(පස්ගොඩ - තිලක් එච්. ගමගේ)
බුරුවා ගැහීමට ඇබ්බැහිවූ ගමේ පිරිසක් පාළුවට ගිය නිවසක හොර රහසේ සූදු කෙළින බවට පොලිසියටද ඉව වැටී තිබිණි.

උපාය දූතයකු යොදවා වැටලීම සිදුකිරීමට අදහස් කළ පොලිසිය දිනක් සිවිල් ඇඳුමින් සැරසුණ පොලිස් නිලධාරී පිරිසක් ත්‍රිරෝද රථයකින් ගමට පැමිණීයේ කිසිවකුටත් අවිශ්වාසයක් ඇති නොවන පරිදිය.

සුදුව ජයටම යද්දී සූක්ෂම අන්දමින් තිප්පොළ වැටලූ පොලිස් නිලධාරීන් සුදු කෙළියේ නිරතවූවන් අල්ලා අත්අඩංගුවට ගනිද්දී තව පිරිසක් හිස් ලූලු අත පලාගියහ.

පස්සෙන් පන්නන පොලිසියට බියෙන් මේ අතර සිටි සෝමදාස පණ එපා කියා පැන දිව්වේය. ලඳු කැලෑ බඩ වැටි අතරින් හිස හැරුණ අතේ දුවන සෝමදාසගේ පය ලිස්සා ඇද වැටුණේද කෙටල ගාලකින් පිරි මඩ වගුරු බිමකටය.

මඩ වතුර පෙව් මඩ නාගත් සෝමදාසගේ පිටි පැත්තට වැදුණ පහරකින් උඩබිම නැතිවිය.

බුදු රාලහාමි ගහන්න එපෝ ඔහු කෑ ගැසීය.

ඒ සමගම තවත් පහරක් වැදුණේ කොන්ද හරහාටය.

ආයාසයෙන් මඩවතුරෙන් ගොඩට ඇදුණ සෝමදාස බිම පෙරළී ඇද වැටුණේ අනේ බුදු රාලහාමි මහත්තයෝ මම ලෙඩෙක්. මට ගහන්න එපා. පිංසෙණ්ඩු වෙමිනි.

අත්දෙක එක්කර වැඳගෙන හිස ඔසවා බැලූ සොම්දාටෙ ඇතිවූයේ විමතියකි. තමාට පහර දුන්නේ කවුරුදැයි ඔහු වට පිට බැලීය.

බාව උස්සාගෙන හිස ඔසවා කලබලයෙන් දිව ඇදගෙන තමාදෙස බලාසිටින දැවැන්ත කබරයකුට තමා වැඳගෙන සිටින බව දැනී මහත් ලජ්ජාවකට පත්විය.