(තිහගොඩ – උපසේන ලියනගම)
තම ගෙවත්ත මැදින් වූ අඩිපාරක ගිය ගම්වැසියකු පොල් ගසකින් වැටී තිබුණු පොල් ගෙඩියක් සොරකම් කිරීමේ වරදට උසාවි යාමට තීරණය කළ ධනවත් පුද්ගලයකුට රුපියල් දෙදහසක නොසිතූ අලාබයක් වීමේ අපූරු සිද්ධියක් පසුගියදා කඳුකරයේ ග්‍රාමීය ප්‍රදේශයකින් අසන්නට ලැබිණි.

මේ පිළිබඳව තමා දන්නා හඳුනන නීතිඥ මහතකුට මේ ගැන කී විට ඉතා සානුකම්පික නීතිඥ මහතා කීවේ දුප්පත් මිනිහෙක් පොල් ගෙඩියක් ගත්තට නඩුදාන්න ඔයාට පිස්සුද? කියාය.

‘නෑ.. මට ඕනෑ මිනිස්සු ඉඩම මැදින් යන එක නවත්තන්නය.’ ඔහු කීවේ දැඩි ස්වරයකිනි. එහෙම නම් තව විනාඩි පහකින් මාව අමතන්න. මම නීතිඥ උපදෙස් දෙන්නම්. නීතිඥ මහතා කීවේ සිනාසෙමිනි.

මොහොතකට පසු නීතිඥ මහතා කීවේ මේ පිළිබඳව පොලීසියේ පැමිණිල්ලක් දමා විත්තිකරු පැමිණි පසු කෙරෙන සාකච්ඡාව මත නඩුව දැමිය හැකි බවකි.

ඔහු ඒ අනුව නඩුමගට පිවිසි බව ආරංචි වූ නීතිඥ මහතා තමාගෙන් උපදෙස් ගත් ඔහුට ලියාපදිංචි තැපෑලෙන් ලිපියක් යැවීය.

එහි සඳහන් වූයේ පැමිණිල්ලේ මූලික තොරතුරු හා දිනය ද සඳහන් කරමින් තමාගෙන් ගත් නීතිඥ උපදෙස් සඳහා රුපියල් දෙදහසක මුදලක් ගෙවිය යුතු බවත් ඒ උපදෙස් සියල්ල ඔහුගේ කටහඬින්ම තමා පටිගත කර ඇති බවත්ය. 

වහාම නීතිඥ මහතා හමුවූ ඔහු නඩුව ඉල්ලා අස්කර ගත්තේ මේ සිද්ධිය තවදුරදිග ගියොත් කොතැනින් කෙළවර වේදැයි සිතාගත නොහැකිවය.