(මීරිගම විශේෂ පුෂ්පකුමාර මල්ලවආරච්චි)
රුපියල් සියයේ කුලිය පනහට අඩු කරගන්නට ගිහින් වැඬේ හබක් කරගත් නූතන යුගයේ මට්ටකුණ්ඩලී කෙනකු උදේ හවස පොල් ඇහිලීමේ යෙදී සිටීම පිළිබඳව සියනෑවේ ගම්මානයකින් පසුගියදා වාර්තා විය.

මුදල් හදල් එක් රැස් කරන්නට මිස වියදම් කරන්නට තරමක අකමැත්තක් දක්වන විශ්‍රාමිකයෙකි. තමන් පදිංචි ඉඩමේ කලකින් පොල් කඩා නැත. පොල් කඩන්නන් ගසකට රුපියල් සියයක් අය කරන නිසා ඔහු නිතරම කල් ගෙව්වේ ඊට අඩුවෙන් කරගන්නට පුද්ගලයකු හමුවන අදහසිනි. එහෙත් කිසිවකු හමුවූයේ නැත.

ඔහු අන්තිමේ කළ හැකි දෙයක් නැති තැන පොල් කඩන්නාට කතා කළේය. ගාන කීය ද ඇසීය. ‘සිීයයි මහත්තයා’ පොල් කඩන්නා පිළිතුරු දුන්නේය. ඔහු  ගසකට ගොඩ වෙද්දී විශ්‍රාමිකයා කතා කළේය. ‘පනහ ගණනේ කඩමු හොඳද’ ඔහු කීවේ තරමක් හඬ නගාය. ‘හොඳයි මහත්තයා’ කී පොල් කඩන්නා පොල් කැඩීම පසෙකලා ගසෙන් බිමට බැස්සේය. කිසිවක් නොදොඩා යන්නට ගියේය. 

ඉඩමේ පොල් ඵලදාව නෙළා ගන්නට කිසිවකු නැතිවීම නිසා දැන් අයිතිකරු දිනපතා උදේට වැටෙන වැටෙන පොල් ගෙඩිය ගානේ එකතු කිරීමේ යෙදී සිටී.