(විනීතා එම් ගමගේ)

පෞද්ගලික ආයතන හා කම්හල්වල සේවය අවසන් කිරීමේ අයදුම්පත් ජූලි මාසය දක්වා භාර නොගන්නැයි විදේශ සබඳතා නිපුණතා සංවර්ධන කම්කරු සහ රැකීරක්ෂා අමාත්‍ය දිනේෂ් ගුණවර්ධන මහතා කම්කරු කොමසාරිස්වරයාට අද (11) උපදෙස් දුන්නේය.

ජාතික කම්කරු උපදේශක සභාව කම්කරු දෙපාර්තමේන්තු ශ්‍රවනාගාරයේ දී අද (11) රැස්වූ අවස්ථාවේ ඇතිකරගත් එකඟතා අනුව අමාත්‍යවරයා මෙසේ උපදෙස් දුන් බව කම්කරු අමාත්‍යංශයේ නිලධාරියෙක් ලංකාදීපයට පැවැසීය.

අමාත්‍යවරයාගේ ප්‍රධානත්වයෙන් කම්කරු අමාත්‍යංශයේ හා දෙපාර්තමේන්තුවේ නිලධාරින්, වෘත්තිය සමිති නියෝජිතයන් මෙන්ම හාම්පුතුන් ගේ සංගම්වල නියෝජිතයින් ගේද සහභාගිත්වයෙන් පැවැති එම රැස්වීමේ දී සේවක රැකියා සුරක්ෂිතතාව වෙනුවෙන් එකඟතා කිහිපයකට එළැඹි බව ද හෙතෙම කියා සිටියේය.
මැයි හා ජුනි මාස දෙක සඳහා වැටුප් ගෙවීමේ දී ආයතනයේ උවමනාව මත සේවයට නොකැඳවූ සේවකයන්ට මූලික වැටුපෙන් අඩක් හෝ රුපියල් 14,500 යන දෙකින් වැඩි අගය ගෙවීමටත් එහි දී එකඟ වී යැයි ද ඔහු කියා සිටියේය.

සේවකයන් සේවයට ගෙන්වා ගැනීමේදී නිරෝධායන අනුව සේවකයන් වැඩට ගෙන්වා ගැනීමටත් සියලු සේවකයන්ට වැඩ ලැබෙන පරිදි ඔවුන් ගෙන්වා ගැනීමටත් හාම්පුතුන් එහි දී එකඟ වී යැයි කී එම නිලධාරියා සේවක වැටුප් ගෙවීමේ දී මූල්‍ය අපහසුතා ඇත්නම් වාණිජ බැංකුවලින් 4 %  ක පොලිය මත ණය ලබා ගැනීමට හාම්පුතුන්ට අවස්ථාව ලබා දී ඇති බව ද එහි දී අමාත්‍යවරයා පැවැසී යැයි ද කීය.