හැඳලට නුදුරු ගමක කුලී නිවසක පදිංචිව සිටි තරුණ විවාහක යුවළකි. පොලොන්නරුව ප‍්‍රදේශයේ උපන් මේ දෙදෙනා එම නිවසේ පදිංචියට ආවේ සැමියා අගනුවර පෞද්ගලික ආයතනයක රැුකියාව කරන නිසාය. එම නිවෙසට යාබද ඉඩමේ පදිංචි තරුණයෙක් මේ පවුලේ උදවිය සමග ඉතා කුළුපගව සිටියේය. තම සැමියා කාර්යබහුල රැුකියාවක නිරතව සිටි හෙයින් නිවසේ විවිධ අවශ්‍යතා සපුරා ගැනීමට කාන්තාව සහය ලබාගත්තේ එම තරුණයාගෙනි. සිංහල අවුරුද්දට දින තුනකට කලින් තරුණ යුවළත් කුඩා දරු දෙදෙනාත් ගමට යන්නට කල්තියා සූදානම් වී සිටියහ. යාබද ඉඩමේ තරුණයා ද ඒ බව දැන සිටියේය. අවුරුද්ද ලබන අවස්ථාවේ තම ”සිහින පෙම්වතිය” නිවසේ නැති බැවින් ගමට යන්නට කලින් සැමියාට හොරෙන් කෙසේ හෝ ඇයට සුබ පැතිය යුතු යැයි තරුණයා අදිටන් කර ගත්තේය. අසල ඇති වෙළෙඳසලක් වෙත සැමියා යනු දුටු තරුණයා හෙමින් සීරුවේ එම නිවසට ගොඩවැදුණේ සැමියාට හොරෙන් කෙසේ හෝ කාන්තාවට අවුරුදු සුබ පැතුම් පිරිනමන්නටය. ඒ වන විට කාන්තාව සිටියේ මුළුතැන්ගෙයි ආහාර පිසිමිනි. තරුණයා පැමිණි කාරණය ගැන නොදත් කාන්තාව ඔහුට වාඩි වන ලෙස කීවාය. සුළු වේලාවක් වාඩිවී සිටියත් කාන්තාව සාලයට නොපැමිණි නිසාත්, වෙළෙඳසල වෙත ගිය සැමියා ආවොත් තමන් පැමිණි කාරණය ඉටුකර ගත නොහැකි වන නිසාත් කාන්තාවට අවුරුදු සුභ පතන්නට තරුණයා කෙළින්ම මුළුතැන්ගෙය වෙත ගියේය. ”ගමේ යන්න කලින් ඔයාට සුබ පතන්නයි ආවෙ. ඔයාට සුබ අලූත් අවුරුද්දක් වේවා” යැයි කියමින් තරුණයා විවාහක කාන්තාව කීප වතාවක් සිප වැළඳ ගත්තේය. ඒ සමගම ඔහුගේ කම්මුල හරහා පහර කීපයක් වදින්නට වූයෙන් හනික පිටුපස හැරී බලද්දී තරුණයාට දකින්නට ලැබුණේ කාන්තාවගේ සැමියාය. ”අවුරුදු කන්ඩ ආපු මිනිහට හොඳට කන්ඩ දෙන්නත් එපායැ. අවුරුදු කෑමත් දැන්ම කාලා පලයන්” යැයි කී සැමියා තරුණයාට තවත් පහර කීපයක් දී එළියට ඇද දැම්මේය.