මනාලියට බීමට වතුර බෝතලයක් ගෙන ඒමට සුපිරි වෙළඳසලකට මනාලයා ගිය අවස්ථාවේදී පිටුපසින් පැමිණි මෝටර් රථයක නැගී මනාලිය පලාගොස් ඇති බැව් අම්බලන්ගොඩ පොලිසිය පවසයි.

මනාලිය වතුගෙදර ප්‍රදේශයේ පදිංචිකාරියක වන අතර මනාලයා නුවර ප්‍රදේශයේ පදිංචිකරුවකු බව පොලිසිය කියයි.

විදේශ රටක රැකියාව කරමින් සිටියදී ඇති වූ හිතවත්කමක් මත දෙපාර්ශ්වයේම කැමැත්ත මත ඉකුත් 18 වැනිදා අලුත්ගම හෝටලයකදී විවාහ මංගල උත්සවය මහ ඉහළින් පවත්වා ඇති බවද පොලිසිය කියයි. 

විවාහ මංගල උත්සවයේ කටයුතු අවසන් වී නව යුවළ මධුසමය ගත කිරීමට කොළඹ බලා මෝටර් රථයකින් පිටත්ව ඇති අතර පයාගල ප්‍රදේශයේ වෙළඳසලක් අසල නතර කර මනාලයා සුපිරි වෙළඳසලකට ගොස් ඇති බව පොලිසිය කළ මූලික පරීක්‍ෂණවලදී හෙළි වී ඇත.

මනාලියගේ පිපාසය නිවීමට වතුර බෝතලයක් මිලදී ගන්නා අවස්ථාවේදී නව යුවළ ගමන්ගත් මංගල රථය පිටුපසින් පැමිණි වෙනත් මෝටර් රථයක් වෙත ගිය මනාලිය එහි නැග පලාගොස් තිබේ.

පලාගිය මනාලිය සොයා ගිය මනාලයා පසුව ඇය සොයාගත නොහැකි වූ බැවින් අම්බලන්ගොඩ පොලිසියට පැමිණ පැමිණිල්ලක් කර ඇත.

අම්බලන්ගොඩ පොලිසිය සිද්ධිය ගැන වැඩිදුර පරීක්ෂණ පවත්වයි.

(අම්බලන්ගොඩ හේමන්ත ද සිල්වා සහ කළුතර සුනිල් එස්. තන්ත්‍රිආරච්චි)