බෙන්තොට ජේ. ඉඳුරුවගේ 

මේ දිනවල පොල් මිල ඉහළ යාමෙන් හා පොල් හිඟය හේතුවෙන් නිතර ගෝරනාඩු කරන තම බිරිය පුදුමයට පත් කිරීමට සිතා ස්වාමි පුරුෂයෙකු විසින් ගෙදර ගෙන ගිය පොල් ගෝනියේ පොල් පුහුවීමෙන් බිරිඳගේ ඇනුම් බැනුම් මැද පොල් ගෝනිය ඔහුටම ආපසු රැගෙන යාමට සිදුවීමේ පුවතක් බෙන්තර ගඟ අසබඩ ගම්මානයකින් අසන්නට ලැබිණි . 

එදිනෙදා කුලී වැඩකින් ලැබෙන ආදායමෙන් තම පවුලේ ජීවිකාව කරගෙන යන ස්වාමි පුරුෂයාට මේ දිනවල පවතින පොල් සහ හාල් මිල ඉහළ යාම නිසා බිරියගේ කන් කරච්චලය ඉවසිය නොහැකි තරම් විය. 

වෙනදාට වඩා පොල් පාවිච්චිය අඩුකිරීමට බිරිඳට සිදුවිය. ව්‍යංජන රස නැතැයි කියමින් ස්වාමි පුරුෂයාද බිරිඳට චෝදනා කළේය. බිරිඳ කීවේ ඇතිවෙන්න පොල් ගෙනත් දුන්නොත් රසට කෑම හදා දිය හැකි බවයි.

කොහෙන් හරි පොල් ගෙඩි කීපයක් සොයාගෙන එන බව පවසා නිවසෙන් පිටවූ ස්වාමි පුරුෂයා ගමේ පොල් එකතුකර පොල් වෙළඳාමක් කරන අයකුගේ ගෙවත්තේ වැටක් අසල පොල් පැටවූ ගෝනි කීපයක් තිබෙනු දුටුවේය.

මේ ගැන රෑ බෝ වෙනතුරු අවධානයෙන් සිට එම වැටෙන් රිංගා පොල් අසුරා තිබූ ගෝනියක් සොරාගෙන හෙමින් සීරුවේ කරේ තියාගෙන ගෙදර ගියේ සින්දුවක්ද කියමිනි.

රැගෙන ගිය ගෝනිය තම නිවසේ ඉදිරිපිට තබමින් ඔන්න හාමිනේ අද මට යාළුවෙකුගෙන් පොල් ගෝනියක්ම නිකම්ම ලැබුනා. දැන් ඉතින් කෑම රසට හදන්න පුළුවනි යයිද කීවේය. පොල් ගෝනියක්ම ගෙන ඒමෙන් සතුටට පත් බිරිඳ ස්වාමි පුරුෂයාට ලොකු තේ කෝප්පයක්ද පිළිගැන්වූවාය. 

බිරියද පොල් ගෝනිය ගේ ඇතුළටම ගෙන ගියේ මේක එළියේ තිබුණොත් අවට සිටින අයද පොල් ඉල්ලාගෙන ඒවි යයි කියමිනි.
ටික වෙලාවක් ගතවිය. ස්වාමි පුරුෂයාට බිරිඳගෙන් හොඳ හොඳ කියුම් ටිකක් අසන්නට ලැබිණි.

තමුසෙව රවට්ටලා යාළුවා දීල තියෙන්නේ පුහු පොල් ගොඩක්. ගෝනියේ තිබුණු පොල් ගෙඩි 10 ම පුහු පොල්. මේවා දීපු කෙනාටම ගිහින් දීල එනවා. මගේ තේ එකත් අපරාදේ යයි කියමින් බිරිඳ තව තවත් ගෝරනාඩු කළාය.

ස්වාමි පුරුෂයාට වැඬේ තේරුම් ගියේ එවිටය. පොල් එකතු කරන වෙළෙන්දා පොල් ගොඩවල්වලින් තෝරා ගන්නා පුහු පොල් එකතු කර ඒවා ගෝනිවල දමා වැට අයිනේ තබා තිබියදී එයින් ගෝනියක් තමන් විසින් රැගෙන ඇවිත් තිබෙන බව ඔහුට අවබෝධ වුයේ එවිටය. බිරියගේ ගෝරනාඩු මැද්දෙම කරේ තබාගත් පුහු පොල් ගෝනිය රාත්‍රියේම නිවසෙන් ඈත කැලෑ බද පෙදෙසකට දමා ආවේ කර කියාගත හැකි වෙන දෙයක් නොමැතිවය.