(එෆ්. අස්ලම්)

සිංහල බෞද්ධ යටත්වාදී ආණ්ඩුවට එරෙහිව නැගී සිටිමින් උතුරු නැගෙනහිර දෙමළ ජනතාවගේ පැවැත්ම ආරක්ෂා කරගැනීම වෙනුවෙන්   සියළුම දෙමළ පාර්ලිමේන්තු මන්ත්‍රීවරුන් ප්‍රතිපත්තිගරුකව ඒකරාශී විය යුතු යැයි ඊ.පී.ආර්.එල්.එෆ් පක්ෂයේ නායක හිටපු පාර්ලිමේන්තු මන්ත්‍රී සුරේෂ් ප්‍රේමචන්ද්‍රන් මහතා පවසයි.

පාර්ලිමේන්තුවට තේරී පත් වූ උතුරු පාළාත් හිටපු ප්‍රධාන අමාත්‍ය සී.වී.විග්නේෂ්වරන් මහතා සිය පාර්ලිමේන්තු දේශපාලන ගමන ආරම්භ කරමින් අද (13) මුල්ලිවයික්කාල් හි සැමරුමක් සිදුකළ අතර එම සැමරුමට සහභාගී වී මාධ්‍ය වෙත අදහස් දක්වමින් ප්‍රේමචන්ද්‍රන් මහතා මේ බව සඳහන් කළේය.

වැඩිදුරටත් අදහස් දැක්වූ ප්‍රේමචන්ද්‍රන් මහතා මෙසේද කීය.

      ‘‘කිසිම ඵලකට නැති කැබිනට් මණ්ඩලයක් වත්මන් ආණ්ඩුව පත්කරගෙන තිබෙනවා.ඒ කැබිනට් මණ්ඩලය මුළුමනින්ම සිංහල බෞද්ධ යටත්වාදයට අනුගත පවුල් පාලනයකට  පවතින්නේ. දෙමළ ජනතාවගේ අනාගතය ගැන තියෙන්නෙ ලොකු ප්‍රශ්නයක්. විවිධ අර්බුදවලට දෙමළ ජනතාව මුහුණ දී සිටිනවා.

දෙමළ ජනතාවගේ භූමියත් පැවැත්මත් අනතුරේ හෙලෙන ආකාරයේ අකටයුතුකම් උතුරු නැගෙනහිර පළාත් කේන්ද්‍රගතව සිදුවෙනවා.

වත්මන් පාර්ලිමේන්තුවට තේරී පත්වූ දෙමළ මන්ත්‍රීවරුන් උතුරු නැගෙනහිර භූමියත් දෙමළ ජනතාවගේ පැවැත්මත් අනාරක්ෂිත වන සෑම අවස්ථාවකදීම නැගී සිටීම  ඔවුන්ගේ වගකීමක්.

නව රජයේ සිංහල බෞද්ධ යටත්වාදය පරාජය කිරීමට නම් දෙමළ පාර්ලිමේන්තු මන්ත්‍රීවරුන් අඩුම තරමින් ප්‍රතිපත්තිගරුකව මෙවන් අවස්ථාවලදී ඒකරාශී විය යුතුයි ‘‘යැයිද හෙතෙම කීය.