(රංජිත් රාජපක්ෂ)
 
කොවිඩ් 19 වයිරසය වැළඳුණු සංචාරකයන් ප්‍රවාහනය කරන රියදුරෙකු රැඳී සිටි නොර්වුඩ් ප්‍රදේශයේ සංචාරක නිකේතනයක් මුද්‍රා තබා සංචාරක නිකේතනයේ හිමිකරුගේ නිවස , ඔහුට අයත් ගාරාජයක් සහ පවුලේ සමාජිකයන්ව අද(23) දින නිරොධානයකට යොමු කිරීමට නෝර්වුඩ් ප්‍රාදේශීය සභාව පියවර ගත්හ.
 
එම රියදුරා ඉකුත් 14 දින බ්‍රිතාන්‍යය ජාතිකයන් තිදෙනෙකු හැටන් කාසල්රි ප්‍රදේශයේ ප්‍රධාන සංචාරක බංගලාවකට ප්‍රවාහනය කර එදින සිට 17 දින දක්වා අදාල සංචාරක නිතේකනයේ නතර ව සිට ඇත.
 
රියදුරා වයිරසය වැළඳී ඇති බවට සැක සිතී රෝහල් ගත වීමෙන් අනතුරුව එම රියදුරාව අංගොඩ රෝහල වෙත ඇතුළත් කර තිබිණි. වයිරසය ආසාදනය වී ඇතැයි හඳුනාගත් පසු සංචාරක නිතේකනය මුද්‍රා තබා එම සංචාරක නිකේතනයේ හිමිකරුගේ ගරාජය සහ පවුලේ සමාජිකයන් දින 14 ක් නිරොධනයට ලක් කිරිමට  නොර්වුඩ් ප්‍රාදේශීය සභාව කටයුතු කළේය.
 
අදාල සංචාරක නිකේතනය නොර්වුඩ් ප්‍රාදේශිය සභාවේ අවසරයකින් තොරව පවත්වාගෙන ගොස් ඇති බවත්, සංචාරක නිකේතනය මුද්‍රා තැබීමට ගිය අවස්තාවේ එහි හිමිකරු මුඛ ආවරණයක්වත් පැළඳ නොසිටි බවත් නොර්වුඩ් ප්‍රාදේශීය සභාවේ සභාපති රවි කුලන්දවෙල් මහතා පවසයි.
 
මේ අතර කාසල්රි ප්‍රදේශයේ සංචාරයට පැමිණි බ්‍රිතාන්‍යය ජාතිකයන් තිදෙනා මේ වන විට රටින් බැහැරව ගොස් ඇති අතර, ඔහුන් රැඳී සිටි හැටන් කාසල්රි ප්‍රදේශයේ සංචාරක බංගලාව මුද්‍රා තබා  එහි කාර්යය මණ්ඩලයද ස්වයං නිරොධානයකට  යොමු කිරීමට සෞඛ්‍යය අංශ අද(23)  කටයුතු කර ඇත.