(වියලුව වාර්තාකරු)
විෂකුරු මාපිලකු සිය වැහි කබායේ පසුම්බිය තුළ සිටියදී කන්දකැටිය ප්‍රදේශයේ සිට බදුල්ල නගරය වෙත කිලෝමීටර් 45ක් පමණ යතුරුපැදියකින් ගිය පුද්ගලයකු පිළිබඳ පුවතකි.

සිද්ධිය මෙසේය.

ඔහු බදුල්ල නගරයට නුදුරු එක්තරා ආයතනයක සේවක මහතෙකි. සිය ගම් ප්‍රදේශ පිහිටි කන්දකැටියේ සිට හෙතෙම රැකියාවට ආවේ ගියේ සිය යතුරුපැදියෙන්ය.

මේ දිනවල පවත්නා වැසි සහිත කාලගුණය නිසා ඔහු වැහිකබායක් ද පැළඳීමට අමතක නොකළේය. සති අන්තයේ පැත්තකට දමා තිබූ වැහි කබාය ඊයේ (29) උදෑසන ඔහු යළි පැළඳ ගත්තේ ඒ වනවිටත් ඇදහැළුණු වර්ෂාවෙන් ආරක්ෂා වීමටය.

කන්දකැටිය සිට පැය එක හමාරක පමණ ගමනකින් පසුව සිය ආයතනය වෙත පැමිණි හෙතෙම වැහි කබායේ පසුම්බිය තුළට අත දමා එහි වූ පෑන එළියට ගන්නට සූදානම් වූයේ පැමිණීමේ ලේඛනයේ අත්සන් තබන්නටය.

එහෙත් පෑන වෙනුවට ඔහුට හසුවූයේ දැඩි සීතල සහිත රබර් පටියක් වැනි දඟරයකි. අතට අසු වූ රබර් පටිය එළියට ගත් ඔහුට දැක ගන්නට ලැබුණේ අතේ දැවටී සිටින විෂකුරු මාපිලෙකි.

මහ හඬ නගමින් අත ගසා දැමූ ඔහුගේ කෑ ගැසීම අසා එහි පැමිණි සෙසු පිරිසට දැක ගන්නට ලැබුණේ බිම දිගේ යන මාපිලෙකි. මාපිලා දුටු සේවක මහතා පමණක් නොව එහි සිටි කාන්තා පිරිස ද කෑ ගසමින් ඒ මේ අත දුවන්නට වූයේ ආයතනය තුළ මහා ගාලගෝට්ටියක් ඇති කරමිනි.

කෙසේ වෙතත් මෙතෙක් වේලා පසුම්බියේ ගුලි වී සිටි මාපිලා සිය සහෝදර සේවක මහතාට ආන්තරාවක් සිදු නොකිරීම සම්බන්ධයෙන් ඔවුන් දෙවියන්ට පමණක් නොව මාපිලාට ද ස්තුති කරමින් මාපිලා කෝටුවකින් අල්ලාගෙන ගොස් කැලෑවට මුදාහැරියේ සත්ව අවිහිංසාව පිළිබඳ මෙනෙහි කරමිනි.