(තරිඳු ජයවර්ධන සහ ටෝනි කරුණානායක)

ගම්පහ ඉඹුල්ගොඩදී අන්තර් විශ්ව විද්‍යාල ශිෂ්‍ය බල මණ්ඩලයේ ක්‍රියාකාරීන් දෙදෙනකු මිය යෑම සම්බන්ධයෙන් විමර්ශනයේ උදෘත නීතිපති උපදෙස් සඳහා යොමු කර ඇතැයි රහස් පොලිසිය අද ගම්පහ අතිරේක මහේස්ත්‍රාත් ලලිත් කන්නංගර මහතාට දැනුම් දුන්නේය.

මෙම මරණ සිදුවී වසර තුන හමාරකටත් අධික කාලයක් ගත වී ඇති නිසා පරීක්ෂණ කඩිනම් කරන ලෙස රහස් පොලිසියට නියෝග කරන්නැයි අගතියට පත් පාර්ශවය වෙනුවෙන් පෙනී සිටි නීතීඥ රාජිකා සිල්වා මහත්මිය අධිකරණයෙන් ඉල්ලීමක් කළාය.

ඒ අනුව ඊළඟ නඩු දිනයේ වැඩිදුර වාර්තාවක් ඉදිරිපත් කරන ලෙස රහස් පොලිසියට නියෝග කළ අතිරේක මහේස්ත්‍රාත්වරයා පැමිණිල්ල ජූනි මාසය තෙක් කල් තැබීය.

විශ්ව විද්‍යාල ආචාර්යවරුන්ගේ සමිති සම්මේලනය ගෙන ගිය සියයට හයේ අරගලයට සහාය දීමක් ලෙස මහනුවර සිට කොළඹට අන්තර් විශ්ව විද්‍යාල ශිෂ්‍ය බල මණ්ඩලය පාගමනක් සංවිධානය කර තිබිණි.එම පාගමන අතරතුර 2012 සැප්තැම්බර් 27 වැනි දා අත්පත්‍රිකා තොගයක් ගෙන ඒමට නුගේගොඩ දෙල්කඳට යද්දී මෙම සිදුවීම වී තිබිණි. සිද්ධියෙන් මිය ගියේ කැලණිය විශ්ව විද්‍යාලයයේ මහා ශිෂ්‍ය සංගමයේ හිටපු සභාපති   ජනක බණ්ඩාර ඒකනායක සහ රුහුණ විශ්ව විද්‍යාලයයේ පළමු වසර ශිෂ්‍ය සිසිත ප්‍රියංකර සිල්වා යන දෙදෙනාය. ඔවුහු අනතරේ ක්‍රියාකාරී සාමාජිකයෝ වූහ.