(රංජන් කස්තුරි)  

මැල්කම් කාදිනල් රංජිත් කොළඹ අගරදගුරුතුමන් මානව හිමිකම් සම්බන්ධයෙන් ඉකුත්දා කළ ප්‍රකාශය පිළිගත නොහැකි බවත් අගරදගුරුතුමන් ජනප්‍රියවීමට ගන්නා සෑම උත්සාහයක්ම වරද්දා ගන්නා බවත් මුදල් හා ජනමාධ්‍ය අමාත්‍ය මංගල සමරවීර මහතා සිය ට්විටර්
ගිණුමෙහි සටහනක් තබමින් සඳහන් කර ඇත.

මානව හිමිකම් සුරැකීම අවශ්‍යවූයේ කතෝලික ආගම නොපිළිගන්නා සහ ඒ පිළිබඳව ප්‍රශ්න කළ පුද්ගලයන් එදා වධ හිංසාවලට භාජනවීම සහ කුරුස යුද්ධයේදී සමූලඝාතනයට ලක්වීම නිසා යැයි ද සමරවීර මහතා සඳහන් කර ඇත.

මානව හිමිකම් සම්බන්ධයෙන් අදහස් දක්වමින් මැල්කම් කාදිනල් රංජිත් අගරදගුරුතුමන් ඉකුත්දා ප්‍රකාශ කර තිබුණේ ශත වර්ෂ ගණනාවක සිට ආගමික නැඹුරුවක් ඇති ශ්‍රී ලංකාව වැනි රටවලට මානව හිමිකම් ගැන පාඩම් කියාදීමට බටහිර ජාතීන් උත්සාහ දරන බවය.

සාන්ත මතෙව් රෝමානු කතෝලික දෙව්මැදුරේ ඉකුත්දා පැවැති මංගල දේව මෙහෙයට එක්වෙමින් අගරදගුරුතුමන් එසේ සඳහන් කර තිබිණ.

මංගල සමරවීර ඇමැතිවරයා පිළිතුරු දී තිබුණේ අගරදගුරුතුමන්ගේ එම ප්‍රකාශයටය.