තම අසල්වැසියකු විසින් පහරදී තුවාල සිදුකොට ගෙල පැලඳි රන් පවුමක මාලයක් කඩා ගත්තැයි පොලිසියට පැමිණිලි කරන්නට ආ කාන්තාවකගේ කෙස් වල්ලෙන් නැති වූ මාලය මතුවූ සිද්ධියක් අරණායක පොලිසියෙන් වාර්තා විය.

අරනායක වී මල්ලවත්තේ පදිංචිකාරියක බව කියන මෙම කාන්තාවට පහරදී මංකොල්ල කෑමේ සිද්ධිය පිළිබඳව අරණායක පොලිසියට පැමිණිලි කිරීමට පැමිණි අවස්ථාවේ ඇගේ හැසිරීම පිළිබඳව සැක පහළ කළ පොලිස් නිලධාරීන්, කාන්තා පොලිස් නිලධාරීන් දෙදෙනෙකු ලවා ඇය පරික්ෂාවට ලක් කිරීමේදී නැති වූ බව කියන රන් මාලය ඇගේ කොණ්ඩයේ සඟවා ගෙන තිබී සොයාගෙන ඇත. සිද්ධිය සම්බන්ධයෙන් බොරු පැමිණිල්ලක් කොට පොලිසිය නොමඟ යැවීමට තැත් කළ එම කාන්තාව බැඳුම්කරයක් මත මුදා හරින ලද අතර නඩු පැවරීම සඳහා ලබන 31 වෙනිදා මාවනැල්ල දිසා මහේස්ත්‍රාත් අධිකරණය වෙත ඉදිරිපත් කිරීමට අරණායක පොලිසිය කටයුතු යොදා ඇත.

අරණායක වැඩබලන පොලිස් ස්ථානාධිපති ප්‍රධාන පොලිස් පරීක්ෂක අර්ජුන කොඩිකාර මහතාගේ උපදෙස් පරිදි අපරාධ විමර්ශන අංශයේ ස්ථානාධිපති උප පොලිස් පරීක්ෂක. කේ.ජී. අභයකීර්ති, සැරයන් (22943) හරිස්චන්ද්‍ර, පොලිස් කොස්තාපල්වරුන් වන (35754) මුණසිංහ, (51215) රණසිංහ, (56991) වේරකේ, කාන්තා සැරයන්වරුන් වන (3967) අධිකාරී, (6001) චතුරිකා යන මහත්ම මහත්මීන් මේ පිළිබඳව වැඩිදුර පරික්ෂණ පවත්වාගෙන යනු ලැබේ.

(මාවනැල්ල - සමන් විජය බංඩාර) ​