(නයිනමඩම - චන්දන ප්‍රනාන්දු)
ඇටියාවල ප්‍රදේශයේදී පොලිස් ජීප් රථයක් මාර්ගයේ ගමන් කරද්දී එයට බියවී පලා පලාගොස් සිටි පුද්ගලයෙකු සැඟවුණ නිවසක් පරීක්ෂා කිරීමේදී කසිප්පු හා ගෝඩා තොගයක් සමග නිවෙස් හිමියාව පෙරේදා (26) සවස සැකපිට අත් අඩංගුවට ගත් බව පොලිසිය කීය. 

මෙලෙස අත් අඩංගුවට ගෙන ඇත්තේ 47 හැවිරිදි අයෙකි. නිවස පරීක්ෂාකිරීමේදී එහි තිබූ කසිප්පු නිපදවීමට සූදානම් කළ ගෝඩා බැරල් 1ක්, නිපදවන ලද කසිප්පු බෝතල් 25 සමග පෙරුම් උපකරණ තොගයක් සොයාගත් බව පොලිසිය කීය.

සැකකරු මෙයට පෙරත් නීති විරෝධී කසිප්පු ජාවරම් කිරීම සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ අයෙකු බවට තොරතුරු හෙළි වූ බව පොලිසිය කීය. දන්කොටුව පොලිස් ස්ථානාධිපති පොලිස් පරීක්ෂක තිළිණ හෙට්ටිආරච්චි මහතාගේ මෙහෙයවීමෙන් සැරයන් (14426) දිසානයක, (57373) සමන්, කොස්තාපල් (36283) ශයාමාල්, පොලිස් රියැදුරු (89640) චන්ද්‍රසිරි යන නිලධාරීන් මෙම වැටලීම කර තිබේ. සැකකරු මාරවිල අධිකරණයට ඉදිරිපත් කිරීමට නියමිතය.