(මීරිගම විශේෂ - පුෂ්පකුමාර මල්ලවආරච්චි) 
ජනාධිපතිරවණ ප්‍රතිඵල සම්බන්ධයෙන් ඇති කර ගත් ඡන්ද ඔට්ටුවක් පරාද වූ පුද්ගලයෙකු පරාද වූ රුපියල් පන් දහසක මුදල මාසික වාරික වශයෙන් ගෙවීමට අවස්ථාව ඉල්ලීමේ පුවතක් මීරිගමට නුදුරු පෙදෙසකින් වාර්තා විය. 

දේශපාලනය හිස මුදුණේ තබාගෙන සිටින පුද්ගලෙයකි. තමන් සිත් ගත් අපේක්ෂකයා ජනපති පදවියට පත් නොවුණත් ඔහු ලබා ගන්නා ඡන්ද ප්‍රමාණය සම්බන්ධයෙන් ඔට්ටුවක් දමන්නට නොගත් උත්සාහයක් නැත. 

ඔහුගේ කරදරය නිසාම හිතවතකු රුපියල් දහසක ඔට්ටුවකට එකඟ වූයේය. බැහැ බැහැ ඔට්ටුව පන් දහසයි ඔහු කීවේ එකහෙලාය. අන්තිමේ දෙදෙනාම පන් දහසට එකඟ වූහ. මැතිවරණය අවසන්ය. පන්දහස ඕනෑමයි. කී අය සඳහන් කළ අපේක්ෂකයා ලබා ගෙන තිබුණේ ඔහු කී ප්‍රමාණයෙන් අඩකටත් වඩා අඩුවෙනි. 

තමන් පරාජයට පත් වුවත් ගෙවන්නට රුපියල් පන් දහසක් අත නැත. ඇත්තේ දහසක නෝට්ටුවක් පමණි. මේක අද ගන්න. ඉතිරි හාර දහස මාසෙට දාහ ගානේ දෙන්නම්. ඔහු බැගෑපත් වූයේය. බලකිරීම නිසා දැමූ ඔට්ටුවට සල්ලි කවදා ලැබුණත් මොකද යැයි සිතූ හිතවතා ඊට එකඟ වූයේ මාසිකව මුදල් ගෙවන දිනය ස්ථාවරව එකඟ කරවා ගැනීමෙන් පසුවය.