බත්තරමුල්ල ප්‍රබෝදා ජුවලර්ස්හි ව්‍යාපාරික ප්‍රදීප් සංජීව

රත්‍තරන් කියන්නේ අනෙක් ලෝහවලට වඩා බොහොම පහසුවෙන් ඔපමට්ටම් කිරීමට හැකි ලෝහයකි. ඒ වගේම රත්තරන් කියන්නේ බොහොම පහසුවෙන් අනෙකුත් ලෝහ සමග මිශ්‍ර කිරීමට ද හැකි ලෝහයකි. මේ වන විට නවීන තාක්ෂණයත් සමග විවිධ වර්ණවල රත්‍තරන් වෙළෙඳපොළට පැමිණ තිබේ.  

මැයි, සැප්තැම්බර් කාල සීමාවේ මංගල උත්සව සඳහා දින වෙන්වීමත් සමග පාරිභෝගිකයෝ මංගල ඇඳුම් පැළඳුම් මිලදී ගැනීමට, රන් ආශ්‍රිත නිෂ්පාදන මිලදී ගැනීමට රුචිකත්වයක් දක්වති. මේ දිනවල රන් භාණ්ඩ නිෂ්පාදන වෙළෙඳපොළ කොයි ආකාරයෙන් ද පවතින්නේ යන්න සම්බන්ධයෙන් සොයා බැලීමට බත්තරමුල්ල වෙළෙඳ නගරයට ගිය ගමනේ දී රන් වෙළෙඳාමේ නියුතු ප්‍රබෝදා ජුවලර්ස් වෙළෙඳ ආයතනයේ ව්‍යාපාරික ප්‍රදීප් සංජීව මහතා දැක්වූයේ මෙවන් අදහසකි.

Q මේ දිනවල බිස්නස් කොහොමද?

රත්තරන් මිලේ වැඩිවීමත් එක්ක රත්‍තරන්වලට තිබූ ඉල්ලුම මේ වෙද්දී අඩුවෙලා තියෙන්නේ. ගිය වසර සහ මේ වසර එක්ක බැලුවාම ගිය වසරෙයි මේ වසරෙයි කියලා වෙලළඳාමේ වැඩිවීමක් වෙලා නෑ. රත්තරන් මිල වැඩිවීම නිසා බිස්නස් කඩා වැටිලා තියෙන්නේ.

Q බිස්නස් අඩුවීමට බලපෑ හේතු මොනවාද?

ගිය වසරට සාපේක්ෂව මේ අවුරුද්දේ රන් මිල දෙගුණ, තෙගුණ වෙලා තියෙන්නේ. මේ වෙද්දී රන් පවුමක මිල සාදන කුලිය නොමැතිව 258000ක් වෙනවා. කැරට් 24 රන් බිස්කට් එකක මිල 280000ක් වෙලා තියෙනවා. රත්තරන් මිල වැඩිවීම නිසා පාරිභෝගිකයෝ මිලදී ගැනීම්වලින් ඈත් වෙලා. රන් මිලේ ස්ථාවරත්වයක් නැහැ. අද තියෙන මිල නෙමෙයි හෙට තියෙන්නේ. එහෙම වුණාම පාරිභෝගිකයොත් රන් මිලේ අඩුවීමක් වෙනකන් බලන් ඉන්නවා. 

මේ කාලසීමාව මංගල උත්සව සඳහා දින නියම වුණ කාල සීමාවක් වුණත් පසුගිය වසරවල වගේ රත්තරන් භාණ්ඩ කිහිපයක් මිලදී ගන්න එන පිරිස අඩුයි. ගිය වසරවල මුදු දෙකක්, මාලයක්, ඊට අමතරව තවත් රත්තරන් භාණ්ඩ මිලදී ගන්න පාරිභෝගිකයෝ ආවට මේ වතාවේ පාරිභෝගිකයෝ මිලදී ගත්තේ මුදු දෙකක් විතරයි. ඒ වගේම පවුමක රන් භාණ්ඩයක් මිලදී ගන්නවා වෙනුවට පවුම් භාගයක රන් භාණ්ඩයක් මිලදී ගන්න යොමුවෙලා ඉන්නේ. රන් භාණ්ඩවල මිල වැඩිවීමත් එක්ක පාරිභෝගිකයාට ඒ මුදල දරාගන්න බැරිවීම නිසා අවශ්‍යම දෙය පමණක් මිලදී ගන්න යොමුවෙලා ඉන්නේ. දිනෙන් දින වැඩිවෙන රන් මිල පාරිභෝගිකයාට දරාගන්න බැරිවීම තමයි රන් බිස්නස් කඩාවැටෙන්න මූලිකවම බලපා තියෙන්නේ.

මනීෂා වීරසිංහ
ඡායාරූප : සුමුදු හේවාපතිරණ