(කේ ඩි දේවප්‍රිය )

ලබන මස 21 වැනි දින රුහුණු කතරගම   මහා කතරගම දේවාලයේ පැවැත්වෙන ඇසළ මංගල්‍යය ජනතා සහභාගීත්වයෙන් තොරව  සෞඛ්‍ය අංශ වල උපදෙස් මත ක්‍රියා කිරීමට කටයුතු කරන බව මොණරාගල දිසා ලේකම් ගුණදාස සමරසිංහ මහතා  අද (16) පැවති රුහුණු මහා කතරගම දේවාලයේ ඇසළ උත්සව සංවිධානය කිරීමේ රැස්වීමේ දි පැවසීය.

රටේ පවතින කොරෝනා තත්වය හමුවේ  සෞඛ්‍ය අංශ  විසින් මෙවර මංගල්‍ය සදහා උතුරු නැගෙනහිර සිටි පාද වන්දනාවෙන් පැමිණි පාද වන්දනා ගමන් ද තහනම් කරනු ලැබු බවත් මෙවර කතරගම ඇසළ පෙරහැර ඉතාම චාම්ව අවශ්‍ය රාජකාරි චාරිත්‍ර පමණක් ඉටු කරමින් පවත් වන ලෙසත් ජනාධිපතිතුමා නියෝග කල බව රුහුණු මහා කතරගම දේවාලයේ වැඩ බලන බස්නායක නිළමේ දිල්රුවන් රාජපක්ෂ මහතා සදහන් කළේය.

මේ අනුව මහනුවර,දෙවිනුවර කතරගම යන පුදබිම තුල සිදු කරන පෙරහැර මංගල්‍යන් රටේ පවතින සෞඛ්‍ය උපදෙස් මත සිදු කිරීමට මෙවර පියවර ගෙන තිබේ.

මෙම රැස්වීම අද කතරගම කිරිවෙර විහාරස්ථානයේ දී මොණරාගලදිසා ලේකම් ගුණදාස සමරසිංහ මහතා ගේ ප්‍රධනත්වයෙන් පැවැත් වු අතර  මෙහි දී කිසිදු අයුරකින් බැතිමතුන්ට මෙන්ම කතරගම ජනයාටද පෙරහැර නැරඹීමේ අවස්ථාව මෙවර අහිමි වනු ඇත.

 විශේෂ කාර්ය බළකාය හා පොලිසිය  මගින් විශේෂ ආරක්ෂාවක් ප්‍රධාන මාර්ග වෙත යොදවා පෙරහැරට අඩු නැටුම් කණ්ඩායම් හා රාජකාරි හා කපු මහතුන් එක්ව සිදුකිරීමට පියවර ගැනීමට මෙම හමුවේ  දි රාජ්‍ය නිළධාරින් හා සෞඛ්‍ය අංශ හා ආරක්ෂක අංශ වල නිළධාරින් විසින් තීරණය කරන ලදි.

පෙරහැරට එක් වන නැටූම් කණ්ඩායම් ද පී සී ආර් පරිීක්ෂණ සිදු කර පෙරහැරට එක් කර ගන්නා බව බස්නායක නිළමේ දිල්රුවන් රාජපක්ෂ මහතා පැවසිීය.
මෙම රැස්වීම සඳහා ආගමික වතාවත් කතරගමකිරිවෙර රාජමහා විහාරාධිපති පුජ්‍ය කොබවක ධමිමින්ද හිමියන් ගේ ප්‍රධානත්වයෙන් සිදු කරන ලදි. මෙම අවස්ථාව සදහා සෞඛ්‍ය අංශ නිළධාරින්  ,පොලිස් හා යුධ හමුදා ,සිවිල් ආරක්ෂක අංශ හා රාජ්‍ය හා රාජ්‍ය නොවන අංශ වල නිළධාරින් ඇතුලු පිරිස් එක්ව සිටියහ.

මාස කීපයක්පුරා  දැඩි ආර්ථික ගැටලු මත දිවි ගෙවනු ලැබු කතරගම ජනයා මෙවර ඇසළ මංගල්‍ය පිළිබඳව සිහින මවමින් සිටි අතර මෙම තහනමත් සමඟ කතරගම ජනයා නැවත ආර්ථික අර්බුදයකට  අඛන්ඩව ලක්වෙමින් පවතී.