හසලක සුනිල් ඒකනායක

ගෙවත්තක පොල් ඵලදාව සහ ගම්මිරිස් ඵලදාව කැඩුවාට නියමිත කුලී මුදල් නොගෙවූ නිසා එදින රාත‍්‍රියේ ගෙවතු හිමියාගේ ගෙවත්තෙන් දෛනික කුලියට සරිලන ලෙස පොල් සොරකම් කරගෙන ගිය අයෙකු පිළිබඳ සිද්ධියක් හසලක පොලිස් වසමේ ගම්මානයකින් වාර්තාවෙයි.
වාර්තා වන අන්දමට සිද්ධිය මෙසේය. එදිනෙදා කුලී රැකියාවෙන් උපයා ගන්නා මුදලින් බිරිඳ ඇතුළු දරුවන් තිදෙනෙකු ජීවත් කරවන 34 හැවිරිදි වියේ පසුවෙන මත්වතුර හෝ මත්ද්‍රව්‍ය භාවිතයට නොගන්නා චාම් දිවි පෙවෙතක් ගත කරන ගමේ අයගේ සිත් දිනාගත් අයෙකි. ලැබෙන ඕනෑම කුලී වැඩක් කිරීමට දක්ෂතාවක් ඇති නිසා ප‍්‍රදේශයේ පමණක් නොව පිට ප‍්‍රදේශවලින් පවා ඔහුට කුලී රැකියාවන් ලැබීම සාමාන්‍ය තත්වයකි. පොල් කැඩීමට, පුවක් කැඩීමට හෝ වෙනත් අවශ්‍යතාවලට ගස් නැගීමටද ඔහු දක්ෂයෙකි.

මෙදින අසල ගමක පදිංචි සුළු තේ වෙළෙඳ සලක හිමිකාරියකගෙන් ලැබුණු ආරාධනයෙන් කියැවුණේ ඇයගේ ගෙවත්තේ ඇති ගම්මිරිස් ඵලදාව සහ පොල් ඵලදාව කඩා දෙන ලෙසයි. ඒ අනුව හිමිදිරියේම එම ගෙවත්තට ගොස් පළමුව ගම්මිරිස් කඩා ඉන් අනතුරුව පොල් ගස්වල ගෙඩි කඩනු ලැබිය. ගම්මිරිස්වලින් ඉහළ අස්වැන්නක් ලැබී තිබිණි. බිම හෙලූ පොල් ඵලදාවද එසේමය.
සියලු කටයුතු නිමාවීමෙන් පසු ඇය ඔහුට කුලී මුදල ගෙවන අවස්ථාවේදී තම කඩෙන් ණයට ගත් බඩුවලට හා විටින් විට ණයට තේ පානය කළ මුදල කපා දැමූ පසු ඔහුට ලැබීමට ඉතිරිවූයේ සොච්චම් මුදලකි. මේ මුදලෙන් සවස නිවසට යන විට බිරිඳ උදේ අතට දුන් බඩු තුණ්ඩුවට බඩු රැගෙන යාමටද ප‍්‍රමාණවත් නොවන බව දැණුන හෙයින් ඒ පිළිබඳව වෙළෙඳසැල් හිමිකාරියට පැවසුවත් ඇය දුන් මුදල හැර වෙනත් කිසිදු මුදලක් ඔහුට දුන්නේ නැත. මෙම වෙළෙඳසල් හිමිකාරිය තම කඩෙන් මාසික බිලට බඩු ගන්නා අයට මාසික එකතුවට ඉතා ඉහළ පොලී මුදලක් එකතු කරන කාන්තාවක් බවද ප‍්‍රකටය.
ඔහුට ඇය ගැන කලකිරීමක් මෙන්ම දැඩි කෝපයක්ද ඇති විය. “හා බලා ගනිමුකෝ.” යැයි තමාටම කියාගත් ඔහු සවස නිවසට ගොස් රාත‍්‍රිය උදාවූ පසු පෙරලා දවල් කාලයේ පොල් කැඩූ ගෙවත්තට පැමිණියේය. රැගෙන ආ මල්ලට පොල් ගෙඩි 10ක් 15ක් දමාගෙන නිවස බලා ගොස් පසු දින වෙනත් ගමක වෙළඳ සලකට එම ගෙඩි විකුණා මුදලක් ගත් බවත් එම පොල් සොරකම කළේ සොරකමකට නොව තමන්ට නිසි පරිදි දෛනික කුලී මුදල නොගෙවීම නිසා බවත් තම හිතවතුන්ට පැවසුවේ සිද්ධිය ගමට ආරංචි වී තමන්ට නරක නාමයක් ගමෙන් ලැබීමට පෙර බවද ඔහු මිතුරන්ට පවසා ඇත