(හෙට්ටිපොළ ධම්මික බාලසූරිය)
විවාහ වී වසර තිහක් පමණ ගතවීත් දරුවන් තිදෙනකුත් ලබා ඇති නමුත් තම සැමියාගේ නම සහ වාසගම නොදන්නා අපූරු බිරියක් ගැන පඬුවස්නුවර ප්‍රදේශයෙන් වාර්තා විය. ජනාධිපතිවරයාගේ සංකල්පයක් මත පසුගියදා සිදු කෙරුණු පොලිස් ජංගම සේවාව හෙට්ටිපොල පොලිසිය මගින් හෙට්ටිපොල පොලිස් වසමෙහි ස්ථාන කිහිපයකදී සිදු කෙරිණ. ඩෙංගු මර්දනය වැඩ සටහනද මෙම ජංගම සේවයෙහි එක් අංගයක් වූයෙන් ඒ සඳහා නිවාස පරීක්‍ෂා කිරීම දැනුම්වත් කිරීම මෙම ජංගම සේවය යටතේ සිදු කරන ලදී.

එම වැඩ සටහන යටතේ හෙට්ටිපොළ පොලිසියේ නිලධාරීන් පිරිසක් සහ පඬුවස්නුවර ප්‍රාදේශීය සෞඛ්‍ය වෛද්‍ය නිලධාරි කාර්යාලයේ නිලධාරින් කිහිපදෙනෙකු සහ සිවිල් ආරක්‍ෂක කමිටුවේ නිලධාරින් පිරිසක් සමග එක්ව නිවාස පරීක්‍ෂා කරමින් දැනුම්වත් කරමින් ගෙන් ගෙට ගොස් ඇත.

නිවාස පරීක්‍ෂා කර අනතුරුව පරීක්‍ෂා කළ නිවසෙහි නම සහ ලිපිනය සඳහන් කර ගැනීම නිලධාරින් විසින් සිදුකරන ලදී. එක්තරා නිවසක් පරීක්‍ෂා කිරීමෙන් අනතුරුව නිවසෙහි හිමිකරුගේ නම කිමෙක්දැයි නිලධාරීන් ගෙහිමි කාන්තාවගෙන් විමසා ඇත. ගේයි ඉඩමයි නම් මහත්තයො තියෙන්නෙ පුතාගෙ නමට. එයා රස්සාවට ගිහින් යැයි කාන්තාව පවසා ඇත.

පුතා නැති වුණාට කමක් නෑ එයාගෙ සම්පූර්ණ නමයි ලිපිනයයි කියන්නකො අපට සටහන් කර ගන්න යැයි නිලධාරින් කාන්තාවට පවසා ඇත. පුතනුවන්ට නිවෙසෙහි භාවිතා කරනු ලබන කෙටි නමක් පමණක් කාන්තාව විසින් නිලධාරින්ට පවසා ඇත. එහෙම හරි යන්නෙ නෑ. පුතාගෙ සම්පූර්ණ නම වාසගමත් සමග නිවරැදිව කියන්නැයි නිලධාරින් කාන්තාවට පවසා ඇත. මම ළමයගෙ සම්පූර්ණ නමවත් දන්නෙ නෑ මහත්තයා. ඔහොම පොඞ්ඩක් ඉන්නකො මම උප්පැන්න කොළේ ගෙනත් දෙන්නම් යැයි කාන්තාව පවසා ඇත.

කාලය ගතවන බැවින් එහෙනම් මහත්තයගේ සම්පූර්ණ නම කියන්නකො යැයි නිලධාරින් පවසා ඇත. සැමියාටත් කවුරුත් භාවිතා කරන කෙටි නමක් ඇය පවසා ඇත. එහෙම නෙවෙයි මහත්තයගේ සම්පූර්ණ නම වාසගම සහිතව කියන්න යැයි නිලධාරීන් මෙම කතට පවසා ඇත. වාසගම් එක්ක නමක් නන් මම දන්නෙ නෑ මහත්තයො යැයි ඇය පවසා ඇත.

විවාහ වී කොතරම් කල්දැයි නිලධාරීන් විමසුවේ අවශ්‍ය නිසා නොව මැදිවියත් ඉක්මවා ගොස් ඇති බවක් පෙනෙන නිසාය. මනුස්සයා එක්ක ඇවිල්ලා නම් ගොඩක් කල් මහත්තයෝ. ලොකු දුව බඳලා, දරුවොත් ඉන්නවා. ඇනෙක් දරුවො දෙන්න රස්සා කරනවා  යැයි මෙම කත පවසා ඇත. ඉන්නකො මහත්තයො පුතාගෙ උප්පැන්න කොළේ ගෙනත් දෙන්න. ඒකෙ නම ඇති යයි කියූ කාන්තාව නිවස තුළට ගොස් පුතාගෙ උප්පැන්නයෙහි පිටපතක් ගෙනත් නිලධාරින්ට පෙන්වා ඇත. උප්පැන්නයේ සඳහන් පරිදි දෙවන දරුවාටත් වයස අවුරුදු විසිපහ ඉක්මවා ගොසිනි. විවාහ දිවියට වසර තිහක් පමණ ගත වීත් දරුවන් තිදෙනකු ලබා සිටියදීත් වසර ගණනක් තිස්සේ එකගෙයි වාසය කරන සැමියාගේ සහ තම දරුවන්නේ නම් නොදන්නා මෙම කාන්තාව ගැන නිලධාරින්ට ඇතිවූයේ පුදුමයකි.