සිසු වියදමෙන් ගෙදර අයගේත් රෑ බඩ කට පුරවන්න ගොස් කොළේ ඉරාගත් දිසාපාමොක් කෙනෙක් පිළිබඳව අපූරු පුවතක් දකුණු පළාතේ පාසලකින් අසන්නට ලැබේ.
මේ විදුහලේ කොල්ලෝ ක්‍රීඩාවකින් ලංකාවෙන්ම කප් ගැසුවෝය. මේ ජයෙන් කොල්ලෝ විතරක් නොව ඔවුනගේ මවුපියන්ටත් සතුටුය. මේ සතුට සැමරීමට කොල්ලෝත් ඔවුනගේ මවුපියෝත් කොල්ලන්ට ක්‍රීඩාව දික්විජය කරන්නට ඇපකැපවූ පුහුණුකරුවන් වෙනුවෙන් කෑම වේලක් දෙන්න කතා කරගත්හ.
මේ රෑ කෑම වේල දෙන්න සූදානම් කෙරුණේ නගරයේ සුපිරි හෝටලයකය. ක්‍රීඩාවෙන් ජයගන්නට තමන්ට මෙලෝදෙයක් නොකළ විදුහලේ ක්‍රීඩා ගුරුවරයාට ද ඒ සඳහා ආරාධනා නොලැබුණි නම් කොල්ලන්ට එන ප්‍රශ්නවලින් මිදීමට නොහැකිය.
මේ හෝටලයේ රෑ කෑම එදා සූදානම්ව තිබිණි. ක්‍රීඩා ගුරුවරයා පැමිණියේය. ඒ එක්කම ඔහු විශේෂ කෑම තුනක්ම එම හෝටලයෙන් ඇණ්වුම් කළේය. ගුරුවරයා මේ උත්සවයෙන් දනිපනිගා කෑම කා තමා ඇණවුම් කළ කෑම පැකට් තුන ගැනීමට හෝටලයේ කළමනාකරුගේ නිල කාමරයට ගියේය.

‘‘මහත්තයා මම ඇණවුම්  කළ කෑම පැකට් තුන සූදානම්ද ’’යි ඇසුවේය.
‘‘හරි සර් මෙන්න කෑම පැකට් ටික’’ යයි කියමින් කළමනාකරු කෑම පැකට් සඳහා මුදල් ගෙවන ලෙස ඉල්ලීය. 
තමා ගත්ත කෑම පැකට් තුනේ බිලත් ළමයින්ගේ බිලට එක්කරන්නැයි ගුරුවරයා කීවේය.
‘‘අනේ සොරි සර් ළමයි මේ පාටියේ බිල් ක්ලෝස් කරලා තියෙන්නේ ඒ නිසා මුදල් ගෙවල තමයි කෑම පාර්සල් දෙන්න පුලු‍වන් වෙන්නේ’’ යයි කළමනාකරු කී විට ගුරුවරයාට හීන් දහඩිය දැම්මේය. තමා ඇණවුම් කළ කෑම පැකට් තුන සඳහා ගෙවීමට මුදල් ගුරුවරයාගේ පසුම්බියේ නොවීය.
අවසානයේදී නිවසට දුරකතන ඇමතුමක් දී සිය ලොකු පුතාට කියා නිවසින් මුදල් ගෙන්වා ගත්තේ පිනට කන්න ගොස් වැඩේ පත්තු වී ගුරුවරයා විශාල අමාරුවක වැටෙමිනි.

කරන්දෙණිය එම්. සුසිල් ප්‍රියන්ත