"සියදොරිස් බයිසිකලයක් අරගෙන වගෙයි"'

පාලම අසල වූ කිසිවකු ඔහු පාලම ළඟ වූ කඩ පිළට ගොඩවෙනු දැක කිවේ නළල රැලි ගන්වා සිනහ මුහුණින් යුතුව එ දෙස බැලීමෙන් පසුවය. එවැන්නකුගේ දෙනෙතෙහි විස්මය මෙන් ම උපහාසාත්මක සිනහවක් ද විය.

ඔව්, දැන් දවස් හතරකට පහකට ඉස්සෙල්ලා ගත්තා. හිතුවට වැඩිය ලාභෙට ලැබුණා ' යි එවැනි වි⁣ටක ඔහු කීවේ,තමා පළමුවර එදෙස බලන්නාක් මෙන් විස්මයෙන් යුතු ව බලමින් සිනහවෙන් ඉතිරෙන මුහුණිනි. ඔහුගේ කටහඬෙහි එවැනි වේලාවල ආඩම්බර ගතියක් වී යැයි කිසිවකුට සිතෙනු ඇත.

"හැබෑටම උඹට කීයක් විතර ගියා ද 'යි එසේ කතාවට වැටෙන එකකු ඔහුගෙන් ඇතැම් විටක අසයි."

එවිට ඔහුගේ ස්වභාවයෙන් කුඩා දෙනෙත් තවත් කුඩා වෙයි. ඒවා දීප්තියෙන් දිලිසෙන්නට පටන් ගනී. ඔහු මඳක් කල්පනාකාරී ව සිට ඇද පැද උත්තර දෙන්නේ ඒ සියල්ල ගැන මතක් වීම ඔහුගේ සිතට ප්‍රීතිය ගෙන දෙන කරුණක් නිසා විය හැකිය.

"මේකට සෑහෙන ගණනක් ගියා. ටිකක් ඔය පේන්ට් එක නරක් වුණාට පැදීම. අනික් ඒවා එහෙම බොහෝම හොඳයි."

එහෙනම් රුපියල් හතළිහක් වෙන්න ඇති. පිටින් බැලුවම නම් වැඩි ඔපයක් නැහැ.

ඔව් එව්වර විතර ගියා යි කී ඔහු නිශ්ශබ්ද වෙයි. කෙසේ වුව ද තමා සමඟ පසුව කී කියමන ඔහුගේ සිත නොගනිය.පිට ඔපෙන් මොන වැඩක්ද මම කොහොමත් ඉන්නෙ මේකෙ අලුත් පේන්ට් එකක් ගාලා අලුතෙන් කෑලි දමන්නයි ඉක්බිති ව පිළිතුරු දෙන ඔහු කඩය ඇතුළෙන් ගෙනා සිගරැට් ටින් එකෙහි වූ තෙල් ලාම්පුවට වත්කරයි.

හා, උඹට මොකෝ රෑ වුණාට බයිසිකල් එකෙන් යන්න බැරියැයි ඔහු මෙසේ කරනු දුටු කඩය ඇතුළෙහි වූ කිසිවකු කියන්නේ හඬනගා සිනහවෙමිනි. ඔවුන් සියල්ල ම තමන් උපහාසයට ලක් කරමින් මෙන් සලකනු ලැබීම ගැන සියදෝරිස් කිසිවිටක නො තැකුවේ ය. ගෙදරින් පිට දී නෝන්ජලයකු වූ ඔහුට බොහෝ දෙන මෙසේ සැලකුවේ ඔහු තුළ සහජයෙන් ම වූ දුර්වලකමක් නිසා විය හැක. එළලු පැහැති මුහුණක් හා දුඹුරු පැහැති හිසකේ ඇති ඔහු වයසින් අවුරුදු තිස් පහක් පමණ නමුදු, එතරම් වයසක් ගිය කෙනෙකු ලෙස නොපෙනෙයි. ඔහු දෙස බැලූ කිසිවකුට එසේ නොපෙනෙන්නේ, වයසට නොගැළපෙන බැගෑපත් පෙනුමක් ඔහුගේ මුහුණෙහි වු බැවිනැයි සිතමි. ඔහුගේ මුහුණෙහි මෙන්ම කටහඬෙහි ද ඒ බැගෑපත් බව මැනවින් දක්නට ලැබිණ. තමාට වඩා උසස් එකකු හා කතා කරන විට ඔහු ඉඳහිට නවත්වමින් ද, සෙමෙන් ද, එක්තරා බිය ගතියකින් ද යුතු ව කතා කෙළේය.

තමා කියන දෙයෙහි තමාට පවා විශ්වාසයක් නැතැයි යන අදහස ඔහුගේ කතාව ඇසුවකුට නිතැතින්ම සිතේ. මේ බැගෑපත් බව ඔහුට සහජයෙන්ම ආ දෙයක් නැත්නම් බොහෝ කලක් අනුන් යටතෙහි වැඩ කිරීම නිසා ලැබූ එකක් දැයි කීම පහසු නො වේ. ඔහු පසුගිය අවුරුදු කිහිපය තුළ කළේ අනුන්ගේ රබර් වත්තක් බලා ගැනීම ය. අක්කර දහයක් පමණ වූ එහි රබර් කිරි කැපීම මෙන් ම වෙන නොයෙක් කටයුතු කිරීමට ද ඔහුට සිදු විය. රබර් ගස් තව ම සම්පුර්ණයෙන් වැඩී නැති බැවින් තව කල් යන තුරු කන්දෙහි වල් පැළෑටි සුද්ධ කිරීම, ගල් වැටී දැමීම ආදි නොයෙක් වැඩ ඇතැයි ද ඊට තමාගේ මුළු ජීවිතය ම ගෙවෙනු ඇතැයි ද ඔහු ඇතැම් මොහොතක කල්පනා කෙළේ ය. උදේ සිට සවස් වන තුරු වැඩ කළ ද එහි වැඩ සම්පුර්ණයෙන් නිම නොවන්නේ තමාත් බිරිඳත් පමණක් එහි වැඩ කරන නිසා විය යුතු යැයි ද ඔහුට සිතිණ. ඔහු සිය පවුල හා ජීවත් වූයේ කන්ද පාමුල වූ මැටියෙන් සාදන ලද කුඩා ගෙහි ය. එය පාරෙන් මඳක් ගොඩට වන සේ සෑදුවකි. එහෙත් එහි ගෙමිදුලෙහි මෙහා කොනට පැමිණි විට පාරත් එය වරෙන ඇල අද්දරින් ද වරෙක වෙල් අද්දරින් ද දිව යන සැටිත් බලාගත හැක. සියදෝරිස් ගෙයි පිටුපස වූ කන්දෙහි වැඩ වේලාසනින් නිමකොට පැමිණි ඇතැම් සැන්දෑවක ගෙමිදුල කොනෙහි පාර දෙසට ඇල වි තිබුණු පොල් කඳ මත වාඩි වී සිය දරුවන් සුරතල් කෙළේ ය. එය පුදුම ලෙස නැවුණු පොල් ගසකි. එහි මුල කොටස අඩි කීපයක් යන තුරු පොළොව හා සමාන්තරව වැඩී තිබුණේ ය. ඉන් පසු ව එය අහස දෙසට වැඩී තිබුණේය. පොල්කඳ මත වාඩි වී සිටි ඔහු, දරුවන්ගෙන් බාලයා උකුලට ගෙන ඈත සිට එන පාර ද, ඇතැම් විටක ඈත වූ වෙල් හා කඳු ගැන ද කතා කෙළේය.

ආන්න පුතා අන්න අර බලන්න, අන්න කවුද පාර දිගේ එනවා. අන්න දැක්කයි අර බයිසිකලෙන් එන්නේ. අර ලොකු රෙදි මිටියකුත් පිටි පස්සේ බැඳගෙන .........ආන්න බලන්න.

එවිට උකුලෙහි වූ කුඩා දරුවා ඔහුගේ පපුවට පයක් ගසා ඔහුගේ නැහැයෙන් හෝ උඩු තොලෙන් ඇද්දේ ය. ඇතැම් විටක කටෙි අත දැම්මේය.

අන්න බලන්න බයිසිකලේ රෝද කරකැවෙන හැටි ආන්ත රූං ගාල වංගුව කැපුව................................. දැන් ඒවි කඩේ ගාවට. රූං ගාලා

දරුවා ඔහු කී සියල්ල තේරුම් ගත්තාක් මෙන් උකුල උඩ නටමින් කෙළ බේරයි.

අර බලන්න පුතා තාත්තටත් ඒ වගේ‍ බයිසි කලයක් ඇත්නම් පුතත් වාඩි කරවගෙන රූං කියල යනව නේ යි කී ඔහු දරුවා උස්සා සිය මුහුණට ළං කොට ඌ - ඌ - ඌ - ඌ කියමින් සිනා සෙමින් හිස සලයි.

තමා බයිසිකලයක් ගත යුතු යයි සියදෝරිස් අධිෂ්ඨාන කළේ දැනට අවුරුදු ගණනකට පෙර ය. බයිසිකලයක් නොමැති ව තම වැඩකටයුතු කිරීම ඉතාමත් අපහසු යැයි ද, එය අත්‍යවශ්‍ය යැයි ද ඔහු බොහෝ විට තමාටම අවධාරණයෙන් කියා ගත්තේ ය. බයිසිකලයක් නොමැති ව සිය වැඩ කටයුතු කෙසේ කළ හැකිද? ඔහුට උදේට සැතැප්ම දෙක තුනක් ඇවිදීමට තිබේ. ගෙයි පිටිපස වූ කන්දෙහි රබර් කිරි එකතු කිරීමෙන් පසු ඔහු ඉක්බිති ව හැතැප්ම තුනක් පමණපයින්ම යා යුතුය. හැම දින ම ගෙදරින් පිටවන විට උදේ අට පසු වී ඉවරය. එවිට පාරට සම්පුර්ණයෙන් අව්ව වැටී තිබේ. උදය නිසා තවම පාර රත්වී නැත. එහෙත් අහසට ඇරුණු පෙදෙසෙහි හිරු රැස් චණ්ඩ ලෙස විහිදී ඇත. මුවාවක් වන සේ ඒ පැත්තෙහි ගසක් කොළක් නොමැතිවීම ගැන බොහෝවිට සියදෝරිස් දොස් නැඟුවේ ය.

ගස් ටිකක් වවල තිබුණ නම් එහෙම පිටින් ම වැහෙනව නේ.මිනිසුන්ට කිසි දෙයක් තේරෙන්නේ නැහැ. එහෙත් දුෂ්කර, එහි සිට වැඩ ඉවර වූ පසු දවල් දොළහට පමණ ආපසු ඒම ය. එවිට පාර රන් කළ යවටක් සේ රත්ය. හිරු රැස් නිසා අවට දිලිසෙයි. ඉරෙහි චණ්ඩභාවය නිසා අවට වියළී ඇත. බැනියමකින් හෝ අන් කිසිවකින් ආවරණය නොවූ උඩු කය ද, හිස ද දෙපා ද එක ලෙස පිව්වෙයි.ඔහු ඇතැම් විටක තවත් දෙපා පිව්වෙනු ඉවසා ගත නොහැකි ව දුඹුරු පැහැති තණකොළ ගොන්න දිගේ ගමන් කෙළේ ය. මෙසේ දුකසේ ජීවත් වීමට වඩා ගෙදර නිරාහාර ව සිටීම යෙහෙකැයි ඔහුට එසේ ගමන් කරන බොහෝ වේලාවල සිතිණ. මෙසේ ගමන් කරන විට කිසිවකු බයිසි කලයකින් හෝ අන් කිසිවකින් යනු ඔහුට පෙනේ. ඔහු ඒ දෙස බැලුවේ ඊර්ෂ්‍යාවෙන් ඔවුනට ද තමාට ද ශාප කර ගනිමිනි. ඒ සියල්ල තමා අඩි දහයක් යෑමට ද පෙර අතුරුදන් වෙයි.

බයිසිකලයේ රෝද වේගයෙන් කැරකැවී ගොස් අතුරුදන් වන සැටි !එහි සිටින්නාට අව්වේ චණ්ඩභාවය බිඳකුදු නොදැනෙනු ඇත. ඒසියල්ල සුළඟෙහි ඉවත් වූවාක් මෙන් නො පෙනී යයි. ඔහුගේ ඊර්ෂ්‍යාව එයින් දියුණු විය. තමාට බයිසි කලයක් ගත හැක්කේ කවදා ද? ඊට තව බොහෝ කල් යනු ඇත. ඊට අඩු ගණනේ රුපියල් හතළිස් පහක් පමණ වත් අවශ්‍යවනු ඇත. ඉතිරි කරනු වෙනුවට ඔහුට බොහෝ මාසවල වැඩියෙන් රුපියල් දෙක තුනක් පමණ ණයට ගැනීමට සිදු වේ. එය ද ගත යුත්තේ දවස් තුන හතරක් නිකම් වැඩ කොට පින්දම් කීමෙන් පසුවය. එහෙත් එසේ මුදල් එකතු කොට බයිසිකලයක් ගත් විට තමා එයින් යන සැටි ගැන ඔහු කල්පනා කෙළේය. එවිට කකුල් රිදීමක්වත්, අව්වෙහි පිච්චීමක් වත්, කාලය නාස්ති වීමක්වත් සිදු නොවේ.එවිට තමන් ද අන් අය මෙන් කිසිවත් ගැන නොතකා එය පැද යනු ඇත. දැන් අව්වෙන් වේළෙන මුළු පෙදෙස ම පසු කිරීමට එවිට යන්නේ මිනිත්තු කීපයක් පමණි. බයිසිකලය වංගුවල නැමෙමින් ද, සුළඟ මෙන් වේගයෙන් ද නො පෙති යනු ඇත. එහි රෝද දෙස බලා සිටින්නකුට ඒවා පොළොවට උඩින් යන්නාක් මෙන් පෙනෙනු ඇත. ඒ ගැන සිහි කරන ඔහුගේ සිත ප්‍රීතියෙන් නටයි. ඔහුට දුක් මුසු වර්තමානය ද එවිට අමතක වේ. තමා බසිසිකලයක් පැදගෙන රූං කියා යන සැටි ද ඈත සිට බලන්නකුට පුදුමයක් මෙන් එය වංගු ආදියෙහි නැමෙමින් නිමේෂයකින් නැති වී යන සැටි ද ඔහු තමාගේ සිතෙහි මවා ගත්තේ ය. වේගයෙන් යන ඇතැම් මොහොතක දුවිල්ල වලාකඩක් මෙන් එය වසා පැතිරෙනු ඇත. ඒ සියල්ල කෙතරම් රමණිය ද ?

රුක්මල්ගොඩ සිට බොහෝ වෙහෙස වී පැමිණි ඇතැම් දිනයක ඔහු සිහිනෙන් දුටුවේ ද මෙවැනි දේය. බොහෝ හිරිහැර විඳිමින් සිටින තමාට හදිසියේ බයිසි කලයක් හමු වී තිබෙනු ඔහු දුටුවේ ය. එය වඩා අලුත් බයිසිකලයක් නොවුව ද එහි ගාන ලද පාට නිසා එහි දිස්නයක් තිබුණේ ය. එහි ලේබලයේ වූ සිංහයාගේ රූපය රත්රන් පාටින් බැබලුණේ ය. එහි රතු පාට සීට් එකක් විය.රතුපාට සීට්එක ඔහුගේ සිත ගත්තේය. බයිසිකල් සීට් සියල්ල ම රතු පාට විය යුතු යැයි ද ඔහු කල්පනා කෙළේ ය. ඉක්බිති ව තමා එහි නැඟී යන සැටි ද ඔහු දුටුවේ ය. බයිසිකලය පාරෙහි පමණක් නොව කඳු අතර ද වෙල්වල ද, වරක් ඒ දණ්ඩක් දිගේ ද වේගයෙන් ගියේ ය. මෙසේ යන අතර එය හදිසියේ නැවතුනාක් මෙන් ඔහුට දැනිණ. කවුදෝ පිටුපසින් වේගයෙන් තල්ලු කෙළේ ය. බයිසිකලය ද ඔහු ද දඩස් ගා ඇළට ඇද වැටෙයි. එවැනි මොහොතක ඔහු බියෙන් හා ශෝකයෙන් කම්පිත වෙමින් නැඟිට්ටේය. එහෙත් ඒ ගැන ඔහු පසු දින ද සන්තෝෂ විය.

උදේ නැඟිට තේ වතුර බොන අතර ඔහු ඒ ගැන සිය බිරිඳ සමඟ ද කීවේය.

දන්නවද, මම ඊයෙ හීනෙන් දැක්ක බයිසිකලයකින් යනවා. ඒක හොඳ අගේ ඇති අලුත් බයිසිකලයක්.... ඒ ........... පස්සෙ මමත් ඒකත් එක්කම ඇළට වැටුණා.

ඔහුගේ බිරිඳ ඔහුගේ සිතෙහි ස්වරූපය නො හඳුනයි.

ඔය සෙම් කෝප වෙලා වෙන්න ඇති. වතුර පෙනෙන්නේ සෙම් කෝප වුණාම. ටික දවසකටවත් හේනෙ වැඩ නවත්වන්න හොඳයි. මුළු දවසෙම ගිනි කට්ටෙට පායලා හැන්දෑවට වහිනව. ඕකෙන් තමයි සෙම් කෝප වෙන්නෙ. මාත් දැක්ක පෙරේදා හැන්දෑවේ වතුර ගලලා තියෙනවා.

ඔහුගේ බිරිඳ ඔහු හා කුලුපග බවෙන් යුතු ව කතා කරන්නේ කලාතුරකිනි. සාමාන්‍යයෙන් ඔහු සිය බිරිඳට සැලකුවේ තද පරුෂ ගතියෙනි. ඈ ගෙදර වැඩ කිරීමට ද දරුවන් හැදීමට ද නොදත් මෝඩ ගැහැනියකැයි ඔහු බොහෝ විට කීවේ ය. තමා ගෙදර එනතුරු කෑම නො උයා හෝ දරුවන්ට කෑම නො දී තිබුණ ඇතැම් දවසක ඔහු ඈට තැලුවේය. තමාට ඈ බයෙන් හා ගෞරවයෙන් යුතු ව සලකති යි යන හැඟුම ඔහුගේ ප්‍රීතියට කරුණක් විය. ඈට හුඟක් මෝඩ ගති ඇත්තේ ඈ ස්කෝලයෙන් තුන් වෙනි ප්‍රමාණය දක්වා ඉගෙන ගත් බැවිනි. ස්කෝලේ ඉගෙන ගැනීම ගෑනුන්ට හොඳ නැහැයි ඔහු බොහෝ විට සිතුවේ ය. එසේ වුවද ඈ ඔහු සිතන තරම් මෝඩ තැනැත්තියක නො වූවා ය.

ඒක නොවෙයි මට බයිසි කලයක් ලැබෙන්න වෙන්න ඇති.ම. දැනට මාසෙකට විතර ඉස්සෙල්ලත් තීනෙන් දැක්කය. ලේ වල බයිසි කලයක් විකුණන්න තියෙනවලු යි ඔහු කීවේ බිරිඳට තමා කියන කිසිවක් නො තේරෙති යි යන හැඟුමෙන් යුතු වය.

බයිසිකලයක් ගන්න ඕන වුණාට කොහේ ද සල්ලි තියෙ මම ඊයේ රුපියල් දෙකක් ණයට ඉල්ලාගෙනයි සමුපකාරෙන් බඩු ගෙනාවේ. ගිය මාසයේ මද්දුම මහත්තයගෙන් ගත්තු ණයත් දෙන තියෙනවා.

උඹට මක්කටද සල්ලි වගක්. මට තව රුපියල් දහයක් තියෙනව නම් බයිසිකලේ ගන්න හැටි මං දන්නවායි ඔහු පිළිතුර වශයෙන් අහංකාර ලීලාවෙන් කීවේ ය. ඉක්බිති ව ඔහු කිසිවක් මතක් වූවාක් මෙන් ගේ තුළට ගියේ ය. එය කුඩා ගෙයක් වුව ද එ කාමරයක් තිබේ. එය මැද සාලය දෙකට වෙන් කිරීමෙන් සාදන ලද්දකි. ඊට තිබුණේ එක් ජනේලයකි. කෝටු හරහට හා දිග බැඳීමෙන් ආවරණය කොට තිබීම නිසා ඉන් ඇතුළු වූයේ ආලෝකයකි. ජනේලය අසල බිත්තියෙහි කුප්පියක් ගසා තිබුණේ ය ඊට උඩින් අවුරුදු ගණනක දැලි බැඳී තිබිණ. බයිසිකලය ගත් විට එය මෙහි තැබිය යුතු යැයි ඔහු මුල සිට ම කල්පනා කෙළේය. ඊට ඉබ්බෙක් දැමිය හැකි දොරක් වූ බැවින් එය ඊට සුදුසු ය. සාලයෙහි අනික් කොටසෙහි ඇඳක් තබා තිබුණේ ය. ඇඳෙහි තෑන්දට රෙද්දය දමා නො තිබුණේ ය. එහි රාත්‍රියට ඔහුගේ පටිය ද, ලේන්සුව ද දරුවන්ගේ රෙදි කැබලි ද දමනු ලැබේ. ඇඳ අසල වූ මේසයට උඩින් බිත්තියෙහි කවි කොළයක් ද, නූල් බෝලයක මුද්දරයක් ද, පාට ඡන්ද කොළයක් ද අලවා තිබුණේ ය. එහි යූ. ඒ. කුලතිලක වෙද රාළහාමිට ඡන්දය දෙමු යි රතු අකුරින් ලියා තිබුණේ ය. මේසය අසලට පැමිණි ඔහු ඉණෙහි සඟවා තිබූ යතුර ගෙන එය ඇරියේ ය. වටපිට බැලූ ඔහු එහි තබන ලද සිගරට් ටින් එක සෙමෙන් එළියට ගෙන ගණින්නට විය. එහි ඇත්තේ අවුරුදු දෙක තුනක පමණ සිට ඔහු ඉතා අමාරුවෙන් එකතු කරන ලද මුදල් ය. හැම දිනම පඩි හම්බ වු දිනයෙහි ඔහු එහි ශත පනහේ කාසියක් හෝ රුපියලක් දැම්මේ ය. එය එහි වූ බව බිරිඳ හෝ අන් කිසිවකු නො දනියි. බිරිඳ එය දුටුවා නම් කිසි විටක එය ඉතිරි කරගත නොහැකි යැයි ද ඔහු සිතුවේය. සෙමෙන් වට පිට බලමින් ගණන් කළ ඔහු ඒවා යළිත් එහි දමා ලාච්වුව යතුරු ලා වැසුවේය. රුපියල් තිස්පහයි. තව රුපියල් දහයක් ඇත්නම් යි කාමරයෙන් එළියට පැමිණි ඔහු තමාට ම කියා ගත්තේ ය.

මෙසේ මාස කීපයක් ගත වන්නට ඇත.

පසුගිය ඔක්තෝබර් මාසයේ රබර් මිල බෙහෙවින් නැංගේය. ඒ මාසයේ අන්තිමෙහි සියදෝරිස්ට රුපියල් දහයක් වැඩියෙන් ලැබුණේ ය. එදින ඔහු ගෙදර ආවේ ඊට පෙර කිසි විටක නො වූ ප්‍රීතියකින් යුතුව ය. ගෙදර එන අතර ඔහු කඩයට ද ගොඩ නැංගේ ය. තමාගේ අභිමතාර්ථය ඉෂ්ට වන අයුරු දකින ඔහුගේ සිත ප්‍රීතියෙන් උදම් වෙයි. ඔහුට ඒ ගැන කඩයෙහි දී කතා කිරීමට වුවමනා විය. එහෙත් කිසිවෙකු ඒ ගැන යමක් සිතති යි බියෙන් ඔහු එය කෙළින් ම නො කීවේ ය.

හෙට ලේල්වලට යන බස් එකක් තියෙන්නේ කීයට ද යි ඔහු කඩයෙහි වුවකුගෙන් ඇසුවේය.

කොයි වෙලාවටත් තියෙනවා. යන්නද ?

'ඔව් මට වුවමනාවක් තියෙනවා.

ඉක්බිති ව ඔහු එහි වූ කිසිවකු සමඟ පොදුවේ බයිසිකල් ගැන කතා කරන්නට විය.

මහත්තය හැබෑට ම රැලේ ද හොඳම බයිසිකල් ජාතිය?

ඔව් එහි වූ තැනැත්තා නුවමනාවෙන් මෙන් පිළිතුරු දුන්නේය.

ඔව් මාත් හිතනවා ඔය හම්බර් හර්කියුලිස් බයිසිකල්වලට වැඩිය පරණ උනත් රැලේ බයිසිකලය හොඳයි. මහත්මයා ළඟ තියෙන්නේ රැලේ බයිසිකලයක්ද?

නැහැ.ඒක හම්බර් එකක්. රැලේ එක ඊට වැඩිය හොඳයි.

එයින් ඔහුගේ සිත ප්‍රීතියෙන් ඉපිලෙන්නට විය. රැලේ බයිසිකල් ගමේ වැඩි දෙනෙකුට ද නොමැත. එයින් අලුත් එකක් ඇත්තේ තමාගේ ස්වාමියාට පමණකි. එය ගත් අලුත බොහෝ දෙන ඒ ගැන කථා කළ සැටි ඔහුට මතකය. තමාට රැලේ බයිසිකලයක් ගත් විට ඇතැම් විටක ඒ ගැන කථා කිරීමට ද බැරි නැත.

එදින ගෙදර ගිය ඔහු බිරිඳ සමග ද කථා කළේ උඩඟු ලීලාවෙනි. ඔහු ගෙදර වූ කාමරයේ පැත්තක් අස් කෙළේ ය. කොනක වූ පැදුරු සහ බංකුවක් ද පැත්තකින් තැබූ ඔහු එහි බයිසිකලයක් තැබීමට සෑහෙන ඉඩ තරම් තුන් හතර ගුණයක් එළිකළේ ය. එදින රාත්‍රි නිදා ගැනීමට ගිය ඔහු බිරිඳට තමාට උදයෙන් අවදි කරන ලෙස ද කීවේ ය.

හෙට උදෙන්ම කුද්දන්න ඕන. මට ලේල් වලට යන්න නියෙනවා.

මොකට දැයි මඳක් නිශ්ශබ්දව සිටි බිරිඳ ඇසුවාය.

ලොකු උවමනාවක ........මට වරද්දන්නෙ නැතුව කුද්දන්න ඕන. හෙට උදේට වහින එකක් නැහැ නේද?

කියන්න බැහැ. මේ දවස්වල ටික ටික වහිනවා. අද හවස මීදුම තිබුණ නිසා මීට පස්සෙ ඉඳල මගේ හිතේ පායන්න පටන් ගනීවී යි බිරිඳ පිළිතුරු දුන්නාය. ඔහු වෙනදාට වඩා සෞම්‍ය ලෙස කථා කරනු ඇසීම පුදුමයට හේතු විය.

මෙයාට වැඩියෙන් රුපියල් දහයක් හම්බ වුණා ය කියන්නේ ඇත්තද? අද මද්දුම මහත්මයා එහෙම කිව්වා

මොන බොරු ද? ඒක බොරුවක්.

එහෙනම් මම කියන්න හිටියේ හෙට ලේල්වල ඉඳල එනකොට මටත් හැට්ට රෙදි ගේන්නය කියන්න. මේ දරුවන්ටත් අඳින්න මොකවත් නැහැ. මම ඊයේ රුක්මල්ගොඩින් පරණ පොඩි ගවුමක් ඉල්ලගෙන ආවා.

පසු දින උදයෙහි ලේල්වල ගිය ඔහු ආපසු පැමිණියේ බයිසිකලයෙනි. එවිට ඔහුගේ සිතෙහි වූ ප්‍රීතිය කෙතරම් ද යත් ඔහු කීපවිටක් ඇදගෙන වැටීමට ද ගියේ ය. වෙනදා පයින් පසු කළ පෙදෙස් පසු කළ ඔහු එදෙස බැලුවේ මහත් අහංකාර ලීලාවෙනි.

පෙරට යන සැටි ද ඇතැම් වංගුවක දි එය තමා සමඟ ම නිමේෂයකින් ඇලවී යන සැටි ද දකින ඔහුගේ සිත ප්‍රීතියෙන් වියරු වැටෙන්නාක් මෙන් වෙයි. ඇතැම් තැනක දී ඔහු හිස කෙළින් කොට බයිසිකලය වේගයෙන් පැද්දේ ය. ඔහු කඩ මණ්ඩිය පසු කර යනු දුටු කීපදෙනෙක් සිනහ වෙමින් ඇතැම් දේ කීහ. අද සියදෝරිස්ට නින්ද යාවියි ඉන් ඇතමකු කියනු ඔහුට ඇසිණ.

එදින ඔහු ගෙදර එන විට සවස් වීමට ආසන්න වී තිබුණේ ය. ඔහු බයිසිකලයෙන් එනු දුටු ඔහුගේ බිරිඳ පුදුම වූවාය.

මෙයා උදෙන්ම ගියේ බයිසිකලයක් ගෙන්න දැයි ඈ දෑස ඇදහිය නොහැක්කක් මෙන් ඇසුවා ය.

ඔව් මෙන්න උඹටත් හැට්ට රෙද්දක් ගෙනාවා' යි ඔහු මෙතෙක් ඉණෙහි ගසාගෙන තිබුණු රෙදි කැබෙල්ල ගෙන ඈට දුන්නා ය. වහා බිඳී යන කිසිවක් ගන්නාක් මෙන් එය ගත් ඇගේ මුහුණ ප්‍රීතියෙන් ඉතිරෙන්නට විය. මං අද ලේනහතු වගයක් හැදුවා යි ඉක්බිති ව ඈ කීවේ ඔහුගේ සිත තවත් සතුටු කරවන අටියෙනි. ඔහු ලේන හතු කෑමට ප්‍රිය බව ඈ දනී. තේ වතුර බීමටත් පෙර සියදෝරිස් බයිසිකලය මිදුලට ගෙන පිස දමන්නට විය. ඇඳිරි වැටෙන තුරු ඔහු එය සෙමෙන් සීරුවෙන් ද පිස දැම්මේය. ඔහුගේ දරුවෝ ඔහු අසලට වී එදෙස බලා සිටියහ. බයිසිකල් රෝදයෙහි ස්පෝක් ඇල්ලීමට ඉන් එකකු තැත් කළ විට ඔහු වහා වළකාලුවේය.

උඹලා මේව අල්ලන්නේ නැතුව බලාගෙන ඉඳපල්ලා. පැය දෙකක් පමණ පිසදා ඉවර කළ පසු ඔහු එය රැගෙන ගොස් කාමරයෙහි තැබුවේ ය.

එදින රෑ නින්දට ගිය පසු ද ඔහු කථා කළේ ඒ ගැනය. අඳුරෙහි වැතිරී සිටි බිරිඳ ඔහුගේ කථාව අසා සිටියාය.

රැලේ බයිසිකල් වැඩිය නැහැ. මේ ගමේ වුණත් තියෙන්නේ බොහොම ටිකයි. ඔහු ඈට සියල්ල විස්තර කිරීමට මෙන් කීවේ ය. ඔහුගේ කඩ හඬෙහි මොළොක් ගතියක් තිබුණේ ය. එය ඈ තුළ වූ ප්‍රීතිය දියුණු කරන සුලුවිය.

අර දෙවර ගෙදර තියෙන්නේ මොන බයිසිකලයක් දැයි ඈ ඔහුගෙන් ඇසුවාය.

ඒක රැලෙ බයිසිකලයක් නෙවෙයි. වෙන මොකක් ද එකක්

ඒකෙ ඉස්සරහ කණ්ණාඩි තියෙන්නේ මොකටද? අපේ බයිසිකලේ එහෙම නැහැ නේද?

ඈ බයිසිකල් ගැන කථා කරනු ඇසීම ඔහුගේ ප්‍රීතියට හේතු විය.

ඈ ඒ තරම් මෝඩ නැතැයි ද ඔහුට සිතුණේ ය. ඔහු ඒ සියල්ල ද බයිසිකල් ගැන විස්තරයක් ද ඈට කීවේය.

මේක මම හේනට යන කොට කාමරේ දාල දොර වහල යතුරු දලයි යන්නේ. ඒකට පුංචි ඈයින්ට කිට්ටු වෙන්න දෙන්න එපා.ඒ මොකෝවෙන මොකට වත් නෙවෙයි, උන් ඒව මේව නැති කරලා හුරලා දාවි. ඒ වගේම කවුරුත් ඉල්ලුවොත් කියන්න ඕන ඒක නරක් වෙලා කාමරේට දාල ය කියල. එහෙම නැතුව බේරෙන්න බැහැ.

ඈ ඔහු කී සියල්ල අනුමත කළාය.

ඉන්පසු සියදෝරිස් ජිවිතයේ ප්‍රධාන කාර්ය ලෙස සැලකුවේ තමාගේ බයිසිකලය රැක බලා ගැනීම ය. ඔහු එය දිනපතා දෙතුන් වරක් පිස දැම්මේ ය. ගමනක් ගොස් ආපසු පැමිණි විගස ඔහු පළමුවෙන් ම කළේ එය පිසදා කාමරයේ තැබීම ය. ඔහු තම දරුවනට ඊට අත ගැසීමට හෝ ඉඩ නුදුන්නේය.

වරක් ඔහුට රුක්මල්ගොඩ දී බයිසිකල් පිළිබඳ කොළ වගයක් සම්බ විය. ඒවා එහි වූ රැලේ බයිසිකලය ගනිද්දී දෙන ලද පත්‍රිකා ය. ඔහු ඒ පියල්ල ගෙදර ගෙනාවේ ය. ඔහුගේ ගෙදර ඉස්සරහ බිත්තියේ සීවලී පින්තූරයක් ද, ජෝර්ජ් රජ්ජුරුවන්ගේ හා බිසොවගේ කැලැන්ඩරයකින් කපාගත් පිංතූරයක් ද අලවා තිබේ. ඔහු තමා ගෙනා කොළද ඒ අසල ම ඇලවූයේ ය. ඉන් එකක වූ කොට කලිසමක් හා කමිසයක් වැනි කිසිවක් හැඳගත් තරුණියක් බයිසිකලයක් අල්ලා ගෙන සිටිනු දක්වන රූපය ඔහුගේ සිත ඇද ගත්තේය.

කාමරයට යෑමට තම දරුවට ඉඩ නොදුන්න ද බයිසිකලය ඔවුන්ගෙන් ප්‍රවේසම් කරගත හැකිවූයේ ඉතා අමාරුවෙනි. දිනක් ඔහු දහවල හේනේ සිට ගෙදර පැමිණියේ ය. එදින ඔහුට බයිසිකලය වූ කාමරය යතුරු දා යෑමට නොහැකි විය. ඔහු ගෙදර එනවිට ඔවුන් සියලු දෙන ම රෝදය කරකවමින් ද, අඟුරු කැබෙල්ලකින් එහි නොයෙක් දේ අඳිමින් ද සිටියහ. එය දුටු ඔහුගේ කෝපය නිම්හිම නැති විය. ඔහු වහා ගොස් ඔවුන් ඇදගෙනවුත් කාමරයෙන් දෙට්ට දම්මේ ය. ඉක්බිති ඔහු බිරිඳට කථා කෙළේය.

මම නැතිවුණාම උඹට බැරි ද මේ කාමරේ දොර වහල තියන්න. මං නැත්නම් මේකෙ කිසිදෙයක් කෙරෙන්නෙ නැහැ බිරිඳ කථා නොකර සිටියා ය. ඔහුගේ කෝපය දියුණු විය. ඔහු ඈ අසලට පැමිණ ඇගේ බෙල්ලෙන් අල්ලා තල්ලු කෙළේය. තොට මේකෙ අගේ තේරෙන්නේ නැහැ. මං අවුරුදු ගණනක් හම්බු කරල ගත්තු දේ පරිස්සම් කරන්න තොට ඕනකමක් නැහැ ඔහුගේ කටහඬ කෝපයෙන් දෙදරුම් කෑවේය.ඉක්බිතිව ඔහු බයිසිකලය සම්පුර්ණයෙන් පිසදා කාමරයෙහි දමා දොර අගුලු ලෑවේය.

ඔහු බයිසි කලය පාවිච්චි කළේ ද හැම දින මනොවේ. ඇතැම් දිනයක මුළු රාත්‍රිය වැස පාර බෙහෙවින් මඩ වෙයි. පාරෙහි තැනින් තැන විශාල මඩ වළවල් සෑදේ. කරත්ත යෑම නිසා සැදුණු ඇලිවල මඩ වතුර එක් වී තිබේ. පාර දෙපසෙහි තණ කොළ අසල ද දුඹුරු පැහැති මඩ නිසා එරෙයි. එවැනි දිනයෙක ඔහු බයිසිකලය කාමරයෙන් එළියට නොගත්තේ ය. එදින ඔහු රුක්මල් ගොඩ ගියේ ද පයිනි. එසේ යන ඔහු දුටු එකකු ප්‍රශ්න කරන්නේ තමා කාරණය සම්පුර්ණයෙන් නොදන්නා නිසා නොවේ.

මොකෝ සියදෝරිස් අද පසින් ම!

නැහැ. මම බයිසිකලය ගෙදර තියල ආව.

එහෙනම් පැව් එකක් වෙන්න ඇති යි කී එසේ ඇසූ තැනැත්තා හඬ නඟා සිනහවෙන්නේ තමා සියල්ල දන්නා බව හඟවනු පිණිස ය.

කල්යත්ම සියදෝරිස්ට බයිසීකලය පිළිබඳ තම සිතෙහි වූ ඇල්ම දියුණු විය. දැන් වෙනදා මුළු දවස ම යන වැඩට ඔහුට යන්නේ පැය කීපයකි. බයිසිකලයෙහි නැඟී වෙනද පයින් පසු කළ පෙදෙස් කුරුල්ලෙකු මෙන් වේගයෙන් පසු කර යන විට ඔහුගේ සිත ප්‍රීතියෙන් ඉපිළෙයි. ඔහු ඇතැම් මොහොතක තමාට අයිති වූ භාග්‍යය ගැන සිහිකර ප්‍රීති විය. ඔහු ඒ ගැන නොයෙක් දේද සිතුවේය. මිනිසුන්ට මේ ජාතියේ වැඩ කරන්නේ ගිය ජාතියේ ඔවුන්ගෙන් ණය ගත් උදවිය ය. බයිසිකලය ද ගිය ජාතියේ තමාගෙන් විශාල ණයක් ගත්තෙකු විය හැක. ඔහු මේ ගැන වරක් බිරිඳ හා කී විට ඈ ඔහු හා වාද කළා ය. බයිසිකලයට ගිය ජාතියේ පණක් තියෙන්නේ කොහොම දැයි ඈ ඇසුවා ය.

උඹ දන්නේ නැහැ. ගස් ගල්වලටත් පණ තියෙනවා. බුදු හාමුදුරුවෝ හාමුදුරුවරුන්ට තණ කොළ ගහක් වත් කඩන්න එපැයි කියල තියෙන්නෙ එ්කයි. අපේ කුඹුරු වතු පිටිවලට පණක් නැත්නම් එව අපිට හරිහම්බු කරල දෙන්නේ කොහොමද? ඒවාටත් අපිට වගේ නැති වුණාට පණක් තියෙනවා.

එය තමාගේ භාග්‍යය උදා කළේ යැයි ද ක්‍රමයෙන් සියදෝරිස්ට සිතෙන්නට විය. දැන් ඔහුගේ වතුවල පලදාව වැඩිය. ඔහුගේ කොරටුවෙහි මේ වාරයේ කෙසෙල් කැන් කීපයක් පිට පිට වැටුණේ ය. ඔහු එළි කළ කොටසෙහි ගොයම ද මේ වාරයේ බෙහෙවින් සාර වී තිබේ. දැන් එහි කරල් රන් පැහැ ගැන්වී පොළොව දෙසට බර ව ඇත.

මෙසේ මාස කීපයක් ගත වී ගියේ ය.

දැන් රබර් ගස්වල කොළ හැළෙන කාලය ය. කොළ හැලුණු රබර් ගස් පාළු මලානික ගතියකින් යුතු ව අහස දෙසට ඇරී තිබේ. රබර් ගස්වලට පෝර දමමින් මුළු දවස ම ගෙවන ඔහුට නග්න වූ අතුරිකිලි පාළු ගතියකින් යුතු ව නිල් පැහැති හිස් අහස පසුබිම් කොට නැඟී සිටින සැටි පෙනේ. දවල් කාලයෙහි තදින් පායයි. හවස් වන විට වැහි ලිහිණියෝ හඬ දෙති. උදේ සිට සවස් වන තුරු පෝර දැම්ම ද, ඉවර කළ හැක්කේ කුඩා කොටසකි. සවස පෝර දැමීමෙන් පසු පසු දින දැමීම සඳහා පෝර ගෙනෙනු පිණිස රුක්මල්ගොඩ යායුතුය.

දිනක් සවස ඔහු පෝර මිටිය බයිසිකලයෙහි බැඳ තබා එය පාර අයිනෙහි නතර කොට කිසියම් වුවමනාවක් සඳහා කඩයට ගොඩනැංගේ ය. බයිසිකලය වූයේ පාර අද්දර ය. කඩය තුළ මුදල් වගයක් ගෙවමින් සිටි ඔහුට කිසිවක් දඩස් ගා මහ හඩින් ඇද වැටෙනු ඇසිණ.

ඔහු වහා පාර දෙසට දිව්වේ ය. එය තමාගේ බයිසිකලය විය යුතු යයි ඔහුට අනුමානයෙන් සිතිණ. ඔහුගේ ඇඟ වේගයෙන් ගැහෙන්නට වූවා සේ ඔහුට දැනුණේ ය. පාරෙහි බයිසිකලය පෙනෙන්නට නොවීය. ලොරියක් ඈත වේගයෙන් පාලම පසුකොට යනු පමණක් ඔහුට පෙනිණ. වහා පාලම අසලට පැමිණ බැලූ ඔහුට සිය දෑස ඇදහිය නොහැක්කාක් මෙන් විය. ඔහුගේ දෙඇස වහා විවෘත විය.

දෙකම්මුල්හි මස්පිඩු ලේ පැහැ ගැන්විණ. හදවතෙහි ගැස්ම ඉවසීය නොහැකි තරම් වේගවත් විය. ඔහුට ඉබේට ම කෑ ගැසිණ.

බයිසිකලය වූයේ පාලම යට ඇලෙහි ය. සිදු වූයේ කුමක් දැයි නොතේරුණාක් මෙන් ඔහු සැලෙන හදවතින් යුතු ව එදෙස බලා සිටියේ ය. ඔහුට සිහිඑළවා ගතහැකි වූයේ ද මෙසේ ස්වල්ප වේලාවක් ගල් ගැසී සිටීමෙන් පසුවය.

එහි අවට වුවෝ ඔහු හා සමඟ එක් ව, ඇළට බැස බයිසිකලය ගොඩ ගත්හ. එහෙත් එහි ඉතිරි වූයේ කැබලි පමණකි. බයිසිකලයෙහි ඉස්සරහ රෝදය සම්පූර්ණයෙන් නැමී බිඳී ගොස් තිබිණ. පස්ස රෝදය ඇළෙහි කනු අතර පටලැවීම නිසා ගත හැකි වූයේ බොහෝ වේලාවක් -ඇදීමෙන් පසුවය. එහි කිසිවක් ඉතිරි වී නො තිබිණ.

කල්පනා විරහිත ව මෙන් එදෙස බලා සිටි ඔහු එතැන නොරැඳී ගෙදර දෙසට ගියේ ය. මගදී ද අවුල් කල්පනාවේ වැටී සිටි ඔහුට කිසිවක් ගැන සිතිය නොහැකි විය. ඔහුගේ සිතෙහි වූයේ හිස් බවකි. හැඟීමෙන් වියවුල් වූ එය වියරු වැටීමට ආසන්න එකකුගේ මෙන් අරමුණෙන් තොර ව වේගයෙන් ක්‍රියා කෙළේ ය. කථා කිරීම හෝ කල්පනා කිරීම ඔහුට රුචි නොවීය.

ඔහු ගෙදර එන විට රෑ බෝවීමට බෙහෙවින් ආසන්න වී තිබුණේ ය. ගෙමිදුලට පැමිණි ඔහු පොල්කඳ මත වාඩි වී අහස දෙසට විහිදු දෑසින් යුතුව බලා සිටියේ ය. ඔහුගේ මුහුණෙහි වූ රත් පැහැය ඒ වන විට වැඩි වී තිබිණ. ඔහු කල්පනා විරහිත ව එදෙස බොහෝ වේලා බලා සිටියේ ය. සැඳෑ අඳුර සෙමෙන් ගෙමිදුල අවට ද වසා පැතිරී ගෙන එයි. තද රත් පැහැයට හා දම් පැහැයට හුරු වූ වලාකුළු කීපයක් ඈත පාළු වෙල්යායක් උඩින් පාවෙමින් තිබුණේ ය.

එදින රාත්‍රී ඔහුට නින්ද නොගියේය. ඔහුගේ බිරිඳ බියෙන් ඔහු හා කථා නො කළා ය. වරක් ඈ ඔහු අස්වැසීමට තැත් කළ විට ඔහු ඈට කෝපයෙන් බැණ වැදුණේ ය. පැය කීපයක් කල්පනා විරහිත වූවාක් මෙන් සිටි ඔහුට ක්‍රමයෙන් සියල්ල ගැන සිහිවන්නට විය. ඒ හා සමඟ ම ඔහු තුළ තද ශෝකයක් ඇති විය. මෙතෙක් ගොළු ව සිටි ඔහුගේ සිතට පළමු වරට ශෝකයක් ඇති වූයේ එවිට ය. තමා අවුරුදු කීපයක් දුකසේ වෙහෙස වී ලබාගත් එකම දෙය නැති විය. එයින් තමාගේ ජීවිතයේ වැදගත් කොටසක් ද නැති වී යැයි ඔහුට සිතිණ. ඔහු දෑස නො පියා අඳුර දෙස බලා සිටියේය. ඔහුගේ සිතෙහි වූ ශෝකය මඩිමින් දැඩි කෝපයක් නැඟගෙන එයි. එය ඔහුගේ ඇඟ රත් කරවන සුළු ය. තමා කෝප විය යුත්තේ කා සමඟ ද? එය කිසිවකු විසින් කරන ලද්දක් නොවේ. එසේ වුවද මේ සියල්ල පිටුපසෙහි තමාට නො වැටහෙන කිසියම් බියකරු බලයක් විය යුතු යි' ඔහු කෝපයෙන් දෙනෙත් පියා ගත්තේය.

පසු දින ඔහු ගෙදරින් බැහැර නොගියේ ය. එහෙත් ගෙදර සිටීම ද ඔහු වෙහෙස කරවන සුලුවිය. ඔහුගේ බිරිඳ බිය නිසා ඔහු හා කතා නො කළා ය. මුළු දවස ම ගෙදර සිටි ඔහු එදින ඇඳිරි වැටෙත් ම ගෙදරින් පිට විය.