පොලිසියෙන් කියා ත්‍රීරෝද රියක ගිහින් දුරකථනයටත් විදලා

වැදගත් පෙනුමැති මහතෙක් මාර්ගයේ ධාවනයවූ ත්‍රිරෝද රථයක් නැවැත්වීය. “කඳානට ගිහිල්ලා එන්න ඕනේ” ඔහු පැවසීය. රියැදුරා සතුටින් ගමන් ඇරඹුවේ ගාස්තුව රුපියල් දහසක්වත් ලබාගත හැකි බැවිනි. පෑලියගොඩ ඉන්ධනහල පසුකළ විට “ෂෙඞ් එකට දාන්නැයි” අමුත්තා කීය. “දැන් රිවර්ස් කළොත් පොලිසියෙන් ලියනවා.” රියැදුරා පැවසීය. “රිවර්ස් කරන්න, මම පොලිසියේ” අමුත්තාගේ බසට රියැදුරා අවනත විය.

ඉන්ධනහල තුළ කිසිවෙකු නොදුටු බව දුටු අමුත්තා පොම්පකරුවෙකු අමතා “මට මැනේජර් මහත්තයාගේ ෆෝන් නොම්මරේ දෙන්නැයි පැවසීය.” “එහෙම දෙන්න බැහැනේ” පොම්පකරු කීය. “මම බුද්ධි අංශයේ එස්.අයි.”

පොම්පකරු දුරකථන අංකය ලබාදුන් විට අංකය රියැදුරාගේ ජංගම දුරකථනයේ සටහන් කරගන්නා මෙන් අමුත්තා පැවසීය. “හරි සර්” යනුවෙන් පැවසූ රියැදුරා අංකය තම දුරකථනයට ඇතුළු කළේය. “යමු” කී අමුත්තා රියැදුරාගේ ජංගම දුරකථනය ගෙන පෙරකී අංකයට කතා කරන අතරතුර රියැදුරා ත්‍රිරෝද රථය ධාවනය කළේය.

වත්තල පරණ පාරට හරවන ලෙසට උපදෙස් ලැබූ රියැදුරා රථය හැරවූ විට, ඉන් බැසගත් අමුත්තා “ටිකක් ඉන්නැයි” පවසා දුරකථනයද කණේ තබාගෙන පාර හරහා ගමන් කළේය. බොහෝ වේලාවක් ගතවිය. අමුත්තා පැමිණියේ නැත. වත්තල පොලිසියේ පැමිණිල්ලක් දැමූ රියැදුරා කළකිරුණු සිතින් ආපසු පැමිණියේය.

ක්‍රිස්ටෝපර් සීපියන්

අදහස් (0)

පොලිසියෙන් කියා ත්‍රීරෝද රියක ගිහින් දුරකථනයටත් විදලා

රොකී‍ Wednesday, 21 September 2016 07:24 AM

අනේ මන්දා, තමනුත් බුද්ධිමත් වෙන්න ඕනෑ මෙහෙම අයගෙන් බේරෙන්න (නි)

: 0 0

යසපාල Wednesday, 21 September 2016 07:30 AM

අපේ මිනිස්සුත් පොලිසිය කිවුව ගමන් දෙකට තුනට නැමෙනවනේ (නි)

: 0 0

අබය Tuesday, 20 September 2016 03:04 AM

පොලිසියේ නෙවෙයි ත්‍රිවිධ හමුදාවේ ලොක්කා කියා කිවුවත් සිහිබුද්ධියෙන් වැඩකරන්න පුරුදු වෙන්න. (නි)

: 0 0

අසෝකා Tuesday, 20 September 2016 09:50 AM

කරනකම් හොදයි . අහුවුණු දවසට පොලියත් එක්ක ගෙවන්න වෙයි. මහත්තයෝ; මේ ස්වභාව ධර්මය එයට නිසි තීන්දුවක් ලබාදේවි.(හේ)

: 0 0

නුමන්ත Wednesday, 21 September 2016 03:19 AM

හයර් එක නොදුන්න එකට කමක් නැහැ කියමුකෝ. මොනදේකටද තුන් රෝද රථ රියදුරාගේ ජංගම දුරකථනය නාඳුනන කෙනෙකුට දෙන්නේ. ජංගම දුරකථනය කියන්නේ පෞද්ගලික දෙයක්. මෝඩ රියදුරෙක්. (නි)

: 0 0

රූපවතී Tuesday, 20 September 2016 11:59 AM

ඊයා..මේවගේ දේවල් දකිද්දී ලංකාවේ මිනිසුන්ගේ ආකල්ප ගැන ..හරිම කළ කිරීමක් ඇති වෙන්නේ ...?(හේ)

: 0 0

තරිඳු Thursday, 22 September 2016 01:57 AM

පොලිසියේ නම විකුණන මේ වගේ අයට එල්ලලා ගහන්න ඕනෑ (නි)

: 0 0

මාලක Tuesday, 20 September 2016 06:50 AM

හොර කප්පිත්තෙක් වගේ. (ර)

: 0 0

හිමාල් Wednesday, 21 September 2016 04:11 AM

ජංගම දුරකථනය තියෙන තැන අදාළ සමාගමෙන් පොලීසියට ලබාගන්න පුළුවන්, සංඥා අනුව. ඉන්ධනහලේ කැමරා පරීක්ෂාවෙනුත් තොරතුරු ගන්න පුළුවන්. (නි)

: 0 0

පද්මිණී Wednesday, 21 September 2016 05:30 AM

පොලිසියේ කියපු ගමන් හෙවිල්ලක් බැලිල්ලක් නැතිව කියන දේ කරන විදියට ලංකාවේ මිනිසුන්ගේ ආකල්ප හැඩ ගැහුණු විදියයි මෙතන මට පෙනෙන ලොකුම වැරැද්ද.(බ)

: 0 0