බිඟුන් මේනක ගමගේ 

තේ නිෂ්පාදනයේදී සීනි හා ග්ලූකෝස් මිශ්‍ර කරන බවට චෝදනා එල්ල වූ තේ කම්හල් සම්බන්ධයෙන් වැවිලි කර්මාන්ත අමාත්‍යංශය මගින් ආරම්භ කළ විමර්ශනය අතරමග නතර වී ඇතැයි විශ්වසනීය ආරංචි මාර්ග ප්‍රකාශ කරයි.  

ගාල්ල, රත්නපුර හා මාතර යන දිස්ත්‍රික්කවල තේ කම්හල් 80 ක තේ මණ්ඩලය පසුගිය පෙබරවාරි මාසයේදී කළ හදිසි වැටලීමකදී තේ නිෂ්පාදනයේදී සීනි හා ග්ලූකෝස් මිශ්‍ර කරන බවට කම්හල් 53 කට චෝදනා එල්ල වූ අතර වැවිලි කර්මාන්ත ඇමැති නවීන් දිසානායක මහතා පැවැසුවේ ඒ සම්බන්ධයෙන් අමාත්‍යංශ මට්ටමින් වෙනම විමර්ශනයක් කරන බවයි.

මේ අතර එම වැටලීමට මූලිකත්වය ගත් ආචාර්ය රොහාන් පෙතියාගොඩ මහතා තේ මණ්ඩලයේ සභාපතිත්වයෙන් ඉල්ලා අස් වූ අතර චෝදනාවට ලක් වූ කම්හල්හිමියෝ අදාළ වැටලීමේදී අනුගමනය කළ (HPLC) නමැති පරීක්ෂණ ක්‍රමවේදය අභියෝගයට ලක් කළහ.

ජනතා විමුක්ති පෙරමුණු පාර්ලිමේන්තු මන්ත්‍රී සුනිල් හඳුන්නෙත්ති මහතා ඇමැති නවීන් දිසානායක මහතාට ලිපියක් යොමු කරමින් චෝදනාවට ලක් වී සිටින කම්හල්හිමියන්ගේ නම් හෙළි කරන්නැයි ඉල්ලා සිටි නමුත් පරීක්ෂණ අවසන් නැති බැවින් එම නම් හෙළි කළ නොහැකි බව නවීන් දිසානායක ඇමැතිවරයා පැවසීය.

අදාළ විමර්ශන කටයුතු අතරමග නතරවීමට මෙසේ චෝදනාවට ලක්ව ඇති කම්හල් අතර දේශපාලන ප්‍රබලයන් කීප දෙනෙකුගේම කම්හල් තිබීම ප්‍රධාන හේතුවක් වී ඇතැයි තේ මණ්ඩලයේ ප්‍රකාශකයෙක් පැවැසීය.