දිනපතා මත්පැන් භාවිතකර අසභ්‍ය වදන් කියමින් අහළ පහළ අයට මහත් හිසරදයක්  ගෙන දුන් පුද්ගලයෙකු පිරිසක් ඉදිරියේ ලැජ්ජාවටත්, කරදරයටත් පත්වූ පුවතක් දකුණු පළාතෙන් වාර්තා වෙයි.
මාතර දිස්ත්‍රික්කයේ ග්‍රාමීය පෙදෙසක  ජීවත් වූ දෙදරු පියකු වූ  ඔහුගේ රැකියාව වූයේ ගස් කැපීම හා ඉරීමයි. ඒ සඳහා ඔහු සතුව ලී ඉරන අත්  මැෂිමක් ද  (චේන්ෂෝ) තිබුණි. උදෑසන රැකියාවට යන ඔහු නැවත නිවසට පැමිණෙන්නේ සැඳෑ අඳුර වැටෙන විට ය.  

දිවා කාලයේ බොහෝ වෙහෙස මහන්සි වී වැඩකර උපයා ගන්නා මුදලින් ඔහු වැඩි කොටසක් වැය කළේ මත්පැන් අලෙවිසැල්වලට ය. ඇඳිරි වැටීගෙන එන විට මත්පැනින්  හොඳ හැටි පදම් වී ඔහු පැමිණෙන්නේ අසල්වැසියන්ට ද කරදර වන අයුරින් ශබ්ද නගා කෑ ගසමින් තරහකාරයින්ට ද නොසරුප් බසින් බැන වදිමිනි. මෙය පාරේ ගමන් කරන අයට මෙන්ම අසල්වැසියන්ට ද  මහත් හිසරදයක් විය. මේ අයුරින් නොහැසිරෙන ලෙස ඔහුට කොතෙකුත් අවවාද කළද ඉන් කිසිදු ඵලක් නොවීය.
පසුගිය දිනෙක ගමේ කිහිපදෙනකු සවස් කාලයේ ඔහු එන ගමන් මග රැඳි සිටියේ මොහුගේ මෙම ක්‍රියාකලාපය නැවැත්වීමට, ඔහුගේ බිරිඳගේ ඉල්ලීමකට අනුව  උපදෙසක් දීමේ අරමුණෙනි.
සුපුරුදු පරිදි මැෂිම ද කරතියාගෙන සරම දෙපල්ලට ඇඳගෙන  ඔහු එනු දුටු පිරිස, ඉදිරියට ගොස් “අයියේ ඇයි මේ විධියට හැසිරෙන්නෙ ඔයාට ලොකු දුවෙකුත් ඉන්නවානේ” යනුවෙන් පවසන විටම ඔහු තම කරමත තිබූ ලී මැෂිම බිමින් තියන ගමන් “ආ උඹලා ආවේ මට පාඩමක් උගන්වන්න ද මම එක එකා කියන දේ අහන්නේ නැහැ යනුවෙන් කෑ ගසමින් ලී කපන මැෂිම පණ ගන්වා ඉහළට ඔසවනවාත් සමඟ ම ඔහුගේ සරම ගිලිහී ගියේ අපිළිවෙළට ඇඳගෙන තිබුණු නිසා  මැෂින් තලයේ පැටලී  එතීමෙනි. ඒ සැණින්ම ඔහු ද බිම වැටී  කෑ මොර දෙන්නට වූයේ කැරකෙන තලයට දෙපා තුවාල වී ලේ ගැලීමත් සරම ගැලවී යාමෙන් ඇති වූ ලැජ්ජාවත් නිසාවෙනි. 
එසැණින් එතැන සිටි පිරිස ඔහු රෝහල් ගතකරනු ලැබූ අතර දින කිහිපයකින් තුවාල සුව වී ඔහු ගෙදර පැමිණි මුත් ගම්වැසියන්ට මුහුණ නොදී සිටීමට වගබලාගත් අතර පසුව දැනගන්නට ලැබුණේ පෙර පරිදි මත්පැන් පානය කළ ද කිසි‍වකුටත් කරදරයක් නොවන පරිදි  නිහඬව සිටිනා බවකි.

කඹුරුපිටිය විශේෂ කේ.අජිත්