විවාහවී වසර 4කට පසුව තම බිරිද කලින් විවාහවූ කතක් බව හෙළිවීමෙන් කම්පනයට පත් සැමියා ඇගෙන් දික්කසාද වීමට අවශ්‍ය බව පොලිසියට පැමිණිලි කිරීමේ පුවතක් මාවතගම පොලිසියෙන් ඇසේ. 

ඔහු 29 හැවිරිදි තරුණයෙකි. විදේශගත රැකියාවක නියුතුව සිටි රූමත් ලාබාල පෙනුමැති කාන්තාවක සමග  ඔහු ප්‍රේමයක් ඇතිකර ගත්තේ මුහුණපොත හරහාය. 

වසර ගණනාවක ප්‍රේමයෙන් පසුව ඇය මෙරටට පැමිණ මෙම තරුණයා සමග විවාහ වූවාය. සතුටින් කාලය ගෙවීගියේ  ප්‍රේමයේ අතුරිකිලි වැඩෙමිණි. වසර 4ක විවාහ දිරිය ගෙවී ගියේය. අහඹු ලෙස ඔහුට තම බිරිඳ කලින් විවාහව සිටි කාන්තාවක බවත් ඇයට 28 හැවිරිදි විවාහක දියණියක හා 12 හැවිරිදි පුතකු සිටින බවත් දැන ගන්නට ලැබිණි. ඈ පිළිබඳව තවදුරටත් කරුණු සොයා ගිය ඔහුට අවසානයේ අනාවරණය වූයේ ඇගේ ඇත්ත වයස අවුරුදු 42ක් බවය. 

මෙතෙක් තමා මුලාකළ බිරිඳ ගැන කලකිරීමට හා කම්පනයට පත් තරුණයා මේ සිදුවීම පිළිබඳ මාවතගම පොලිස් කාන්තා කාර්යාංශය වෙත පැමිණිලි කළේ ඇගෙන් දික්කසාද වීමට අවශ්‍ය බව පවසමිනි. 

හැගීම්වලට වහල් නොවී අවබෝධයෙන් යුතුව ජීවිතය ගොඩනගා ගන්න යැයි මාවතගම පොලිසියේ කාන්තා කාර්යාංශය භාර ස්ථානාධිපති නිමාලි ඉන්දිකා දැල්කඳුර මහත්මිය තරුණයාට අවවාදයක්ද දෙනු දක්නට ලැබිණි. 

මාවතගම පොලිස් ස්ථානාධිපති සමන් ආරියදාස මහතාගේ උපදෙස් හා මෙහෙයවීම මත පොලිස් කාන්තා කාර්යාංශයේ ස්ථානාධිපතිනිය විසින් මේ පිළිබඳව පරීක්ෂණ මෙහෙයවනු ලබන්නීය.
(මාවතගම කාංචනමාලා බණ්ඩාර)