රත්නපුරය ආශ්‍රිත ගැමියකු තම පවුලේ සමාජිකයන්ට නිතර විඳීමට සිදුවන දුක් කරදර දරාගත නොහැකි වීමෙන් දේවාලයක කපුවකු සොයා ගියේ තම පවුලට සිදුව ඇති වින්නැහිය සාස්තරයක් මගින් අසා දැනගෙන ඊට ශාන්තිකර්මයක් සිදු කිරීමටය.

 දේවාලයේදී පේනයක් බැලූ කපුමහතාට කියවුනේ ගම්වැසියා ඇතුළු පවුලේ අයට අසල්වාසී තරහාකාරයකු විසින් කර ඇති බලගතු කොඩිවිනයක් හේතුවෙන් පවුලේ සාමාජිකයින්ට නිතර කරදරවලට මුහුණදීමට සිදුවීමෙන් පවුලේ දියුණුවක් දක්නට නොමැති බවත් ඉදිරියේදී තවත් විශාල කරදර රැසකට මුහුණදීමට තම පවුලේ සාමාජිකයින්ට සිදුවීමෙන් හදිසි වියෝවන් පවා ඇතිවීමට ඉඩ ඇති බැවින් ඊට පෙර කොඩිවිනය කපා සෙත්ශාන්තියක් පවත්වන ලෙසට එම පේනයෙන් කියැවිණි.

 ඉන්පසුව ගම්වැසියා කපුමහතා හා සාකච්ඡා කර කොඩිවිනය කැපීමට දිනයක් හා වේලාවක්ද නියම කර ගැනීමෙන් පසු කපුමහතා පැවසූ පරිදි කොඩිවිනය කැපීම සඳහා අවශ්‍ය කුකුළා ජීවම් කිරීම සඳහා ගිවිසගත් දිනට පෙර දින නිවසට රැගෙන ගොස් කපුමහතාට භාර දුන්නේය. 

ශාන්තිකර්මය පවත්වන පසුදින උදාවිණි. කපුමහතා කුකුළාද රැගෙන  සවස් යාමේ ගම්වැසියාගේ නිවසට පැමිණියද ඒ වනවිටත් ඒ සඳහා ගම්වැසියා විසින් සියලු කටයුතු සූදානම් කර තිබුණි.

 ශාන්තිකර්මය අවසන්වීමෙන් වරු තුනක් ගතවීමට මත්තෙන් කුකුළා මියගියහොත් කොඩිවිනය එතැනින්ම කැපී බලරහිත වන බව පැවසූ කපුවා එදින රාත්‍රියේ තොවිලයේ අනෙකුත් කටයුතු පසුදා පහන්වනතුරු පවත්වා වැඩ කටයුතු  අවසන් කොට හොඳින් කෑමදී කුකුළා බලාගන්න යැයි ගැමියාට පවසා ගුරුපඬුරු වශයෙන් රුපියල් විසිදහසක මුදලක් ද රැගෙන කපුවා පිටත්ව ගියේය. 

එදින රාත්‍රි හත අට වත්ම කුකුළා මියගියේය. මේ නිසා ගැමියාගේ පවුලේ අයට යම් අස්වැසිලක් ලැබුණි. පසුදින උදය කාලයේ  ගෙහිමියා මියගිය කුකුල් නාම්බා වළදමන්නට සූදානම් වෙද්දී ඔහුගේ නිවස ඉදිරිපිටින් ගමන් ගත් මිතුරන්  කීප දෙනෙකු නිකරුනේ  කුකුළා වළ නොදමන ලෙස ගෙහිමියාට පවසා ඔවුන්ගේ ආහාරයට එක්කර ගැනීමට කුකුළා රැගෙන මිතුරෝ එතැනින් පිටත් වූහ. 

හම ගැසූ කුකුළාගේ අවයව ඉවත් කිරීමට පිරික්සීමේදී මිතුරන් දුටුවේ මියගිය කුකුල් නාම්බාගේ අධෝමාර්ගය කිසිවකු විසින්  තංගුස් නූලකින් අධෝමුඛය තදවන ලෙස මසා දමා ඇති බවය.

මිතුරෝ ඒ බැව් ගෙහිමියාට පැවසූහ. පවුලේ අය කපුවා සොයා ගියද ඒ වනවිටත් කපුවා එම ප්‍රදේශයෙන් අතුරුදන්ව ගොසිනි. එම පවුලට කොඩිවිනය කැපීමෙන් මෙතෙක් යහපතක් සිදුව නැතැයි ද බොහෝ දෙනා කියති. 
(ගිලිමලේ අමරදාස අංගම්මන)