(පුත්තලම ජූඞ් සමන්ත)
තරුණ කාන්තාවක් දිය නාමින් සිටින අයුරු ඉනිමගකට නැග ජංගම දුරකථනයකින් පටිගත කළ බව කියන අයෙක් ආරච්චිකට්ටුව පොලිසිය විසින් අත්අඩංගුවට ගනු ලැබීය.

මෙම අත්අඩංගුවට ගැනීම ඉකුත්දා (31) සිදුකර ඇත.

අත්අඩංගුවට ගෙන ඇත්තේ 34 හැවිරිදි එක්දරු පියෙකු බව පොලිසිය කියයි.

සිද්ධියට මුහුණ දී ඇත්තේ 25 හැවිරිදි එක්දරු මවකි. ඇයගේ සැමියා යුද හමුදා සෙබළෙකු බව පොලිසිය කියයි.

සැමියා නොමැති අවස්ථාවලදී සැකකරු තමන්ගේ නිවසට නිරන්තරයෙන් පැමිණ අයුතු යෝජනා ඉදිරිපත් කරන බවත් සිද්ධිය වූ දා තමන් නිවස ආසන්නයේ දිය නාමින් සිටින විට සැකකරු ඉනිමගකට නැග එම අවස්ථාව වීඩියෝ ගත කළ බවත් සිද්ධියට මුහුණ දී ඇති කාන්තාව පොලිසියට කර ඇති පැමිණිල්ලේ සඳහන් වේ.

සැකකරු කිසියම් රෝගයකින් පෙළෙන්නේද යන්න සම්බන්ධයෙන් සොයා බලන බව පොලිසිය කියයි.

ආරච්චිකට්ටුව පොලිසිය වැඩිදුර විමර්ශන කටයුතු කරගෙන යයි.