විමුක්ති එස්. රුද්‍රිගු

මෙම මස පළමු දින 15 තුළදී ශ්‍රී ලංකාවට සංචාරකයන් 93,915 ක් මෙරටට පැමිණ තිබෙන බවත් ඒ සමග මෙතෙක් මෙරටට පැමිණ ඇති සංචාරකයන් සංඛ්‍යාව 816,191 දක්වා වර්ධනය වී ඇති බවත් ශ්‍රී ලංකා සංචාරක සංවර්ධන අධිකාරිය නිකුත් කළ නවතම දත්ත වාර්තාවල සටහන් වේ.
පසුගිය වසරේ අප්‍රේල් මාසයේ පළමු දින 15 සමග සංසන්දනය කරන විට මෙම වසරේදී මෙරටට පැමිණි සංචාරකයන් සංඛ්‍යාව සියයට 13.42 කින් ඉහළ ගොස් ඇති බවද එම දත්ත වාර්තා පෙන්වා දෙයි. එසේම මෙම වසරේ ජනවාරි මස 1 වැනිදා සිට පසුගිය අප්‍රේල් මස 15 වැනිදා දක්වා කාලයේදී මෙරටට පැමිණි සංචාරකයන් පිරිස පසුගිය වසරේ එම කාලය සමග සංසන්දනය කරන විට සියයට 14 ක ඉහළ යාමක් පෙන්නුම් කරන බවද එම වාර්තාවේ දැක්වේ.
අප්‍රේල් පළමු සතියේ දී ශ්‍රී ලංකාව සංචාරකයන් 44,908 ක් පිළිගත් අතර, දෙවැනි සතිය තුළ සංචාරකයන් 44,156 ක් සහ අප්‍රේල් 15 වැනි දින 4,851 ක් පිළිගත්තේය. ඒ අනුව පළමු දින 15 තුළදී මෙරටට දිනකට සාමාන්‍යයක් ලෙස සංචාරකයන් 6,261 මෙරටට පැමිණ තිබිණි. එය පසුගිය වසරේ මෙම කාලය සඳහා වාර්තා කළ දිනක සාමාන්‍ය වන 5,520 සමග සංසන්දනය කිරීමේදී සැලකිය යුතු ඉහළ යාමකි.