(තිළිණි ද සිල්වා)

දිවයින පුරා සිටින සංචාරක රියදුරන්, මඟපෙන්වන්නන් ඇතුළු සංචාරක සේවා සපයන්නන් කඩිනමින් ලියාපදිංචි කිරීමට රජය තීරණය කර ඇතැයි සංචාරක අමාත්‍ය ප්‍රසන්න රණතුංග මහතා අද (30) පැවසීය.

සංචාරකයන්ට රට විවෘත කිරීමට පෙර සංචාරක සේවා සපයන්නන් සංචාරක සංවර්ධන අධිකාරියේ ලියාපදිංචි වීම අත්‍යවශ්‍ය බැවින් මෙම පියවර ගත් බවද අමාත්‍යවරයා වැඩිදුරටත් කියා සිටියේය.

ඒ අනුව සංචාරක සේවා සපයන්නන් ලියාපදිංචිය කඩිනම් කිරීම සඳහා අන්තර්ජාල ක්‍රමවේදයක් ද හඳුන්වා දී ඇති අමාත්‍යවරයා පැවසීය.

සංචාරක පනතේ 48(3) වගන්තිය අනුව දිවයින පුරා සිටින සියලුම සංචාරක සේවා සපයන්නන් සංචාරක සේවා අධිකාරියේ ලියාපදිංචි විය යුතු අතර  මෙලෙස නිසි ලෙස ලියාපදිංචි නොවීම නිසා කොවිඞ් 19 වසංගත තත්වය හේතුවෙන් රජය ලබා දුන් සහන ලබාගැනීමට ඇතැමුන්ට නොහැකි වී ඇති බවද අමාත්‍ය ප්‍රසන්න රණතුංග මහතා සඳහන් කර සිටියේය.

මේ අතර දිවයින පුරා සිටින සංචාරක රියදුරන්ට සංචාරක සේවා අධිකාරියේ විධිමත් පුහුණුවක් ලබාදීමට ද කටයුතු යොදා ඇතැයි ඇමතිවරයා සඳහන් කරයි.

එම පුහුණුව දිවයින පුරා පිහිටි වෘත්තිය පුහුණු  මධ්‍යස්ථාන හරහා ලබා දීමට අවබෝධතා ගිවිසුමක් ද අත්සන් කර ඇත.මෙහිදී පෙර පුහුණුවක් ලබා ඇති පුද්ගලයන්ට පුනරීක්ෂණ වැඩසටහන් ද, නවකයන් සඳහා නව වැඩසටහන් ද සංචාරක සංවර්ධන අධිකාරිය පහසුකම් සලසා ඇත.