(රංජන් කස්තුරි)

සෙවණගල සීනී සමාගමේ සභාපති ඇතුළු පාලන අධිකාරියට එරෙහිව උක් ගොවීහූ පිරිසක් අද (18) ශ්‍රී ලංකා මානව හිමිකම් කොමිෂන් සභාවට පැමිණිල්ලක් ඉදිරිපත් කළහ.

එම සමාගමට අයත් ඇඹිලිපිටිය , තණමල්විල ,සෙවණගල ආදී ප්‍රදේශවල උක් ගොවීහු මෙම පැමිණිල්ල ඉදිරිපත් කළ අතර ගොවි සංවිධාන නියෝජිතයින් රැසක් එම අවස්ථාවට සහභාගී වූහ.

පැමිණිල්ල ඉදිරිපත් කිරීමෙන් අනතුරුව මාධ්‍යයට අදහස් දක්වමින් උක් ගොවීන්ගේ ඒකාබද්ධ බල මණ්ඩලයේ සභාපති ඩී.ඩී ජයතිලක මහතා මෙසේ පැවසීය.

“මේ සමාගම යටතේ ගොවි පවුල් 3921ක් පමණ ඉන්නවා.පාලනාධිකාරියේ හිතුවක්කාරී තීරණය නිසා පවුල් 230ක් පමණ දැඩි දුෂ්කරතාවට පත්ව සිටිනවා.සමාගමේ වර්තමාන පාලකයින් ගොවීන්ව දැඩි මර්දනයට ලක් කර තිබෙනවා.අපේ උක් ඵලදාව නිසි පරිදි මිලදී ගන්නා කිසිම ක්‍රමවත් වැඩපිළිවෙලක් මේ අයට නැහැ.මේ නිසා උක් නිෂ්පාදන මෙට්‍රික් ටොන් 78000ක් පමණ මිලදී ගන්න සමාගමට හැකියාවක් නෑ.“