්ධයෙන් සොයා බලා අනාවරණය කරගත් තොරතුරු සම්බන්ධයෙන් සොයා බලා අනාවරණය කරගත් තොරතුරු සම්බන්ධයෙන් කැබිනට් මණ්ඩලය වෙත කරුණු දැක්වූ බවද ඩග්ලස් දේවානන්ද මහතා සදහන් කළේය.

එක් චන්ද කොට්ඨාසයකට රුපියල් මිලියන  300 බැගින් කිළිනොච්චිය දිස්ත්‍රික්කයට ලබා දී ඇති මුදල් අයථා ලෙස පරිහරණය කිරීමේ සිද්ධි කිහිපයක් එහිදී අනාවරණය කරගැනීමට හැකි වූ බවද අමාත්‍යවරයා පැවසීය.

යහපාලන ආණ්ඩුවේ කැබිනට්  අමාත්‍ය මණ්ඩලය ගත් තීරණයකට අනුව රටේ යටිතල පහසුකම් වැඩිදියුණු කිරීම, ජනතාවගේ ජීවනෝපාය සංවර්ධනය කිරීම සහ ආර්ථික වර්ධනය වේගවත් කිරීම සදහා 2018 වසරේ ආරම්භ කරන ලද ගම්පෙරළිය කඩිනම් ග්‍රාමීය සංවර්ධන වැඩසටහන ක්ෂේත්‍ර 12ක් ආවරණය වන පරිදි සෑම චන්ද කොට්ඨාසකම ක්‍රියාත්මක කෙරුණි.