(ඩයනා උදයංගනී)

කුණු කසල ප‍්‍රතිචක‍්‍රීකරණය කළ හැකි ක‍්‍රමවේදයන් සොයා බලන්නට විදේශ සංචාරවලට ගිය අයගේ ප‍්‍රමාණය සලකන විට එම ප‍්‍රශ්නයට මෙතෙක් කල් විසඳුම් නොලැබුණේ ඇයිදැයි ප‍්‍රශ්නයක් බව ශ්‍රී ලංකා නිදහස් පක්‍ෂ තරුණ පෙරමුණේ සභාපති ශාන්ත බණ්ඩාර මහතා පවසයි.

පළාත් පාලන ආයතන ප‍්‍රධානීන්, පළාත් සභා මන්ත‍්‍රීවරුන්, රාජ්‍ය නිලධාරීන් ආදී පිරිස් මේ ගැන සොයාබැලීමට විදෙස් සංචාරවල නිරත වී ඇති බව කී ශාන්ත බණ්ඩාර මහතා ඔවුන් අවංකව කැපවී විසඳූම් සෙවූයේ නම් කුණු ප‍්‍රශ්නය මේ වන විට විසඳා ගන්නට තිබූ බව ද කියයි.

මීතොටමුල්ලේ සිදුවූ විනාශය සම්බන්ධයෙන් පැවති ආණ්ඩුව, වත්මන් ආණ්ඩුව, පළාත් පාලන ආයතන ඇතුළු අදාළ සියලූ පාර්ශව වගකීම භාරගත යුතු බව ඒ මහතා පවසයි.

අදාළ අංශවලට දැන්වත් එයට විසඳුමක් සෙවීමට නොහැකි නම් මාස තුනක් ඇතුළත විසඳුමක් සෙවීමට ශ්‍රී ලංකා නිදහස් තරුණ පෙරමුණ සූදානම් යැයි ද ඒ මහතා ප්‍රකාශ කරයි. 

ශාන්ත බණ්ඩාර මහතා මේ බව පැවසුවේ කොළඹ, ඩාර්ලි පාරේ පිහිටි ශ්‍රී.ල.නි.ප මූලස්ථානයේදී අද (18 )පැවති මාධ්‍ය හමුවක් අමතමිනි.