(බිඟුන් මේනක ගමගේ) 

සංචාරක ක්‍ෂේත්‍රය නඟාසිටුවීම සඳහා බෞද්ධ සංස්කෘතිය යොදාගත යුතු යැයි රත්මලාන ධර්ම පර්යේෂණාලයේ අධ්‍යක්ෂ හෑගොඩ විපස්සි හිමියෝ පවසති.

බුදු දහම යනු අපට ආධ්‍යාත්මික මෙන්ම ආර්ථික තලයේ දී එකවරම ජයග්‍රහණ අත්පත් කරගත හැකි මාහැඟි සම්පතක් යැයි ද ප්‍රතිපත්ති සම්පාදක ඇසට තවමත් මේ සම්පතින් ගත හැකි පල ප්‍රයෝජන ගැන හරි වැටහීමක් නැතැයි ද විපස්සි හිමියෝ ‘ලංකාදීප’ සමග සාකච්ඡාවකට එක්වෙමින් පැවැසූහ.

අධිවේගී ජීවන රටාවෙන් මිදී ජීවිතයට සහනයක් හා විවේකයන් සොයමින් මෙරටට පැමිණෙන සංචාරකයන්ට බුදු දහමෙන් මෙරට සැකැසුණු උරුමය යනු හොඳ වෙළෙඳපොලක් යැයි කී උන්වහන්සේ පාරිසරික හා සත්කාරක වශයෙන් වූ සංචාරක කර්මාන්තයට නව අගය එකතු කිරීමක් කළ හැකි මේ උරුමයෙන් තවමත් වැඩක් ගැනීමට අපට හැකිව නැතැයි චෝදනා කළහ.

මිථ්‍යා විශ්වාස පසුපස යෑම වෙනුවට විද්‍යාවට තැන දිය යුතු යැයි ද මිනිසුන් පූජා වන්දනාමාන කළ යුත්තේ සෙනසුරුට හෝ රාහුට නොව නවීන විද්‍යාවේ නවමු සොයාගැනීම් කරන මිනිස් අත්වලට යැයි ද විපස්සි හිමියෝ පැවැසූහ.

ජාතික විමුක්තියක් උදාවනු ඇත්තේ විද්‍යාවේ නව අරුණළු වැටෙන රටක යැයි ද විපස්සි හිමියෝ වැඩිදුරටත් සඳහන් කළහ.