ඇෆ්ගනිස්තානයේ ස්ථාන කිහිපයකට ඊයේ ( 30 ) එල්ල වූ මරාගෙන මැරෙන බෝම්බ ප්‍රහාර මාධ්‍යවේදීන් ඉලක්ක කරගෙන එල්ල වූ ප්‍රහාර යැයි ද එක්සත් ජාතීන්ගේ මහලේකම් ඇන්තෝනියෝ ගුටරෙස් අද (1)  ප්‍රකාශ කළේය.

මහලේකම්වරයා එලෙස ප්‍රකාශ කළේ එම ප්‍රහාරවලට විරෝධය පළ කරමින් නිවේදනයක් නිකුත් කරමිනි. 

මෙම ප්‍රහාරවලින් මාධ්‍යවේදීහු 10 දෙනෙක් මිය ගියහ.   ඊයේ දිනයේදී කාබුල් නුවරට එල්ල වූ මරාගෙන මැරෙන බෝම්බ ප්‍රහාර දෙකක් එල්ල වූ අතර ඉන් එක් ප්‍රහාරයකින් ප්‍රංශ පුවත් සේවයේ ඇෆ්ගනිස්තානයේ ප්‍රධාන ඡායාරූප ශිල්පී ෂාහ් මරායී ජීවිතක්ෂයට පත්විය. නැගෙනහිර කෝස්ට් ප්‍රදේශය ස්ථානයකට එල්ල වූ ප්‍රහාරයකින් බී.බී.සී පුවත් සේවයේ වාර්තාකරුවකු වන අහ්මද් ෂාහ් ජීවිතක්ෂයට පත්විය.

මෙම ප්‍රහාර විශේෂයෙන්ම කාබුල් නුවරට එල්ල වූ දෙවැනි මරාගෙන මැරෙන බෝම්බ ප්‍රහාරය මාධ්‍යවේදීන් ඉලක්ක කරගනිමින් එල්ල වූ ප්‍රහාර යැයි එක්සත් ජාතීන්ගේ සංවිධානය අවධාරණය කළේය. වුවමනාවෙන්ම මාධ්‍යවේදීන් ඉලක්ක කරගනිමින් ප්‍රහාර එල්ල කර ඇතැයි එක්සත් ජාතීන්ගේ මහලේකම්වරයා සඳහන් කළේය. 

එම ප්‍රහාරය තලේබාන් සංවිධානයේ බිඳ වැටීමෙන් පසු මාධ්‍යවේදීන් ඉලක්ක කරගනිමින් එක් දිනක-දී එල්ල වූ දැවැන්තම ප්‍රහාරය මෙය යැයි සීමා නැති මාධ්‍යවේදීහු කීහ. 

එමෙන්ම ඊයේ දිනයේදී ඇෆ්ගනිස්තානයේ කන්දහාර් ප්‍රදේශයට එල්ල වූ මරාගෙන මැරෙන බෝම්බ ප්‍රහාරයකින් කුඩා දරුවෝ 11 දෙනෙක් ජීවිතක්ෂයට පත්වූහ. 

ෂාහ් මරායිගේ අවසන් කටයුතු අද, මැයි 1 වැනිදා ඔහු උපන් ගම්මානයේදී සිදු කෙරුණි. 

055