නිවෙස්වල ඇති ඇලවූ පොල් ගස් අවදානමක් නොවන පරිදි ඇදීමේ කටයුතු සිදුකරන පිරිස් ලංකාවේ බොහෝ ප්‍රදේශවලින් සොයා ගත හැකිය.

මාතලේ දිස්ත්‍රික්කයේ මඩවල ප්‍රදේශයේ දී මෙම කටයුත්තේ යෙදුනු පුද්ගලයින් කිහිපදෙනකු විසින් සිදුකළ එක්තරා කාර්යයක් පසුගිය දා වේගයෙන් පැතිර ගියේය.

සුපුරුදු පරිදි සිය රැකියාවේ නිනරත කිහිපදෙනෙකුගෙන් යුතු පොල්ගස් අදින පිරිස මඩවල ප්‍රදේශයේ නිවසක් අසලට ගොස් පැමිණි කාරණාව කියා ඇත.

වත්තේ ඇති ඇලවී ඇති පොල් ගසක් ඇද වෙනත් ගසක ගැටගැසීටම අය කරන මුදල් පිළිබඳව ද සාකච්ඡා කර ඇත්තේ එම නිවසේ සිටි කාන්තාව සමගය.

වැඬේ පටන් ගැනීමට පෙර විවිධ කතාබහේ නිරතව ඇති පිරිසේ එක් තරුණයකු නිවැසි කාන්තාවගෙන් වතුර වීදුරුවක් ඉල්ලා ඇති අතර ඇයද නොපැකිලිව නිවසට ගොස් වතුර වීදුරුවක් රැගෙන විත් තිබේ.

වතුර වීදුරුව රැගෙන මිදුලට පැමිණෙන කාන්තාවගේ පෙර මගට ගිය ඉහත කී තරුණයා සිනාමුසු මුහුණින් වතුර වීදුරුව කාන්තාවගෙන් ඉල්ලන ගමන් ඇගේ අතින්ද ඇදීමට කටයුතු කළේය.

සිද්ධියෙන් උරණ වූ කාන්තාව පොල් ගස් අදින්න ඇවිත් අතින් අදින්න ආවාද පලයව් යන්න ඒ පොල් ගස් ඇදිල්ලෙන් කමක් නෑ යි ගෝරනාඩු කරන්නට විණි.

සිද්ධියෙන් කලබලයට පත් තරුණයා වතුර වීදුරුවද පැත්තකට දමා සෙසු පිරිසත් සමග පවනට බඳු වේගයෙන් නිවසින් පළා ගොස් තිබේ.

පුදුම සහගත කරුණ වී ඇත්තේ සිද්ධිය වූ නිවසට යාබද නිවසකට ද මෙම පිර්ස පැමිණ ඇති අතර අහම්බෙන් එම නිවසට සිද්ධියට මුහුණ දුන් කාන්තාව ගිය අවස්ථාවක මෙම පිරිස දැක තිබේ.

එක් තරුණයෙක් පොල් ගසක මද දුරක් නැග සිටි අතර අනෙක් පිරිස පොල් ගස ඇදීම සඳහා කටයුතු සූදානම් කර ඇත.

බැනවැදුනු කාන්තාව දුටු සැනින් බඩු මුට්ටු අකුලන් පිරිස පළායන අයුරු නිවැසියන් ද බලා සිටින ගමන් විමසා ඇත්තේ  අක්කා දකිනකොට මේ ළමයි දුවන්නේ ඇයි  කියාය.

මුං එන්නේ පොල්ගස් අදින්න. අන්තිමට ගෑණුන්ගේ අතින් අදින්න තමයි කල්පනාව. 

කරුණු කාරණා වටහාගත් එම නිවසේ වැසියන්ද නැවත කිසිදිනක ඇද වූ පොල් ගස් කෙළින් කරන්නට පිටස්තරයින් යොදා නොගැනීමට තීරණය කළේය.
(නාඋල - ඉන්දික අරුණ කුමාර)