ඇමෙරිකානු ගුවන් යානාවලට පහර දීමට තමන්ට සෑම අයිතියක්ම ඇතැයි උතුරු කොරියානු විදේශ අමාත්‍ය රි යොන්ග් හෝ මහතා පවසයි.

ඇමෙරිකා ජනාධිපති ඩොනල්ඞ් ට්‍රම්ප් මහතා යුද්ධයක් ප්‍රකාශ කර ඇති බවත් ඊට ප්‍රතිචාර දක්වමින් ඕනෑම අවස්ථාවකදී කොරියානු අර්ධද්වීපයට ඉහළ අහසේ ගමන් කරන ඇමෙරිකාවට අයත් ප්‍රහාරක ගුවන් යානා බිම හෙළීමට කටයුතු කරන බවත් විදේශ අමාත්‍යවරයා ප්‍රකාශ කළේය.

උතුරු කොරියාව සැප්තැම්බර් 3 වැනිදා ඔවුන්ගේ සයවැනි සහ බලසම්පන්නම න්‍යෂ්ටික අත්හදා බැලීම සිදු කිරීමත් සමඟ ඇමෙරිකාවත් උතුරු කොරියාවත් අතර තිබෙන අර්බුදය උග්‍ර අතට හැරිණි. උතුරු කොරියාවට ජාත්‍යන්තරයෙන් එල්ල වන පීඩනයද වැඩිවිය. කෙසේ නමුත් නිව්යෝක් නුවර පැවැති එක්සත් ජාතීන්ගේ මහ සමුළුවේදීත් දෙරටේ නායකයන් එකිනෙකාට තර්ජනය කිරීමත් උපහාස අපහාස කරගැනීමත් නිසා දෙරට අතර තිබෙන අර්බුදය නව මානයකට හැරිණි.

“අපගේ නායකයා තවත් ඉවසන එකක් නැහැ” යැයි ඇමෙරිකා ජනාධිපතිවරයාගේ ට්විටර් පණිවිඩයකට ප්‍රතිචාර දක්වමින් උතුරු කොරියාවේ විදේශ අමාත්‍ය රි යොන්ග් හෝ මහතා සඳහන් කළේය.

ඇමෙරිකාව උතුරු කොරියාවට තර්ජනයක් වුවහොත් ඊට එරෙහිව පියවර ගැනීමට උතුරු කොරියාවට සෑම අයිතියක්ම ඇතැයි අමාත්‍යවරයා පැවැසීය.

(රොයිටර්-055)