(බිමල් ශ්‍යාමන් ජයසිංහ) 
                           
බණ්ඩාරගම ගම්මන්පිල ප්‍රදේශයේ  මංගල උත්සවයකට සහභාගී වූ පුද්ගලයකුට කොරෝනා වයිරසය ආසාදිත වීම හේතුවෙන් මනාල යුවළ ඇතුළු  එම උත්සවයට සහභාගී වූ පවුල් කීපයක් නිරෝධායන ලක්කිරීමට අද  (10) පියවර ගත් බව බණ්ඩාරගම සෞඛ්‍ය වෛද්‍ය නිලධාරී වෛද්‍ය නිමේෂා රත්නවීර මහත්මිය පැවසුවාය. 
                    
මීට දින 10 පමණ පෙර දී මංගල උත්සවය පවත්වා ඇති අතර ඒ සඳහා පුද්ගලයන් 40ත් 50ත් අතර ප්‍රමාණයක්  සහභාගි වී ඇති බවට තොරතුරු ලැබී ඇතැයි වෛද්‍යවරිය පැවසුවාය

මිල්ලනිය ප්‍රදේශයේ පදිංචි මනාල මහතාගේ සහෝදරයකු මංගල උත්සවයට සහභාගි වී  ඇති අතර එයින්  දින කීපයකට පසු කොරෝනා රෝග ලක්ෂණ පහළ කිරීමේ හේතුවෙන් ඔහු පි සි ආර් පරීක්ෂණයට භාජනය කර තිබූ බව සෞඛ්‍ය වෛද්‍ය නිලධාරී  කාර් යාලයේ ප්‍රකාශකයෙක් පැවසීය.
                       
එම පුද්ගලයා  ආසාදිතයෙකු  බවට පෙරේදා 9 වෛද්‍ය වාර් තාව මගින් අනාවරණය වීමෙන්  පසුව  ආ ගිය තැන් තැන් පිළිබඳව විමසීමේ දී මේ බව අනාවරණය වී ඇතැයි එම  ප්‍රකාශකයා කීය .
                                   
ඒ හේතුවෙන් එම මංගල උත්සවයට සහභාගී වූ අවට නිවාස කීපයක සාමාජිකයන් එම නිවෙස් වලම ස්වයං නිරෝධායන ලක් කිරීමට පියවර ගත් බවත් තවදුරටත් සොයා බලා පිටස්තර ප්‍රදේශවල අය වෙතොත් ඒ ඒ සෞඛ්‍ය වෛද්‍ය නිලධාරී කාර්යාල  දැනුවත් කිරීමට පියවර ගන්නා බව එම ප්‍රකාශකයා වැඩිදුරටත් පැවසීය

මනාලිය පිළියන්දල ප්‍රදේශයේ පදිංචිකාරියක් වන අතර ඒ සම්බන්ධයෙන් පිළියන්දල සෞඛ්‍ය වෛද්‍ය නිලධාරි කාර්යාලය ද දැනුවත් කිරීමට පියවර ගත් බව වෛද්‍යතුමිය වැඩිදුරටත් පැවසුවාය .