(මනෝප්‍රිය ගුණසේකර සහ රන්ජන් කටුගම්පොළ)
 
ජංගම දුරකතනයක් සම්බන්ධයෙන් වු පැමිණිල්ලක් සමථයකට පත් කිරීමට කාන්තාවකගෙන් රුපියල් 20,000 ක අල්ලසක් ලබා ගත්යැයි  කියන පොලිස් සැරයන්වරයකු නිදොස් කොට නිදහස් කිරිමට කොළඹ මහාධිකරණ විනිසුරු ගිහාන් කුලතුංග මහතා අද (14) නියෝග කළේය.
 
පැමිණිලිකාරියගේ සහ අල්ලස් නිලධාරීන්ගේ සාක්කි පරස්පර බැවින් පොලිස් සැරයන්වරයා අල්ලස ලබා ගැනිම පිළිබඳ  සැකයක් මතුවීම හේතුවෙන් එහි වාසිය විත්තිකරුට ලබාදිමට විනිසුරුවරයා කටයුතු කළේය.
 
පැමිණිලිකාරියගේ සහ අල්ලස් නිලධාරීන්ගේ සාක්කි පරස්පර බවත් අල්ලස් ගැනීම සිදු වූ බව කියන තේ කඩයේ සේවය කළ අයගේ සාක්කිය අනුව අල්ලස් නිලධාරීන් කියනාකාරයේ වැටලීමක් සිදුවුවාද යන්න සැකයක් මතුවන බවත් සඳහන් කළ විනිසුරුවරයා මෙලෙස නිදොස් කොට නිදහස් කරන ලද්දේ තංගල්ල පොලිසියේ සැරයන්වරයෙකු (19961) ලෙස සේවය කළ දික්වැල්ලේ පදිංචි රජගල්ගොඩ ගමගේ සුනිල් නමැත්තෙකි.