මොරගොල්ලාගම  සිසිර කැලේගම
සැමියාගේ දන්නා හඳුනන මිතුරකුගේ ගෙදරට තම බිරිය රැගෙන ගිය ගමනේදී සැමියාට තරු විසිවුණු පුවතක් වයඹ සීමාවට අයත් කහල්ල පල්ලේකැලේ රක්ෂිත අභය භූමිය අවට ගමකින් අසන්නට ලැබුණි.
සැමියා රාජ්‍ය ආයතනයක දඹුල්ල  ප්‍රදේශයේ සේවය කරන්නෙකි. සඳුදා උදේම  සේවයට යන ඔහු සිකුරාදා සවස් යාමයේ ආපසු  නිවෙසට පැමිණෙයි. බිරිය ද ගුරු වෘත්තියේ නියැළෙන්නීය.  පාසලට උදේ යන ඇය සවසට ගෙදර එයි. දරු දෙදෙනා ද පාසල් යන වයසේ නිසා සවස් යාමයේ දරුවන් සමග නිවෙසේ බොහොමයක් වැඩ කටයුතු කෙරෙන්නේ  ඇය අතිනි.
සති අන්තයේ දරුවන් උපකාරක පන්තිවලට යන අතරේ එම දිනවල ගෙදර රැඳෙන සැමියා දර පළන්නට වත්ත පිටිය  සුද්ධ පවිත්‍ර කරන්නට නොමසුරු සහයෝගය ද දෙයි. අඩදබර නැතිව දෙදෙනා සමගියෙන් වාසය කරති.
දිනක් ඒකාකාරිභාවයෙන් මිදෙන්නට විනෝද ගමනක් යන්නට සැමියා යෝජනාවක් ගෙනාවේය. බිරිය ද ඊට එක පයින් කැමැති වූවා ය. එහෙත් දරු දෙදෙනා ඊට අකැමැති වුණේ ඔවුනට එදිනත් උපකාරක පන්ති නිසාය.
“එහෙනම් ඔයාලා පන්ති යන්න. අපි දෙන්නා  උදේම ගිහින් සවස ඔයාලා එන වෙලාවට අපිත් ගෙට එන්නම්” ඇය කීවාය. ඒ අනුව දෙදෙනා නික්ම ගියේ සැමියා සේවය කරන දඹුල්ල  ඉසව්වටය. 

පළමුව ආයතනයට ගිය දෙදෙනා එතැනින් රන්ගිරි  දඹුලු‍ විහාරය වැඳ පුදා ගත්හ. ඒ අතරවාරයේ සැමියා දන්නා හඳුනන හිතවතකුගේ ගෙට ගොඩ විය. ඔවුන් එහි යන විටත් එම නිවසේ  යුවළ ද වෙනත් ගමනක් සඳහා පිටතට ගොස්ය.
දරුවෝ පමණක් නිවෙසේ සිටිති. යතුරු පැදියෙන් බිමට බැස ගත් බිරියට  එතැන සෝදා වැළේ වනා ඇති ඇඳුමක් දෙසට සිත ගියේය. ඇය එතැනට දිව ගියාය. එය අත පත ගා බැලු‍වාය. ඇය නිවෙසේ සිටි පොඩ්ඩන්ට සමීප වූවාය.
“පුතේ මේ ගවුම මම තමයි අම්මට එව්වේ... මේක අර අංකල් නේද ගෙනාවේ..?” ඇය විමසුවා ය.
“ඔව්.. ඔව්.. ඒක ඒ අංකල් තමයි අම්මාගේ උපන් දිනයට දුන්නේ’’ පොඩ්ඩෝ ඊට පෙරළා පිළිතුරු දුන්හ.
ඒ වනවිටත් ඔහු ඒ වගක් නොදැන යතුරු  පැදිය මත රැඳී තමා ඒක ගෙනා වගක් වසන් ගන්නට මෙම නිවෙසේ කත සමග දුරකතන සංවාදයකය.
“මගේ අල්මාරියේ තිබුණු අපේ අක්කා මට උපන් දිනේට දුන්න මේ ගවුම මටත් හොරෙන් තමුසේ හොරකම්  කරලා හොර ගෑනිට දීලා...” වැලේ වනා තිබූ ගවුම ගෙනැත් ගුලිකර සැමියාගේ මුහුණට දමා ගසමින් යක්ෂ ආරූඪව  සැමියාගේ ඇඟට කඩා පැන්නා ය.
පොඩ්ඩන් සියල්ල වමාරා ඇති බව දැන ගත් ඔහු කිසිත් නොකියා එතැනින් නික්ම යන්නට තම බිරිය පිටුපස අසුනේ හිඳුවා යතුරු  පැදිය පණ ගැන්වීය. ඒ  නිවෙසේ යුවළ ආවොත් මෙතැන ඇති වෙන මහා විනාශයේ තුන් කොන් සටනින්  මිදෙන්නටය.