පෞද්ගලික ආරක්ෂක ආයතන අතළොස්සක් විසින් ජනවාරි මස වැටුපට රුපියල් දෙදහස් පන්සීයක් එකතු කරන ලදී. ප්‍රතිඵලය අනෙකුත් ආරක්ෂක ආයතනවලට බලපෑවේය. වැටුප් වැඩිකළ ආයතනයක ආරක්ෂක නිලධාරියෙක් තම ජනවාරි මස වැටුප් පත්‍රිකාව, වැටුප් වැඩිනොවූ ආරක්ෂක ආයතනයක ආරක්ෂක නිලධාරීන්ට පෙන්වමින් උජාරුවෙන් කථා කරන්නට විය.

ආණ්ඩුවෙන් ගැසට් කරන්නත් ඉස්සර වෙලා අපේ බොස්ලා ලෝබ නැතිව දෙදහස් පන්සීය වැඩිකළා. බලන්න මගේ පඩිය. රුපියල් හතළිස් නම දාහයි. යනුවෙන් පැවසුවේ තම කමිසයේ කොලරයද ඔසවමිනි. වැටුප් පත්‍රිකාව දුටු අයෙක්, ඇත්ත තමයි අපේ ලොක්කෝ කියන්නේ රජයෙන් ගැසට් කළේ නැතිව වෙන සර්විස්වල රුපියල් දෙදහස් පන්සීය දුන්නා කියන්නේ බොරුවටලු එයාලා අපිව ගොනාට අන්ඳනවා යැයි පැවැසීය. දිනක් වැටුප් වැඩිවූ ආරක්ෂක නිලධාරියා “ඔන්න ඊයෙත් තවත් සර්විස් වලින් පනහක් ආවා ඉන්ටවිව්වලට පනහම ගත්තා” යැයි පැවැසීය. ගතවූයේ දින කිහිපයකි.

පෙරකී ආරක්ෂක නිලධාරියා ශෝකයෙන් සිටිනු දුටු වැටුප් වැඩි නොකළ ආයතනයේ ආරක්ෂක නිලධාරියෙක් “මොකද මචං දාහට අරන් සීයට දීලා වාගේ” යනුවෙන් විමසීය. අනෙකා පිළිතුරු දෙමින් “ඉස්සර මාසෙකට ඩියුටි හතළිස් පහක් කළා. දැන් කට්ටිය වැඩි නිසා ඩියුටිත් අඩුයි. පඩිත් අඩුයි. ගිය මාසේ මම ඩියුටි තිස් පහක් කලේ පොයින්ට් තුනකට ගිහින්. බොහොම අමාරුවෙන්. අපරාදේ දෙදහස් පන්සීය වැඩිකළේ. ඒක වැඩි නොකළානම් කට්ටිය එන්නෙත් නැහැ. අපිට ලොකු පඩියක් ගන්නත් තිබුණා” යැයි පැවසුවේ කළ කිරීමෙනි. අගනුවරින් වාර්තා විය.

ක්‍රිස්ටෝපර් සීපියන් අනුරාධපුරය