(මනෝප්‍රිය ගුණසේකර)
 
බනිස් ගෙඩියක තිබූ ඇල්පෙනිත්තක් උඩු තල්ලේ ඇණුනු කාන්තාවකට රුපියල් 10,000ක වන්දියක් ගෙවන ලෙස දිවයිනේ ප්‍රධාන පෙළේ බේකරි නිෂ්පාදන ආයතනයකට නියම කරමින් කොළඹ මහේස්ත්‍රාත් අධිකරණයෙන් නියම කොට ති‍බූ වන්දි මුදල රුපියල් 100,000  දක්වා වැඩි කිරීමට කොළඹ මහාධිකරණ විනිසුරු ශෂී මහෙන්ද්‍රන් මහතා අද (31) නියම කළේය.
 
කොළඹ මහෙස්ත්‍රාත් අධිකරණය ලබාදුන් වන්දි මුදල ගෙවීමේ තීන්දුව ඉවත දමා තම ආයතනය නිදහස් කරන්නැයි ඉල්ලමින් එම ආයතන හිමිකරු මනෝජ් ලසන්ත විරාජ් පෙරේරා මහතා විසින් ඉදිරිපත් කොට තිබූ අභියාචනය ඉවත දැමූ මහාධිකරණය මහෙස්ත්‍රාත් අධිකරණයෙන් නියම කොට තිබූ වන්දි මුදල දස ගුණයකින් වැඩි කොට අගතියට පත් කාන්තාවට ගෙවීමට නියම කළේය.
 
2011 වසරේ දෙසැම්බර් මස 01වැනිදා මරදාන ප්‍රදේශයේ පිහිටි මෙම බේකරි නිෂ්පාදන ආයතනයක ශාඛාවකට පැමිණි කාන්තාව බනිස් ගෙඩි දෙකක් මිලදී ගෙන ආහාරයට ගනිමින් සිටියදී ඇගේ උඩු තල්ලේ ඇල්පෙනිත්තක් ඇණුනු බව දැක ඒ පිළිබඳව එහි සිටි සේවිකාවට පැමිණිලි කොට ඇති බවත් හෙළි විය. එම සේවිකාවගේ දැන්වීම මත ආයතනයේ හිමිකරුට පැමිණිලි කළ විට බොරු නොකියන ලෙස පවසමින් ඇය ඉන් පිටත් කළ බවත් අනාවරණය වී ඇත. ඇය මේ පිළිබඳව මහජන සෞඛ්‍ය පරීක්‍ෂවරයාට පැමිණිලි කිරීමෙන් අනතුරුව අදාළ ආයතනයට එරෙහිව මහෙස්ත්‍රාත් අධිකරණයේ නඩු පවරා ඇත.
 
ජනතාවට ආහාර සපයන හෝටල් සහ බේකරි නිෂ්පාදන ආයතන ඒ පිළිබඳ දැඩි අවධානයෙන් කටයුතු කළ යුතු බවද ඒවායෙන් සිදුවන වැරදි සුළුකොට තැකිය නොහැකි බව විනිසුරුවරයා පැවසීය.
 
වන්දි මුදල් ගෙවීමට අදාළ ව්‍යාපාරිකයා විසින් කල් ඉල්ලා සිටීම නිසා එයට අවසර දුන් විනිසුරුවරයා රුපියල් ලක්‍ෂ 500,000 ශරීර ඇපයක් මත ඔහු මුදාහැරීමට නියම කළේය.