(රාජාංගණය නුවන්කුමාර)
නැති නෑදෑකමක් හඟවමින් මහ දවල් වේලීමට මිදුලේ දමා තිබූ වී ගොඩකින් වී ගෝනි දෙකක් සොරකම් කිරීමේ පුවතක් නොච්චියාගම බෝගස්හන්දිය ප්‍රදේශයෙන් වාර්තා වේ.

බෝගස් හන්දිය ප්‍රදේශයේ නිවෙසක අඹුසැමි යුවළක් සමඟ ඔවුන්ගේ දරුවෝ හා මව ජීවත් වෙති. මෙම යුවළ රජයේ රැකියා කරන අතර, දරුවන් දෙදෙනා පාසල් ගිය පසු දිවාකාලයේදී නිවෙසේ තනියම සිටින්නේ ඔවුන්ගේ මව පමණි. මෙම නිවෙසේ ගෘහමූලිකයා රජයේ රැකියාවට අමතරව හොඳින් ගොවිතැන්වල නියැලෙන්නෙකි. මෙවර යල් කන්නයේ ඔහුගේ කුඹුරේ ඉතා සාරවත් වී අස්වැන්නක් තිබූ  අතර ඒවායෙන් වී උර 10ක්  වේලීම සඳහා මිදුලට දමා ඇත.

පසුගිය දිනක එසේ වී වේලීමට දමා ඔහු බිරිය සමඟ රාජකාරි සඳහා පිටත්ව ගොස් ඇති අතර දරුවන්ද පාසල් ගොස් සිටි අතරවාරයේ මව වෙනත් රාජකාරියක් සඳහා නිවෙසින් පිටතටගොස් සිටියදී  යතුරුපැදියකින් පැමිණි තරුණයන් දෙදෙනකු අවට පිරිස් බලා සිටියදීම ඔවුන් ගෙනා උරවලට වී පුරවාගෙන යෑමට සුදානම් වූ අවස්ථාවේදී අසල් වැසි කාන්තාවක් පැමිණ මොකද? මහදවල් වී සොරකම් කරන්නේ යැයි විමසා  ඇත. එහිදී මෙම තරුණයන් දෙදෙනා මෙම නිවෙසේ සිටින කාන්තාව තමන්ගේ ලොකු අම්මා බවත්, ඇය විසින් තමන්ට වී උර දෙකක් රැගෙන යන ලෙස දන්වා සිටි නිසා තමන් පැමිණි බවත් පවසා වෙනත් අයකුට  ඔවුන්ගේ දුරකථනයකින් කතාකොට “ලොකු අම්මේ අපි වී ටිකක් ගත්තා” යැයි පවසා අසල්වැසි කාන්තාවත් නොමග යවා වීත් රැගෙන යතුරුපැදියේ නැගී පලාගොස් තිබේ.

තමන් ගිය කාර්යය නිමවී ගෙහිමියාගේ මව නිවෙසට පැමිණි විට අසල්වැසි කාන්තාව සිද්ධිය ඇයට දැනුම් දුන් විට, තමන් කිසිවෙකුටත් එසේ නොකී බවත්, තමන්ට බාල සහෝදරියක් හෝ ඥාතීන් නොමැති බව පවසා ඇත. රාජකාරි නිමවී දරුවන් පැමිණි අවස්ථාවේදී මව විසින් සිද්ධිය සැලකරවිට ගෘහ මූලිකයා පවසා ඇත්තේ වී මිටි දෙකක අලාභය අයකර ගන්න මහන්සිවෙලා වියදම් කරලා පොලිසියේ රස්තියාදු වෙනවට වඩා වී මිටි දෙකක් වෙනත් තැනකින් ලබා ගැනීම ලාබ දායක බවයි.