තරිඳු ජයවර්ධන
 
ජාතික පොලිස් කොමිෂන් සභාවෙන් වැඩ බලන නියෝජ්‍ය පොලිස්පතිතනතුරට පත් කරන්නැයි නියෝග කර පොලිස්පතිවරයා විසින් මේ වන තෙක් ක්‍රියාත්මක නොකළ ජ්‍යෙෂ්ඨ පොලිස් අධිකාරී පාලිත සිරිවර්ධන මහතාගේ උසස්වීම ද කඩිනමින් ලබා දෙන ලෙස  එම කොමිසම අද පොලිස්පතිවරයාට දැනුම් දුන්නේය.
 
පාලිත සිරිවර්ධන මහතාගේ උසස්වීම සම්බන්ධයෙන් අද ජාතික පොලිස් කොමිෂන් සභාවේ දී සාකච්ඡා කරද්දී පොලිස්පතිවරයා ප්‍රකාශ කර ඇත්තේ සිරිවර්ධන මහතාට එරෙහිව චෝදනාපත්‍ර දෙකක් ඇති බැවින් උසස්වීම ලබා නුදුන් බවයි. එම අවස්ථාවේ කොමිසම කියා ඇත්තේ සිරිවර්ධන මහතාට ලබාදීමට නිර්දේශ කළ චෝදනාපත්‍ර දෙන නිෂ්ප්‍රභා කර ඇති බවයි.
 
එලෙස නිෂ්ප්‍රභා කිරීම සම්බන්ධයෙන් ලිපියක් නොලැබුණු නිසා ඔහුට උසස්වීම නොදුන් බව පොලිස්පතිවරයා කියා තිබේ. අවශ්‍ය නම් යළි එම ලිපිය ලබා දිය හැකි බවත්, ඔහුගේ උසස්වීම ද ක්‍රියාත්මක කරන ලෙසත් පොලිස් කොමිසම දැනුම් දී ඇත. ඒ අනුව ඔහුගේ උසස්වීම සිදු කළ හැකි බව පොලිස්පතිවරයා ප්‍රකාශ කළේ යැයි ජාතික පොලිස් කොමිෂන් සභාවේ ආරංචි මාර්ග කියයි.
 
පාලිත සිරිවර්ධන මහතා වැඩ බලන නියෝජ්‍ය පොලිස්පති ධුරයට උසස් කරනු ලැබුවේ පසුගිය මැයි මාසයේදීය.
 
 ජ්‍යෙෂ්ඨ පොලිස් අධිකාරී පාලිත සිරිවර්ධන මහතා ඇතුළු පස් දෙනකු වැඩ බලන නියෝජ්‍ය පොලිස්පති ධුරයට පත් කරන ලෙස ජාතික පොලිස් කොමිෂන් සභාව මුල් වරට තීරණය කර පොලිස්පතිවරයාට දැනුම් දුන්නේ පසුගිය අප්‍රේල් පස් වැනි දා ය. ඒ  මහතා සහ ජ්‍යෙෂ්ඨ පොලිස් අධිකාරී ගාමිණී පෙරේරා මහතා වැඩ බලන පොලිස්පති ධුරයට පත් කිරීම ගැන නැවත සලකා බලන ලෙස පොලිස්පති පූජිත ජයසුන්දර මහතා පොලිස් කොමිෂන් සභාවෙන් ඉල්ලා තිබිණි.
 
එම තීරණය සලකා බලා යළිත් වරක් පොලිස් කොමිසම දැනුම් දුන්නේ ඒ දෙදෙනා ඇතුළු ජ්‍යෙෂ්ඨ පොලිස් අධිකාරීවරුන් පස්දෙනාම වැඩ බලන නියෝජ්‍ය පොලිස්පතිවරුන් ලෙස පත් කරන ලෙසයි. කෙසේ වෙතත් අවස්ථා තුනකදීම ඔවුන් වැඩ බලන නියෝජ්‍ය පොලිස්පති තනතුරට පත් නොකිරීම නිසා මැයි මාසයේ මුල් සතියේ දී ජාතික පොලිස් කොමිසම පාලිත සිරිවර්ධන මහතා හැර ඉතිරි ජ්‍යෙෂ්ඨ පොලිස් අධිකාරීවරු  හතර දෙනා වැඩ බලන පොලිස්පතිවරුන් ලෙස පත් කරනු ලැබූහ