ජාත්‍යන්තර මත් ද්‍රව්‍ය ජාවාරමේ ප‍්‍රධානියෙක් ලෙස සැළකෙන සමන්තකුමාර හෙවත් වෙලේ සුදා සමග ගනුදෙනු කළ බව කියන ලොකු ලොක්කන් ගණනාවක් ගැන දැනටමත් පොලිස් ප‍්‍රශ්න කිරීම්වලදී හෙළිවී ඇති බව දැන ගැනීමට තිබේ.

වෙලේ සුදාට මත් ද්‍රව්‍ය ජාවාරම් කරගෙන යාමට නොයෙක් ආකාරයෙන් උදව් පදව් කරමින් ලක්ෂ ගණනින් කෝටි ගණනින් මුදල් හම්බ කරගෙන මාළිගාවල් තනාගෙන දැඩි සුඛෝපභෝගි යාන වාහන ලබාගෙන සුර සැප වින්ඳ ලොකු ලොක්කෝ දැන් දියෙන් ගොඩටගත් මාළුන් සේ ගැහෙමින් සිටින්නේ කොයි මොහොතේ තමන්ගේ දෑතට විලංගු වැටේ දැයි කියා බියෙනි.

වෙලේ සුදාගෙන් යැපුණු ලොකු ලොක්කෝ එසේ මෙසේ අය නොවෙති.

දේශපාලනඥයින් පොලිස් නිලධාරින් සහ රාජ්‍ය නිලධාරි ගණනාවක් වෙලේ සුදාගෙන් වරප‍්‍රසාද වරදාන ලබමින් යැපුණු අය අතර සිටිති.
මේ සියලූ දෙනා ගැනම රහස් පොලිසිය වෙන වෙනම පුළුල් පරීක්ෂණ පවත්වාගෙන යන්නේ වෙලේ සුදා හෙළිකර ඇති තොරතුරු තව දුරටත් තහවුරු කරගෙන ඔවුන් නීතියේ රැුහැනට කොටුකර ගැනීමටය. 

මේ පාර කොටුවීමට යන්නේ මත් ද්‍රව්‍ය ජාවාරම්වලට සම්බන්ධව සිටි තෝරු මෝරුන්ය.

වෙලේ සුදා සමග සම්බන්ධවී මහා පරිමාණයෙන් මත් ද්‍රව්‍ය ජාවාරම් කළ ඒ තෝරු මෝරු අල්ලා ගැනීමට පොලිසිය දැනටමත් දැල එළා හමාරය.
වෙලේ සුදාගෙන් වරප‍්‍රසාද ලැබූ පොලිස් නිලධාරින් අතර පොලිසියේ ඉහළ තනතුරක් දරා විශ‍්‍රාම ගොස් සිටින පොලිස් ලොක්කෙක්ද සිටින බව දැන ගැනීමට ඇත.

විශ‍්‍රාම ගොස් ඇති මේ පොලිස් ලොක්කාට වෙලේ සුදා ලක්ෂ ගණන් වියදම් කර ඇති බව පොලිස් ආරංචි මාර්ග පවසයි.
වෙලේ සුදාට නොයෙකුත් ආකාරයෙන් ආධාර උපකාර කළ බව කියන පොලිස් පරීක්ෂකවරයෙක් ගැනද තොරතුරු පරීක්ෂණ කණ්ඩායම් හෙළිකරගෙන ඇතැයි කියති.

මේ පොලිස් පරීක්ෂකවරයා වෙලේ සුදාගෙන් මාස්පතා ලක්ෂ ගණනින් පඩි ලබාගත් අයෙක් බවද වැඩිදුරටත් දැන ගැනීමට ඇත.
පොලිස් ආරංචි මාර්ගවලින් පැවසෙන ආකාරයට මේ පොලිස් පරීක්ෂකවරයා වෙලේ සුදාගේ ගෝලයින්ට මත් ද්‍රව්‍ය ප‍්‍රවාහනය කිරීමේදී රැුකවරණය පවා සලසා ඇත. 

ශ‍්‍රී ලංකාවේ කි‍්‍රයාත්මක වන මත් ද්‍රව්‍ය ජාවාරම් ජාලය ගැන පරීක්ෂණ පවත්වා ඒවාට සම්බන්ධ අය අල්ලා මත්ද්‍රව්‍ය මෙරටින් තුරන් කිරීම සඳහා පොලිස් මත් ද්‍රව්‍ය නාශක කොට්ඨාසය සුවිශේෂි කාර්යයක් ඉටුකර ඇති අතර දැනටත් ඒ සඳහා ඇපකැපවී සිටිති.

පොලිස් මත් ද්‍රව්‍ය නාශක කොට්ඨාසයේ බොහෝ නිලධාරින් ඇපකැපවී මත් ද්‍රව්‍ය ජාවාරම්වලට සම්බන්ධ පාතාලයෙන් තර්ජන ගර්ජන එල්ලවී තිබියදීත් තම ජීවිත ගැනද නොතකා ජාවාරම්කරුවන් අල්ලා ගැනීමට මෙහෙයුම් කරද්දී අතළොස්සක්වූ දුෂිත නිලධාරින් මත් ද්‍රව්‍ය ජාවාරම්කරුවන්ට සහාය ලබාදෙමින් ජාවාරම්කරුවන්ගෙන් වරප‍්‍රසාද ලබා ගන්නා බව කියති.

මත් ද්‍රව්‍ය ජාවාරම් කරගෙන යාමට වෙලේ සුදාට ආධාර උපකාර කළ බව කියන පොලිස් මත් ද්‍රව්‍ය නාශක කොට්ඨාසයේ (නාකොටික්) නිලධාරින් කිහිප දෙනෙකුගේද සහාය ලැබී ඇති බවට තොරතුරු මේ සම්බන්ධව පරීක්ෂණ පවත්වන පොලිස් කණ්ඩායමට ලැබී ඇතැයිද පැවසේ. 

වෙලේ සුදා සමග සම්බන්ධකම් පැවැත්වූ පොලිස් නිලධාරින් ද සිටින නිසා මේ පරීක්ෂණ කටයුතු රහස් පොලිසිය කරගෙන යන්නේ ඉතාම රහසිගතවය.
පරීක්ෂණවල යම් යම් තොරතුරු ප‍්‍රසිද්ධ වුවහොත් එය ඉදිරි පරීක්ෂණවලට බාධාවකි.

වෙලේ සුදාගේ මත් ද්‍රව්‍ය ජාවාරම්වලට වසර කිහිපයක් තිස්සේ සිට ඔහු ළඟින්ම ඇසුරු කරමින් ආධාර උපකාර කරන දේශපාලනඥයෙක් ගැනද වෙලේ සුදා වමාරා ඇත.

මේ කියන දේශපාලනඥයා ඔහුට ඇති යම් යම් වරප‍්‍රසාද යොදා ගනිමින් වෙලේ සුදාට ආධාර උපකාර කර ඇති බව දැනටමත් ප‍්‍රසිද්ධ රහසකි. 

වෙලේ සුදා ව්‍යාජ පාස්පෝර්ට් එකක් සාදාගෙන රටින් පලා ගියේ ඔහු පොලිසිය අත්අඩංගුවට ගැනීමට සොයන නිසාය.

හොර පාස්පෝර්ට් එකකින් වෙලේ සුදාට පලා යාමට සෑම උදව් උපකාරයක්ම කර ඇති බව කියන්නේද මේ දේශපාලනඥයාය.

රටින් පලා යාමට උදව් උපකාර කිරීම වෙනුවෙන්ද වෙලේ සුදා මෙකී දේශපාලනඥයාට ලොකු ගණනක් ලබා ඇති බව පැවසේ.

වෙලේ සුදාට රටින් පලා යාමට අවශ්‍ය කටයුතු සම්පාදනය කර ඇති බව කියන්නේද මෙම දේශපාලනඥයාට ඇති වරප‍්‍රසාදවලට මුවාවී යැයි කියති.
දේශපාලනඥයෙක් ඉදිරිපත්වීම නිසා කිසිකෙනෙක් සැක කරන්නේද නැත.

වෙලේ සුදාට රටින් පලා යාමට හොර පාස්පෝර්ට් හැ¥ අය ගැනද තොරතුරු හෙළිවෙමින් පවතී. 

මෙම දේශපාලනඥයාට වෙලේ සුදා මාස්පතා ලක්ෂ ගණනින් මුදල් ලබාදුන් පසු දේශපාලනඥයා ඔහු ළඟ සිටින පාතාල අපරාධකරුවන් යොදවා වෙලේ සුදාගේ මත් ද්‍රව්‍ය ප‍්‍රවාහන කටයුතු සඳහා යොදනු ලබන බව කියති.

මෙම දේශපාලනඥයාගේ පාතාලයින් වෙලේ සුදාගේ ආරක්ෂකයින් වශයෙන්ද කටයුතුකර ඇතැයි කියන අතර ඔවුන්ටද වෙලේ සුදා අතදිගහැර වියදම් කර ඇත.

වෙලේ සුදා පකිස්ථානයට පලා යාමෙන් පසුවද මෙම දේශපාලනඥයාට මුදල් ගෙවීම නතර කර නොමැත.

බිරියගේ මාර්ගයෙන් වෙලේ සුදා ඒ මුදල දේශපාලනඥයා අතට ලැබීමට සලස්වා ඇතැයි පොලිසිය කළ විමර්ශනවලින් හෙළිවී ඇත. 

මගේ කුඩු බිස්නස්වලට බාධා කළ තවත් කුඩුකාරයෝ කිහිප දෙනෙක්ම හිටියා. ඔවුන් නිහඬ කර මගේ බිස්නස් එක කරදරයක් නැතිව කරගෙන යාමට මේ දේශපාලඥයාගේ පාතාල ගෝලයන් උදව් කළා යැයි වෙලේ සුදා පොලිස් නිලධාරින් සමග පවසා ඇති බව පැවැසුවේ උසස් පොලිස් නිලධාරියෙකි.
වෙලේ සුදාට ආධාර උපකාර කරමින් ඔහුගේ මත් ද්‍රව්‍ය ජාවාරම්වලට සහාය වූ බව කියන තවත් දේශපාලනඥයන් කිහිප දෙනෙක් ගැනද තොරතුරු පොලිසියට ලැබී ඇති අතර ඒ දේශපාලනඥයින් ගැනද පුළුල් විමර්ශන පවත්වාගෙන යයි.

මත් ද්‍රව්‍ය ජාවාරම්වලට වෙලේ සුදාට උදව්පදව් කර මාස් පතා ලක්ෂ ගණනින් පඩි ලබාගැනීමට අමතරව ඔවුන්ට සුඛෝපභෝගී යාන වාහන නිවාස පවා ලබාදී ඇති බව දැන ගැනීමට ඇත.

සමහරුන් පවුල් පිටින් විදෙස් සංචාරවල යෙදී ඇති බව කියන්නේද වෙලේ සුදාගේ අනුග‍්‍රහයෙනි. 

වෙලේ සුදා සමග ඍජුවම සම්බන්ධතා පැවැත්වූ හය දෙනෙක් ගැන දැනටමත් සවිස්තර තොරතුරු අනාවරණය කරගෙන ඇති පොලිසිය රටින් පලා යාමට නොහැකිවන ලෙස ඔවුන් ගැන තොරතුරු ගුවන් තොටුපොළ බලධාරින්ට දැනුම්දී ඇත.

වෙලේ සුදා ඩුබායි හා පකිස්ථානයේ සැඟව සිටි කාලය තුළ ඔහු මේ හය දෙනා සමග නිතර දුරකථනයෙන් කතා කර ඇති බව පොලිස් පරීක්ෂණවලින් කරුණු අනාවරණය වී තිබේ.

එක්තරා පොලිස් නිලධාරියෙක් වෙලේ සුදා පකිස්ථානයේ සිටියදී නිතර නිතර කතා කර ඇති බවද පොලිස් ආරංචි මාර්ග කියයි. 

දුරකථන ජාල සම්බන්ධතා පරීක්ෂාකර බැලීමට පොලිසිය අවශ්‍ය පියවර ගනිමින් සිටින අතර එම තාක්ෂණ පරීක්ෂණවලදී වෙලේ සුදා සමග ඍජු සම්බන්ධතා පැවැත්වූ ප‍්‍රබලයන් ගැන කරුණු හෙලිවනු ඇතැයි පොලිසිය විශ්වාස කරයි.

වෙලේ සුදාට ආධාර උපකාර කළ අයට ඔහු අත දිග හැර වියදම් කරමින් ඔවුන්ගේ සෑම  ඕනෑ එපාකමක්ම ඉටුකර ඇත.

පකිස්ථානය හා ඩුබායි රටේ වෙලේ සුදාට අයත් බැංකු ගිණුම් ගණනාවක් ඇති බවට තොරතුරු පොලිසිය විසින් හෙළිකරගනු ලැබ ඇති අතර එම ගිණුම්වල කෝටි ගණනින් මුදල් තැන්පත් කර ඇති බවටද සැක කරයි.

පකිස්ථානයේ හා ඩුබායි රටේ වරින්වර සැඟව සිටි කාලයේ වෙලේ සුදා සමග ලක්ෂ ගණනින් මුදල් ගණුදෙනු කරගත් අය ගැන වැදගත් තොරතුරු රැුසක්ම දැනටමත් පොලිසිය හෙළිකරගෙන ඇත. 

පකිස්ථානයේ හා ඩුබායි යන රටවල සිට මෙරටට පමණක් නොව තවත් රටවල් දෙක තුනකටද වෙලේ සුදා හෙරොයින් මත් ද්‍රව්‍ය තොග පිටින් වරින් වර යවා ඇති බව ඉහළ පෙළේ පොලිස් ආරංචි මාර්ගවලින් දැන ගැනීමට ඇත.

මෙරටට හෙරොයින් තොග එවා ඇති ආකාරය ඒ සඳහා යොදා ගන්නා උපක‍්‍රම මෙන්ම ඒවා මෙරටදී භාරගෙන රටපුරා බෙදා හැරීම දක්වා සිදු කෙරෙන කි‍්‍රයා පිළිවෙත් හා ඒ සඳහා හවුල්වන පුද්ගලයන් ගැනද තොරතුරු අනාවරණය වෙමින් පවතින බව ඉහළ පෙළේ එම පොලිස් ආරංචි මාර්ග තව දුරටත් පවසයි.

ජාත්‍යන්තර මත් ද්‍රව්‍ය ජාවාරම්වලට සම්බන්ධ තවත් අංක එකේ ශ‍්‍රී ලාංකික පුද්ගලයෙක් ගැනද තොරතුරු වෙලේ සුදා හෙළිකර ඇති අතර ඔහු මුස්ලිම් ජාතිකයෙකි.

මෙම ශ‍්‍රී ලාංකික මත් ද්‍රව්‍ය ජාවාරම්කරු දැනට ඩුබායි රටේ සැඟවී සිටින බවත් වෙලේ සුදා තොග වශයෙන් හෙරොයින් වරින්වර මෙරටට එවා ඇත්තේ මෙම පුද්ගලයා සමග එක්වී බව පොලිසිය කරුණු අනාවරණය කරගෙන ඇත.