තරුණ අඹුසැමි යුවළ පාපන්දු ක්‍රීඩාවට දැඩි ඇල්මක් දැක්වූහ. සැමියා විවාහයට පෙර පාපන්දු කණ්ඩායමක සාමාජිකයෙකි. ඔහු රැකියාවක නිරත වූ අතර බිරිඳ නිවසේ ඉවුම් පිහුම්  කටයුතුවල යෙදුණාය. නගරයේ පාපන්දු තරගයක් තිබුණොත් දෙදෙනාම එය වැරැද්දුවේ  නැත. පසුගිය දිනවල පැවැති ලෝක කුසලාන සෑම තරගයක්ම ඔවුහු නැරඹූහ. ඔවුනගේ ජනප්‍රිය ක්‍රීඩකයන් වූයේ ලයනල් මෙසී හා රොනල්ඩෝය. පෘතුගාලය සහ ආජන්ටිනාව පරාජය වීමෙන් දෙදෙනාම බොහෝ කම්පා වූහ. අවසාන තරගය නැරඹීමට දෙදෙනා රූපවාහිනිය ඉදිරිපිට වාඩිවූහ.

බිරිඳගේ සහයෝගය ක්‍රොඒෂියාවටය. සැමියාගේ ප්‍රාර්ථනය ප්‍රංශය දිනීමය. තරගය අතරතුරදී ඔවුහු ඔට්ටු ඇල්ලූහ. බිරිඳ පැවසුවේ ක්‍රෝඒෂියාව පැරදුණොත් ඇය තම  මව්පියන්ගේ නිවසට ගොස් මාසයක් එහි ගත කරන බවය. “බලමු එතකොට කෑම කන්නේ කොහොමද කියලා” ඇය කීවාය. 

“ප්‍රංශය පැරදුණොත් මම අපේ අම්මලාගේ ගෙදර යනවා. ඔයා මෙහෙ තනියම ඉන්න” සැමියා ද පැවසීය. ප්‍රංශය ජයග්‍රහණය කර ක්‍රොඒෂියාව පරාජයට පත්විය. බිරිඳ පසුදිනම ඇයගේ මව්පියන්ගේ ගෙදර ගියාය. සැමියා නිවසේ තනිවිය. රැකියාවට ගොස් නිවසට පැමිණි ඔහුට තනිකමක් දැනිනි. මධ්‍යම රාත්‍රියේ නිවසේ දොර වැසූ ඔහු ඇඳුම් බෑගය ද අතැතිව තම යතුරුපැදියෙන් කිලෝමීටර් විස්සක් දුරින් පිහිටි තම මහගෙදරට ගියේය.
 ක්‍රිස්ටෝපර් සීපියන්.