ගම්පොළ දොළුවේ අඹකුඹුරේ පදිංචි විකුම් සම්පත් දිඹුල්ගස්තැන්න නිපදවූ කසල ප්‍රතිචක්‍රිකරණය කිරීමේ යන්ත්‍රය සංකල්පමය වශයෙන් ඉතා හොඳ එකක් බැවින් එය දියුණු කිරීම සඳහා වහා උපකාර කිරීමට තීරණය කළ බව විද්‍යා, තාක්ෂණ හා පර්යේෂණ අමාත්‍ය සුසිල් ප්‍රේම ජයන්ත මහතා ලංකාදීපයට පැවැසීය. අද (23) පෙරවරුවේ විකුම් සම්පත් මහතාගේ නිවසට ගොස් ඔහු නිපදවූ යන්ත්‍රය පරික්ෂා කර එහි ආදර්ශයක් නිපදවන ලෙස උපදෙස් දුන් බව කී අමාත්‍යවරයා, එය නිපදවීමට අවශ්‍ය කරන ප්‍රතිපාදන ලබා දීමට කටයුතු කරන බව ද පැවැසීය. 
එහි ආදර්ශන නිපදවූ පසු නර්ඩ් ආයතනයහා එක්ව වඩාත් විධිමත්ව නව අංග සහිතව අදාල යන්ත්‍රය  නිපදවීමටත්, අනතුරුව ඔහුට බලපත්‍ර ලබා දීමට කටයුතු කරන බවත් ඇමතිවරයා ප්‍රකාශ කළේය. මේ සඳහා ජාතික ඉංජිනේරු පර්යේෂණ ආයතනයේ නේවාසිකව සිටීම සඳහා ඔහුට අවශ්‍ය පහසුකම් සපයා දීමට කටයුතු කරන බව ද ඇමතිවරයා තව දුරටත් පැවසීය. 
ලේලන්ඩ් බසයක කොටසක් කපා ගෙන මූලික සිද්ධාන්ත මතු කරමින් දැවැන්ත යන්ත්‍රයක් ලෙස මෙම යන්ත්‍රය නිපදවා තිබු අතර  ඒ සඳහා ඔහුට රුපියල් ලක්ෂ 32 ක මුදලක්  වැය වි තිබිණ. අදාළ යන්ත්‍රය ක්‍රීයාත්මක කර එහි ක්‍රියාකාරිත්වය හා අඩුපාඩු පිළිබඳ එම ස්ථානයේ දීම අදාල නිලධාරින් සමඟ අමාත්‍යවරයා සාකච්ඡා කළ අතර පවතින කසළ ප්‍රශ්නයට එය ඉතා ගැලපෙන පිළීතුරක් බව ද එහි දී පවසා තිබේ. 
දිගුකාලින පර්යේෂණයක ප්‍රතිපලයක් ලෙස නිපදවනු ලැබු එම යන්ත්‍රය මේ වනවිට ඉතා වැදගත් අවශ්‍යතාවයක්  බවට පත් වී තිබිම පිළීබඳව සතුටු වන බව විකුම් සම්පත් මහතා ලංකාදීපයට අදහස් දක්වමින් ප්‍රකාශ කළේය.

මෙම ගමනට සුසිල් ප්‍රේම ජයන්ත අමාත්‍යවරයා සමඟ නව නිපැයුම්කරුවන්ගේ සංගමයේ සභාපති මහේෂ් එදිරිසිංහ මහතා ඇතුළු අමාත්‍යංශ හා අදාළ ආයතන නියෝජිතයෝ ද සහභාගි වූහ.